Тўртта вилоят ҳокимларининг инвестиция бўйича ўринбосарларига чора кўрилади

18 январ куни Шавкат Мирзиёев раислигида бўлиб ўтган видеоселектор йиғилишида экспорт соҳасидаги ишлар аҳволи таҳлил қилиниб, комплекс раҳбарияти ва ҳокимларнинг 2024 йил учун экспорт режаси етарли эмаслиги қайд этилди.

«Иқтисодиётимизни янги босқичга олиб чиқиш учун, экспортни йилига камида 30 фоизга ошириб боришимиз зарур», - деди президент.

Лекин, ўтган йили 2 та драйвер тармоқ ва 4 та ҳудудда 2022 йилга нисбатан экспорт ҳажмлари камайди. Шунингдек, 10 та туман ва шаҳарда экспорт олдинги йил кўрсаткичини ярмига ҳам етмади.

Шу муносабат билан бош вазирга Андижон, Бухоро, Қашқадарё, Навоий вилоятлари ҳокимининг инвестиция бўйича ўринбосарлари ҳамда 10 та туман ва шаҳар ҳокимига нисбатан интизомий чора кўриш топширилди. 

Мева-сабзавот экспорти учун хорижий давлатларнинг фитосанитар рухсатлари олинганига қарамасдан, улардан тўлиқ фойдаланилмаяпти. Масалан, Японияга 58 турдаги мева-сабзавотга фитосанитар рухсат олингани билан, 52 тури бўйича, Ҳиндистонга 38 тадан 32 таси, Покистонга 22 тадан 18 таси, АҚШга 15 тадан 11 таси бўйича экспорт бўлмади. 

Ўсимликлар карантини ва ҳимояси агентлиги ва ҳокимларнинг инвестиция бўйича ўринбосарлари ўртасида маҳсулотлар экспортини ташкил қилиш бўйича ҳамкорлик йўқлиги танқид қилинди. Эндиликда агентлик нафақат фитосанитар рухсат олиш, балки қишлоқ хўжалиги экспортини ташкиллаштириш учун ҳам масъул бўлади. Бунинг учун карантин тизими, иш услуби ва ёндашувлари тўлиқ ўзгаради.

• Маълумот учун, айни вақтда Андижон вилояти ҳокимининг инвестиция масалалари бўйича ўринбосари лавозимида Ботиржон Ҳамраев, Бухоро вилоятининг инвестициялар ва ташқи савдо бошқармаси бошлиғи лавозимида Ризо Асадов, Қашқадарё вилояти инвестициялар, саноат ва савдо бошқармаси бошлиғи лавозимида Олимхон Рустамов, Навоий вилояти инвестициялар ва ташқи савдо бошқармаси бошлиғи лавозимида Исломиддин Норимов ишлаб келмоқда.