Ўтган қишда пойтахт Тошкентдаги электр узатиш билан боғлиқ муаммолар ортидан шаҳарни узлуксиз электр билан таъминлаш масаласи юзага чиқди. Шундан сўнг бир неча ойки, Тошкентнинг исталган қисмида “Ҳудудий электр тармоқлари” АЖ томонидан электр кабеллари ётқизиш учун кўчалар қазилаётганига гувоҳ бўляпмиз. Kun.uz’гa келган мурожаатда Яшнобод туманидаги 2 ойдан бери секинлашиб қолган худди шундай қазиш ишлари натижасида ҳудуддаги дарахт илдизларига зиён етказилаётганидан хавотир билдирилган.
Илдизлар чопилган, ишлар тўхтаб қолган
Яшнобод туманининг Элбек кўчасига етиб борганимизда ҳақиқатан ҳам 1 кмга яқин ҳудуд электр кабеллари ётқизиш учун қазилгани, чуқурларда махсус ҳимоя бетонлари ўрнатилгани, аммо иш куни, эрталабки соат 11 лар атрофи бўлишига қарамасдан, бу ерда ҳеч қандай иш олиб борилмаётганига гувоҳ бўлдик.
Мурожаатда айтилганидек, ўнлаб дарахтларнинг илдизларига зиён ҳам етган. Масала эса бу зиённинг дарахтлар келажаги учун қанчалик хавфли эканлигида.
Эътироз ва муносабат
“Баҳорда бошланган ишлар, мана ёз келибдики, тугагани йўқ. Қазиб ташланган жойлар шу аҳволда ётибди. Одамлар чуқурга чиқинди ҳам ташлашмоқда. Олдин дарахтлар тагига сув қуйиб кетишарди. Ҳозир бу ерлар ковланганига ташландиқ бўлиб қолиб, дарахтларимиз қуриб кетяпти”, дейди шу ерга яқин хонадонларда яшовчи онахон.
Бунга жавобан Яшнобод тумани Кўкаламзорлаштириш ва ирригация бўлими бошлиғи Баҳодир Умаров шундай деди:
— Ҳар бир дарахт ниҳолларгача эътиборимизда. Ковланган ҳудудда сув сепиш машинаси кириб бўлмайдиган жойларга ишчилармиз челаклаб сув ташиб, дарахтларни суғоришяпти. Дарахтларга ҳеч қандай хавф йўқ. Агар бўлганда 2 ой эмас, бир ҳафтага бормасдан дарахтлар қуриб қолган бўларди.
