Ёзги трансферлар давом этмоқда, яна бир қатор футболчилар ўзларига янги клуб топишди, яна бир қанча трансферлар ҳал бўлиши кутилмоқда. Қуйида сўнгги куннинг энг асосий трансфер хабарлари дайжести.
Сўнгги кунларда амалга оширилган трансферлар
«Манчестер Сити» ҳимоячилар бўйича трансфер рекордини янгилади
Йошко Гвардиол 90 млн евро (яна 10 млн евро бонус) эвазига «РБ Лейпциг»дан ўтган мавсумда требл соҳиби бўлган жамоага ўтди— бу вақтгача ҳимоячи учун бунча кўп пулни ҳеч ким тўламаганди. 21 ёшли хорват билан беш йиллик шартнома тузилган. Ҳозирча «Сити»нинг янги футболчисининг энг катта ютуғи — Пеп Гвардиоладан комплимент бўлиб турибди. Табиийки, фамилияси туфайли.
«Манчестер Юнайтед» Расмус Ҳойлундни сотиб олди
Бу достон ҳам ниҳоят якунланди. «Иккинчи Ҳоланд» деб аталаётган 20 ёшди даниялик ҳужумчи «Аталанта»дан «Олд Траффорд»га келди. Трансфер қиймати — 70 млн евродан ортиқ, бонуслар ҳам кўзда тутилган. Томонлар беш йиллик шартнома имзолашган, унда келишувни яна бир йилга узайтириш тўғрисида банд бор.
Ушбу форвард ўтган мавсум А Серияда 32 ўйинда 9 та гол ва 2 та ассистга муаллифлик қилган.
«Тоттенҳэм»да трансферлар давом этмоқда
«Тоттенҳэм» Ангелос Постекоглу бошчилигида АПЛнинг янги мавсумига тайёрланмоқда. «Шпорлар» хўжайинлари таркибни кучайтирмоқда. «Блэкбёрн»дан 18 ёшли ҳимоячи Эшли Филлипс сотиб олинди. 192 см бўйга эга футболчи Англиянинг турли ёш тоифаларидаги жамоаларида ўйнаган ва йилдан йилга ўсиб бормоқда. У энди катта клуб билан беш йиллик шартномага эга бўлди.
Инсайдер Фабрицио Романонинг хабарига кўра, «Тоттенҳэм» тез орада яна икки футболчи трансферини эълон қилади. Биринчиси – «Росарио Сентрал»нинг 19 ёшли форварди Алехо Велис, иккинчиси – «Волфсбург» ҳимоячиси Микки ван де Вен. Аргентиналик ҳужумчи учун клуб 15 млн евро ва бонуслар тўлайди, нидерландиялик футболчи трансфери 50 млн еврога тушади. «Тоттенҳэм» топ-4 га қайтиш учун жиддий киришган.
Мавзуга оид
«Челси» «Брайтон» дарвозабонини сотиб олди
25 ёшли Роберт Санчес энди Кепа Аррисабалага билан рақобатлашади, жамоанинг ўтган мавсумдаги асосий дарвозабони Эдуар Менди Саудия Арабистонига йўл олган. Томонлар етти йиллик шартнома тузишган.
«Челси» яна бир французни қўлга киритди
«Монако» ҳимоячи Аксел Дисасини «Челси»га сотди. 25 ёшли футболчи билан олти йиллик шартнома тузилган. Трансфер қиймати 45 млн еврони ташкил этган. Дисаси ўтган мавсумда «Монако» сафида 49 ўйин ўтказиб, олти гол урган ва тўрт голга узатма берган. «Челси»да Аксел дарҳол асосий таркибда ўйнайди, чунки клуб жароҳат туфайли Уэсли Фофанани узоқ вақтга йўқотган.
«Лацио»да япониялик футболчи
Япония миллий жамоаси ҳавбеки Даити Камада фаолиятини А Серияда давом эттиради. «Лацио» у билан 2+1 шаклида шартнома имзоланганини эълон қилди. Япониялик 26 ёшли футболчи «Айнтрахт»дан эркин агент сифатида Рим клубига кўчиб ўтди.
Аввалроқ, Камаданинг римликлар сафидаги йиллик маоши 3,4 млн еврони ташкил этиши хабар қилинганди.
