Тожикистон 2024 йилда Ўзбекистонга етказиб берган электр энергияси ҳажми маълум бўлди

Тожикистоннинг ўтган йили жами электр энергияси экспорти 2 миллиард 478 миллион киловатт·соатдан ортиқни ташкил қилди, деб хабар берди мамлакат Энергетика ва сув хўжалиги вазирлигига таяниб Asia-Plus. Бу 2023 йилга нисбатан қарийб 204 миллион кВт·соат ёки 7,8 фоизга кам.

Энг кўп электр энергияси Афғонистонга етказилган - 1 миллиард 530,4 миллион кВт·соат, қиймати 705,2 миллион сомоний (≈64 млн доллар). Бу мамлакат учун ҳар бир киловатт энергия 4,2 цент қийматга тенг бўлган.

Ўзбекистонга 943,9 миллион кВт·соат экспорт қилинган, қиймати 201,2 миллион сомоний (≈18 млн доллар). Ҳар бир киловатт нархи тахминан 2 цент бўлган.

Қайд қилинишича, 2024 йилда экспорт қилинган электр энергияси Тожикистонда ишлаб чиқарилган электр энергиясининг 11 фоиздан сал кўпроқ қисмини ташкил этган. Ўтган йили республикада қарийб 22 миллиард 428 миллион кВт·соат электр энергияси ишлаб чиқарилди.

Тожикистон Статистика агентлиги маълумотларига кўра, 2024 йилда республика тахминан 113 миллион долларлик электр энергиясини экспорт қилган, бу 2023 йилга нисбатан 2,4 фоизга кўпдир.

2024 йилда республика экспортининг умумий ҳажмида электр энергияси етказиб бериш улуши 5,8 фоизни ташкил этган.

Таъкидланишича, куз-қиш мавсумида Тожикистоннинг ўзи энергия таъминоти билан боғлиқ муаммоларга дуч келганда, электр энергияси фақат Афғонистонга кичик ҳажмда – линиялар ва бошқа инфратузилма жиҳозларининг ишлашини таъминлаш учун етказиб берилади. Ўзбекистон билан шартнома фақат ёзги даврда етказиб бериш учун мўлжалланган.