Янгиҳаёт туманидаги ёғоч уйларнинг бузилиши бўйича изоҳ берилди. Нималар қилинади?

25 ноябр куни Янгиҳаёт туманининг Йўлдош мавзесида аҳолига “Спутник” номи билан таниш ҳудуддаги 409 та икки қаватли ёғоч уйлар бузилиши бошлангани хабар қилинганди.

Аммо тармоқларда жамоатчиликнинг мавзедаги дарахтзорлар йўқ қилинишига оид хавотирларидан сўнг пойтахт ҳокимияти ҳузуридаги “Tashkent Invest” компанияси дастур бошқа ҳудудда амалга оширилишини, яшиллик сақлаб қолиниши, уйларда яшовчилар эса бошқа ҳудудга кўчирилишини маълум қилди.

Таъкидланишича, Йўлдош мавзеси ҳудудида аҳоли 1966 йилнинг ёзидан яшай бошлаган. Шаҳарликлар учун уй-жой масаласининг вақтинчалик ечими сифатида тўрт юздан ортиқ икки қаватли ёғоч уйлар қурилган.

“Ҳозирги пайтда бундай уй-жойлар маънан эскирган ва хонадонларнинг кичик майдони (ҳар бир кишига 16 кв м дан кам) ҳамда оддий маиший шароитларнинг йўқлиги сабабли сифатли уй-жойга қўйиладиган замонавий талабларга жавоб бермайди.

Аксарият уйларнинг ёғоч қурилиш конструкциялари ва муҳандислик тармоқлари юқори даражада жисмоний эскирган, шунингдек, энергия тежамкор эмас ва ёнғин хавфи юқори. Бундай уйларда яшаш шаҳарликлар учун ноқулай ва ҳатто хавфлидир”, – дейилади изоҳда.

Муаммонинг ечими сифатида ҳудудни реновация қилиш дастури ишлаб чиқилгани ва у бир нечта босқичларни ўз ичига олиши қўшимча қилинди.

Йўлдош мавзесида нималар қилинади?

Мавзе чинор, липа, эман ва бошқа турдаги дарахтлардан иборат яшил ўсимликлар билан қалин қоплангани сабабли реновация бошқа жойда амалга оширилади. Мавжуд дарахтларни сақлаб қолиш ва даволаш, янги дарахт, буталарни ўтқазиш орқали замонавий дендропарк ташкил этилади.

Режага кўра, аҳолини кўчириш учун 1,5 км узоқликдаги Гулшaнобод маҳалласи танлаб олинган. Туман лойиҳаси ва концепцияси “Tashkent Invest” АЖ қурувчи компания билан биргаликда ишлаб чиқилмоқда. Маълумотларга кўра, лойиҳа қурилиш компанияси билан тузилган инвестиция шартномаси асосида амалга оширилади, унда квартираларни давлат уй-жой фондига бериш шартлари акс эттирилган.

Аммо компаниянинг бошқа Telegram-каналида эълон қилинган хабарга кўра, Гулшанободда “Янги маҳалла” турар жой мажмуаси қурилади. Лойиҳа “GC-Group Industries” МЧЖ томонидан 24 гектар майдонда амалга оширилади. Бунинг учун 2024-2027 йиллар белгилаб олинган.

“Мажмуа ҳудудида 13 392 та хонадонга мўлжалланган 93 та 16 қаватли замонавий уй қурилади. Инфратузилмага 1 600 ўқувчига мўлжалланган мактаб, 600 ўринли болалар боғчаси ва сунъий кўл киради. Уйларнинг биринчи қаватлари яшаш учун мўлжалланмаган бўлиб, маиший хизмат кўрсатиш зоналари ҳамда ерусти ва ерости автотураргоҳлар жойлаштирилади”, – дейилади расмий эълонда.

Компанияга кўра, одамлар кўчирилганда уларга замонавий талабларга жавоб берадиган тенг қийматли квартиралар, масалан, эски уйдаги 1 хонали уй ўрнига янги уйдаги 1 хонали уйлар берилади. Муҳтож аҳолига янги уйга кўчиб ўтишда ёрдам кўрсатилади. Уй-жойини кенгайтириш, қўшимча ҳақ эвазига қўшимча хоналар сотиб олишда имтиёзли ҳуқуққа эга бўлади.

Лойиҳанинг рентабеллиги ҳақида

Қайд этилишича, лойиҳанинг иқтисодий самара ва кутилаётган натижалари қуйидагилардан иборат:

• “Спутник” ҳудуди аҳолисининг уй-жой шароитларини яхшилаш;

• Шаҳар экологиясига сўзсиз ҳисса қўшадиган янги объект – дендропаркни яратиш;

• Гулшанобод маҳалласининг ривожланиши Янгиҳаёт туманининг ривожланишига туртки бўлади (бу юзлаб янги иш ўринлари, янги ҳудудларни комплекс ўзлаштириш ва бошқалар).

“Бунда мавжуд ҳуқуқий ва меъёрий механизмлардан фойдаланган ҳолда (жамоатчилик муҳокамаси, мулкдорлар йиғилиши, бош режаларни амалга ошириш, квартираларни пардозлашга қўйиладиган талабларни ишлаб чиқиш ва бошқалар) биз реновация тўғрисидаги қонуннинг пойдеворини ва механизмини яратмоқдамиз”, – дейилади изоҳда.

Қолаверса, компания шаҳарсозлик нормаларини бажариш учун 2025 йилнинг 1 чорагида очиқ жамоатчилик муҳокамасини ўтказиш мумкинлигини ҳам айтиб ўтган.

Эслатиб ўтамиз, “Спутник”даги ёғоч уйларнинг бузилиши 2021 йил март ойида ҳукуматнинг тегишли қарор лойиҳасига киритилганди. Кейинроқ бу ҳақда давлат раҳбарининг ўзи ҳам сайловчилар билан учрашувда таъкидлаганди.

Кейин айни мавзу 2022 йилда ҳам кўтарилди. Ўшанда Tashkent city халқаро ишбилармонлик маркази объектларини қуриш ва сақлаш дирекцияси буюртмаси асосида Kensel Yenileme Merkeze ташкилоти томонидан Янгиҳаёт тумани бош режаси лойиҳа концепцияси ишлаб чиқилгани айтилганди.

Маълумот учун, пойтахт ҳокими Шавкат Умрзоқовга кўра, шаҳарда 500 гектар ҳудуддаги бинолар реновация қилиниши керак. Бундай бинолар қаторига 2 қаватли эски уйлар ва Сергели туманидаги айрим турар жойлар ҳам киритилган.