«Милан»нинг яна бир трансфери
«Милан» «Валенсия»дан америкалик яримҳимоячи Юнус Мусани сотиб олганини эълон қилди. 20 ёшли футболчи янги клуби билан 2028 йил ёзига қадар шартнома имзолаган. Футболчининг йиллик маоши миқдори 2 млн еврони ташкил этади. Муса «Милан»да ўз вақтида Роналдинога тегишли бўлган 80-рақамни олди. Трансфер учун 20 млн евро тўланган, яна 1 млн евро бонус сифатида кўзда тутилган. Юнус «Арсенал» академияси тарбияланувчиси ҳисобланади, 2019 йилда «Валенсия»га ўтганди. «Кўршапалаклар» сафида у жами 108 ўйинда майдонга тушган. Энди унинг фаолиятида – янги босқич бошланмоқда.
Йерри Мина «Фиорентина» футболчисига айланди
«Барселона»нинг собиқ ҳимоячиси Йерри Мина «Эвертон»ни тарк этиб, фаолиятини Италияда давом эттирадиган бўлди. «Фиорентина» клуби колумбиялик 28 ёшли футболчи билан шартнома имзоланганини эълон қилди. У италияликлар клуби сафига эркин агент сифатида қўшилди. Томонлар бир йиллик шартнома имзолаган.
Аввалроқ, Минага «Пахтакор» қизиқиш билдиргани ҳақида хабар қилинганди.
Кутилаётган ва ўхшамаган трансферлар
Неймар «Барселона»га қайтиши мумкин
Mundo Deportivo ва Diario Sport нашрлари ҳафтанинг асосий янгилигини эълон қилишди — Неймар «Барселона»га ўтиши мумкин. Журналист Мабҳут Ал-Марри маълумотига кўра (у «ПСЖ»га алоқадор маълумотлар учун ишончли манба сифатида қаралади), 31 ёшли вингер Каталонияга қайтишни истамоқда ва унинг ҳозирги клуби ҳам уни тўхтатмоқчи эмас.
Аммо, нашр маълумотига кўра, Хави Неймарнинг қайтишига қизиқиш билдирмаяпти — унинг ҳисоблашича, бразилиялик юлдуз унинг лойиҳаси учун керакли футболчи эмас. Аввалроқ инсайдер Фабрицио Романо «Барселона» вингери Усмон Дембеле «ПСЖ»га кетишидан кейин каталонияликлар ҳужум чизиғида янги футболчига эҳтиёж сезиши мумкинлиги ҳақида ёзганди.
Килиан Мбаппе бир оёғи билан «Реал»дами?
Камида журналист Родриго Фаеснинг тасдиқлашича шундай. Унинг маълумотига кўра, «Реал» ва «ПСЖ» барибир ушбу суперюлдуз трансфери бўйича келишувга эришган ва энди 24 ёшли ҳужумчи Мадрид клуби билан узоқ муддатли шартнома тузади. Келишув қиймати очиқланмаяпти, лекин Мбаппенинг «Реал» сафидаги дебюти катта эҳтимол билан Испания чемпионатининг 1-тури доирасида «Атлетик» Билбао клубига қарши кечади. Ўйин 12 август кунига белгиланган.
Фабрицио Романонинг маълумоти эса бошқачароқ. Унинг ёзишича, «ПСЖ»нинг позицияси ўзгаришсиз қолмоқда. Парижликлар клуби футболчига бир неча таклифлар берган, жумладан кейинги йил ёзида маълум миқдорда трансфер бўлиши эвазига шартномани узайтириш бўйича ҳам. Мбаппе барча таклифларни рад этган.
Бу вақтда эса «Реал» футболчилари Тони Кросс ва Родриго инстаграмдаги саҳифаси орқали Килиан Мбаппенинг трансферига ишора қилмоқда.
Кейннинг «Бавария»га ўтиши хавф остида
Ёзнинг яна бир асосий трансфер сагасида эса ишлар чаппасига кетмоқда — 4 август куни «Бавария» «Тоттенҳэм»га Ҳарри Кейн бўйича якуний таклифини юборган ва жавоб қайтариш учун дедлайн белгилаганди — ўша куннинг охирига. Навбатдаги таклиф шартлари олдингиларидан анча яхшироқ эди: мюнхенликлар ҳужумчи учун 100 миллион евро ва бонуслар сифатида яна 20 млн евро ваъда қилишган. Олдинроқ ОАВ «шпорлар» хўжайини Дэниэл Леви футболчи учун айнан шунча маблағ сўраётгани айтилганди.
Аммо, Bild маълумотига кўра, лондонликлар клуби раҳбари бу таклифни ҳам эътиборсиз қолдирган ва таътил учун Майамига учиб кетган — Мюнхендагилар буни савдони давом эттириш сифатида баҳолашган. 30 ёшли футболчининг шартномаси муддати 2024 йилда якунига етади, Кейн эса янги шартнома тузишдан бош тортмоқда.
