Самарқандда қурилаётган мактабда лойиҳадан четга чиқиб арзон қурилиш материаллари ишлатилгани аниқланди

Масъул ташкилот томонидан қурувчига камчиликларни бартараф этиш бўйича кўрсатма берилган. Сифатсиз деворлар бузиб ташланган.

Фото: Видеодан кадр

Самарқанд шаҳрининг Қорасув массивида қад ростлаётган мактаб қурилишида қурувчи ташкилот лойиҳадан четлашиб, арзон материалдан фойдаланган. Бу ҳақда вилоят қурилиш ва уй-жой коммунал назорати инспекцияси хабар бермоқда.

Маълум қилинишича, “Темир қалқон” МЧЖ томонидан қурилаётган мактабнинг фаоллар зали ва спорт залига лойиҳада газоблокдан фойдаланиш кўзда тутилган бўлса-да, ташкилот бошқа арзон материаллардан фойдаланган.

Деворларга терилган газоблоклар ҳам стандартга мос келмайдиган даражада сифатсиз терилган. Мактаб биносига ўрнатилган эшик ва деразалар ҳам сифатсиз тарзда ўрнатилган.

Бундан ташқари, қурилиш объектида техника хавфсизлиги қоидаларига умуман амал қилинмаган.

Аниқланган камчиликлар инспекция томонидан назоратга олиниб, МЧЖ масъулларига уларни бартараф этиш бўйича кўрсатмалар берилган. Лойиҳадан четга чиқиб, деворларга терилган бетон блоклар буздирилган.