Россияда «чет эл агентлари» реестри янада кенгайтирилди

Россия Адлия вазирлиги 21 июль, жума куни жисмоний шахслар - «чет эл агентлари» рўйхатини кенгайтирди. Унга «Дождь» телеканали бошловчиси Михаил Козирев, Давлат думасининг собиқ депутати ва тадбиркор Константин Боровой, ижтимоий фаол Павел Суляндзига ва «Планерка» журналистлар жамияти асосчиси Александр Литвинов кирди. 

Бундан ташқари, Россиянинг «7×7 - Горизонтальная Россия» минтақавий оммавий ахборот воситаси ва «Центр Т», «Омское гражданское объединение» ҳуқуқни ҳимоя қилиш ташкилотлари ҳамда «Право каждого» нодавлат ташкилоти «чет эл агентлари» бўлган ташкилотлар деб эълон қилинди.

Михаил Козирев, Россия Адлия вазирлигига кўра, «чет эл агентлари» учун материаллар яратган, Украина урушига қарши чиққан. Россиядан ташқарида яшовчи Боровой, бошқа нарсалар қаторида, гўёки «Россияни террорчи ташкилот билан тенглаштирган». 

Павел Суляндзига, идорага кўра, «натижалари Россиянинг ҳудудий яхлитлигини бузишга олиб келиши мумкин бўлган ҳаракатларга чақирган». Суляндзига - Россия Узоқ Шарқидаги маҳаллий халқларнинг ҳуқуқлари ҳимоячиси. У 2022 йилда Украинадаги урушга қарши чиққан Россиянинг Туб халқлари халқаро қўмитасининг асосчиларидан бири эди. 

«7х7 - Горизонтальная Россия» нашри Россия армияси ҳақида «нотўғри маълумот» тарқатганликда айбланган. «Центр Т» ташаббус гуруҳи Россияда айрим тоифадаги одамларга ёрдам беради, «Право каждого» инсон ҳуқуқлари нодавлат ташкилоти ижтимоий хавф остида бўлган одамлар билан ишлайди - масалан, ОИВ юқтирганлар билан.