Навоийда фуқаро Қизил китобга киритилган она-бола жайронни ўлдиргани аниқланди

Жорий йилнинг 9 июль куни Навоий вилояти Экология бошқармаси ходимлари вилоят ИИБ ЙҲХБ ҳамда Экопатрул ходимлари билан ҳамкорликда назорат рейд тадбирини ўтказди.

Фото: ecogov

Тадбир давомида Навбаҳор тумани ҳудудида фуқаро Қ.Ш. бошқарувидаги «Нива» русумли автомашина текширилган. Натижада машина юкхонасида 2 дона отилган Ўзбекистон Қизил китобига киритилган она-бола жайрон борлиги аниқланган.

Текширув-суриштирув ишлари давомида жайронлар Самарқанд вилояти, Нарпай тумани, Болтали қишлоғида яшовчи фуқаролар Қ.Ш ва Қ.Ф.га тегишли ов қуроллари ёрдамида ноқонуний овлангани маълум бўлган.

Ҳолат юзасидан тегишли далолатномалар тузилиб, табиатга 33 млн сўм зарар етказилгани аниқланди. Шунингдек, Қ.Ш. бошқарувидаги автомашина жарима майдончасига қўйилган ва ов қуроллари сақлаш учун Навоий вилоят ИИБга юборилган.

Маълум қилинишича, ҳозирда прокуратурага юбориш учун керакли ҳужжатлар тўпланмоқда.