Бўкада 20 ёшли ҳомиладор аёл операция вақтида вафот этди

Бўка туманида 20 ёшли аёлнинг туғуруқхонада вафот этгани ҳақида аёлнинг яқинлари олган видеоси тарқалди. Соғлиқни сақлаш вазирлиги берган расмий муносабатга кўра, 2004 йилда туғилган аёл Тошкент вилояти Бўка тумани тиббиёт бирлашмасининг туғуруқ бўлимига 17 ноябр куни соат 14:30 лар атрофида келган. Аёлни унинг онаси йўлланма асосида олиб келган. Маълум бўлишича, бемор “Ҳомиладорлик-I, 30 ҳафта, сийдик йўли инфекцияси, семизлик-III даража” дастлабки ташхиси билан муассасага ётқизилган. “Шунга қарамай, аёл ўша куни соат 17:10 лар атрофида тилхат асосида шифохонадан чиқиб кетган”, – дейилади расмий хабарда.

20 ноябр куни соат тахминан 04:50 да бемор Н.С. туғуруқ бўлимига қайта мурожаат қилган ва танасида шишлар ҳамда сариқлик белгилари билан оғир аҳволда қабул қилинган. Унга “Ҳомиладорлик-I, 30 ҳафта, сийдик йўли инфекцияси, ўткир ёғли гепатоз, анемия ўрта оғир даража, семизлик-III даража” дастлабки ташхиси қўйилган. Соат 13:10 лар атрофида даволаниш вақтида аёлнинг аҳволи оғирлашган ва шифокорлар консилиумидан сўнг бемор реанимация бўлимига ўтказилган. Унинг ҳолати бўйича вилоят перинатал марказига хабар берилган.

Вазирлик аёлнинг саломатлик ҳолати ҳисобга олиниб соат 14:55 да жарроҳлик амалиётига олингани ва операция чоғида беморда барча инъекцион муолажалар тиббий кўрсатмага мувофиқ бажарилганини қўшимча қилган. Лекин Н.С.нинг умумий аҳволи жарроҳлик амалиёти бажарилаётган даврда янада оғирлашиб, клиник ўлим ҳолати содир бўлган. Тегишли реанимацион муолажалар бажарилишига қарамай, беморда соат 17:50 атрофида биологик ўлим қайд этилган.

Дастлабки хулосага кўра, ҳолат сабаби сифатида ўпка артериясининг тромбоэмболик синдроми, оғир гепатоз, ўткир жигар етишмаслиги, уросепсис, септик шок қайд этилган ва соат 20:00 лар атрофида прокуратура органларига расмий ахборот берилган. “Ҳолат юзасидан Соғлиқни сақлаш вазирлигининг бош акушер-гинекологи раҳбарлигидаги ишчи гуруҳ хизмат текширувини амалга оширмоқда. Ўз навбатида, Бўка тумани прокуратураси томонидан она ўлими бўйича суриштирув ишлари олиб бориляпти”, – дейилган расмий хабарда.

Вазирлик тиббиёт муассасаларида содир бўлган ҳар қандай ўлим ҳолатлари патанатомик текширувга ёки суд-тиббий экспертизага, биологик ўлим қайд этилгандан сўнг икки соат давомида йўналтирилишини эслатган.