Бухорода тарихий обидаларга вертолёт турлари ташкил этилиши мумкин

Uzbekistan Helicopters бундай имкониятини ўрганиб чиқмоқда.

Фото: Uzbekistan Helicopters

Бухоро вилояти, Ромитан тумани, Бўронтепа қўрғони ёнидаги Варахша массивида жойлашган қадимий ёдгорликка вертолёт тури ташкил этилиши мумкин.

- Бухоро вилоятида «Bukhara Desert Oasis & Spa» мажмуасида вертолёт турларини ташкил этиш масаласини кўриб чиқяпмиз», деди Uzbekistan Helicopters корхонаси раҳбари Сардор Нормуҳаммедов. - Қилинаётган тадбирлар вилоятга туризм оқимини янада оширади. Маҳаллий ва чет эл сайёҳлари учун дунё стандартларига жавоб берадиган мукаммал бир маҳсулот тақдим этади.

Қайд қилинишича, Бухоро вилоятига 2022 йилда уч ярим миллион сайёҳ келган, 2025 йилда бу кўрсаткични ўн миллионга етказиш режалаштирилган.

Бўронтепа ёдгорлигини туризм чорраҳасига айлантириш йўналишида ҳам ишлар бошлаб юборилган. Ушбу маскандан Хоразм ва Самарқанд шаҳарларига вертолёт ва самолёт рейслари йўлга қўйилиши ҳам режалаштирилмоқда.