Зеленский ЕИнинг Украина маҳсулотлари экспортини тўсиб қўйишини номақбул деб атади

Украина президенти Володимир Зеленский Европа Иттифоқи мамлакатлари тегишли чекловлар муддати тугайдиган 15 сентябрдан кейин Украина қишлоқ хўжалиги маҳсулотларини қуруқлик орқали экспорт қилишни тўсиб қўйишини номақбул деб атади.

Фото: president.gov.ua

Зеленскийнинг сўзларига кўра, у бу масалани қишлоқ хўжалиги маҳсулотларини экспорт қилиш бўйича йиғилишда муҳокама қилган.

«Биз Еврокомиссия билан келишувга ишонамиз, лекин ҳар қандай сценарийга тайёрланяпмиз», деб ёзган президент ва Киев «ҳаммага маъқул келадиган ечим топиш учун барча манфаатдор томонлар билан алоқада» эканини қўшимча қилди.

Аввалроқ Россия амалда 20 июлдан бошлаб Украинанинг Қора денгиз соҳиллари блокадага олинганини эълон қилди. Қора денгиздаги Украина портларига кетаётган барча кемалар ҳарбий юкларни потенциал ташувчилар сифатида кўриб чиқилади ва бундай кемаларда байроғи ўрнатилган мамлакатлар «Украина можаросида Киев режими томонида иштирок этган деб ҳисобланади», дея маълум қилди 19 июль куни Россия Мудофаа вазирлиги.

У қўшни давлат портлари блокадасини Москванинг «ғалла битими»дан чиқиши билан изоҳлади (матнда бу воқеа «Қора денгиз ташаббуси» фаолиятининг тўхтатилиши ва денгиз ҳуманитар коридорининг чекланиши» деб аталади).

Бундан ташқари, Россия Мудофаа вазирлиги Қора денгиз халқаро акваторияларининг шимоли-ғарбий ва жануби-шарқий қисмидаги бир қатор ҳудудлар навигация учун вақтинча хавфли деб эълон қилингани ва «денгизчилар учун хавфсизлик кафолатлари бекор қилиниши тўғрисида огоҳлантиришлар жорий этилгани» ҳақида маълумот берди.

«Ғалла битими» деярли бир йил давомида амал қилди. Украинадан озиқ-овқат маҳсулотларини экспорт қилиш бўйича келишувлар 2022 йил 22 июлда Истанбулда 120 кунга тузилган, кейин эса уч марта узайтирилган. Битимлардан бири Киев томонидан назорат қилинадиган Одесса, Черноморск ва Южний портларидан дон экспортини тартибга солади.