«Интер» Зоммерни сотиб олмоқда
Фабрицио Романо «Интер» ва «Бавария» Ян Зоммер трансфери бўйича якуний келишувга эришганини эълон қилди — 34 ёшли дарвозабон энди Италия чемпионатида ўзини синаб кўради. Швейцариялик футболчи мюнхенликлар сафига январ ойида келиб қўшилганди, аммо у Нойер сафга қайтганидан кейин иккинчи рақамли дарвозабон бўлиб қолишни истамади ва анчадан буён ўзига янги клуб топишни сўраб келаётганди. Якунда «Интер» уни 6 миллион еврога трансфер қилишга муваффақ бўлди. Томонлар қанча муддатга шартнома тузаётгани маълум эмас.
«Ювентус»нинг навбатдаги нишонлари
«Ювентус» трансферлар бозорида фаоллашмоқда. Аввалроқ Ромелу Лукаку ва Жанлуиджи Доннаруммага қизиқишлар тўғрисида хабарлар берилганди. Энди Фабрицио Романо ва Жанлука Ди Марционинг тасдиқлашича, «Юве» «Ницца» ҳимоячиси Жан-Клер Тодибо ва «Арсенал» яримҳимоячиси Томас Парти трансфери устида иш олиб бормоқда. Туринликлар 23 ёшли футболчи борасида француз клубига расмий сўров юбориб бўлган. Шунингдек, Парти трансфери бўйича ҳам «Арсенал» билан алоқа ўрнатилган, аммо ҳозирча иш расмий музокараларгача етиб келмаган.
«Челси» ва «Сити» бир футболчи учун рақобатлашмоқда
Инсайдер Фабрицио Романонинг хабар беришича, «Челси» ва «Манчестер Сити» АПЛ ўртамиёна жамоаларидан бири «Кристал Пэлас» яримҳимоячиси Майкл Олисе трансферига қизиқмоқда. 21 ёшли ушбу футболчининг шартномасидаги бадал пули миқдори 40 млн еврони ташкил этади. Клублар Олисени сафга қўшиб олиш учун ушбу бандни ишга тушириши мумкин.
Эътиборли томони, футболчи «Челси» академиясида етти йил ўтказган (2009 йилдан 2016 йилгача). 2022/2023 йиллар мавсумида у «Кристал Пэлас» учун барча турнирлар доирасида 40 ўйинда майдонга тушиб, икки гол урган ва 11 голга узатма берган. Унинг клуби билан шартномаси муддати 2026 йил июн ойи охиригача тузилган.
«Милан» «Барса» ҳимоячисини қўлга киритадими?
La Gazzetta dello Sport хабарига кўра, «Милан» франциялик ҳимоячи Клеман Лангле трансферига қизиқмоқда. Нашр маълумотига кўра, бу трансфер 10 млн еврога айланиши мумкин. Аммо «россонерилар» нархни янада туширишни истамоқда. Лангле ўтган мавсумда ижара асосида «Тоттенҳэм»да тўп тепганди. 28 ёшли футболчи лондонликларнинг барча турнирлар доирасидаги 35 ўйинида майдонга тушиб, бир гол урган ва икки голга узатма берган. Лангленинг каталонияликлар билан шартномаси муддати 2026 йил ёзида якунланади.
Гап Флориан Вирц ҳақида кетмоқда. 20 ёшли яримҳимоячи бир неча йилдан буён «Байер» сафида Бундеслигада жавлон урмоқда ва бўлажак суперюлдуз сифатида қаралмоқда. Football Transfers маълумотига кўра, «Сити» ушбу истеъдодли немисни Саудия Арабистонига йўл олган Риёз Маҳрезга муносиб ўринбосар сифатида кўрмоқда. Пеп Гвардиол Вирцга юқори баҳо бермоқда ва футболчининг ўзи ҳам клубини ўзгартиришга қарши эмас. Аммо «Байер» ўз юлдузи учун каттагина маблағ ишлаб олмоқчи.
«Челси» ва «Арсенал» Муҳаммад Қуддус учун рақобатда ютқазди
Нуфузли The Athletic нашри ёзишича, «Брайтон» «Аякс» билан 23 ёшли ганалик яримҳимоячи трансфери борасида келишувга эришган. Англиянинг ўртамиёна клуби учун бу рекорд трансфер бўлади. Томонлар 40 млн еврога келишган. Қуддуснинг ўзи ҳам бўлажак клуби билан шартнома шартларини келишиб олган. Бунгача ушбу футболчи учун «Челси» ва «Арсенал» клублари асосий даъвогар сифатида кўрилаётганди.
