«Проект»: 80 дан ортиқ россиялик олигарх РФ армияси таъминотида иштирок этмоқда 

Урушдан олдинги Forbes журналининг «200 энг бой россияликлар» рейтингига киритилган камида 81 нафар россиялик тадбиркор Россия армиясини таъминлашда очиқ иштирок этяпти. Бу ҳақда 31 июль, душанба куни чоп этилган «Проект» нашрининг суриштирувида айтилган.

«Проект» хулосалари Россия мудофаа заводлари ва олигархларга тегишли корхоналар ўртасида тузилган давлат шартномалари таҳлилига асосланади. Суриштирувчиларнинг таъкидлашича, 2017 йилда Россия Мудофаа вазирлиги ўз шартномаларини оммавий равишда таснифлашни бошлаган, шунинг учун улар топган шартномаларнинг аксарияти 2014-2018 йилларга тўғри келади. Бу тўлиқ вазиятни тушунишга имкон бермаслиги мумкин, аммо журналистлар фикрича: «Уруш учун ишлаётган тадбиркорларнинг ҳақиқий сони ва бунинг учун оладиган пуллари бизнинг маълумотлар базасидан сезиларли даражада кўп бўлиши мумкин». 

Нашр маълумотларига кўра, Украина билан можаронинг бутун даври - 2014 йилдан 2023 йилгача бўлган даврда Россия йирик бизнес вакилларининг Мудофаа вазирлиги билан фақат очиқ шартномалари умумий суммаси камида 220 миллиард рублни ташкил этади.

Суриштирувда журналистлар, жумладан, Алексей Мордашов («Северстал»), Владимир Потанин («Норникель»), Вагит Алекперов («Лукойл»), Михаил Фридман (LetterOne), Роман Абрамович (Millhouse), Геннадий Тимченко («Новатэк»), Алишер Усмонов (USM), Юрий Ковалчук («Россия» банки), Аркадий Ротенберг («Мостотрест») ва бошқаларнинг номларини келтирган.

«Проект» қайд этишича, ушбу олигархларнинг 80 нафари санкциялар остида. Бироқ, Украина санкциялари фақат 34 тадбиркорга нисбатан қўлланилади ва фақат 14 олигарх Киевнинг иттифоқчиси бўлган барча мамлакатларда чекловларга дучор бўлган. Суриштирувчилар таъкидлашича, фақат битта олигарх кенг кўламли ҳарбий ҳаракатлар бошланганидан кейин Кремль сиёсатига қарши чиқди - «Тинькофф Банк» асосчиси Олег Тинков.