“Ичимлик сув учун нақд пулда амалга оширилган тўлов базада қайд этилмайди” – “Ўзсувтаъминот”

Аҳоли хонадонларига сувдан қарздорлик борлиги ҳақида қоғоз олиб бориш ва тўловни амалга оширишни талаб қилиш ноқонуний ҳисобланади. Мазкур ҳолатда ўтказилган маблағлар орқали қарздорлик бартараф этилмайди. Бу ҳақида “Ўзсувтаъминот” раиси ўринбосари Хуршид Раҳматуллаев маълум қилиб, ичимлик сувига фақат расмий электрон тўлов воситалари орқали маблағ ўтказиш зарурлигини таъкидлади.

2024 йил 1 декабрдан ичимлик ва оқова сув учун тўловлар фақат электрон шаклда амалга оширилиши эълон қилинган эди. Бироқ шунга қарамай, ўзини назоратчи ёки сув таъминоти ходими сифатида таништириб, аҳолига сувдан қарздорлиги мавжудлиги ҳақида махсус муҳр босилган тўлов қоғозларини тақдим этаётган ва фирибгарлик йўли билан пул ундириб олаётганлар мавжуд.

12 феврал куни АОКАда ўтказилган матбуот анжуманида “Ўзсувтаъминот” АЖ раиси ўринбосари Хуршид Раҳматуллаев ҳолатга муносабат билдириб, ўзини сув таъминоти ходими сифатида таништириб, тўловни нақд шаклда амалга оширишни сўраш ҳозирда ноқонуний ҳаракат ҳисобланишини ва ўша жараёнда тўланган маблағ тизимда қайд этилмаслигини маълум қилди.

“Назоратчига берилган пуллар база ёки абонент ҳисобрақамида кўринмайди, маблағ сув таъминоти компанияси тизимига келиб тушмагани туфайли қарздорлик ўчирилмайди. Шу сабабли, аҳолига фақат расмий тўлов каналлари – банклар, электрон тўлов тизимлари ва махсус бот орқали тўловни амалга ошириш тавсия этилмоқда”, – дейди у.

Масъулга кўра, 2024 йил 1 декабрдан нақд пулда назоратчилар томонидан тўловларни йиғиш ва ичимлик сувдан қарздорлик қоғозларини тарқатиб юриш фаолияти ҳам тўхтатилган. “Ўзсувтаъминоти” АЖ нақд пул шаклида амалга оширилган тўловлар ортидан қарздорлик ўчирилишига кафолат бермаслиги, бу жараёнда абонентлар ҳушёр бўлиб, тўловларни фақат электрон шаклда амалга оширишлари лозимлигини айтди.

“Агар кимдир назоратчи сифатида ўзини таништириб, ноқонуний тўловларни амалга оширишни сўраса, бундай ҳолатларда ишонч рақамларига қўнғироқ қилиб, масъулларни хабардор қилиш сўралади. Ташкилотимиз бундай ҳолатларни текширишга ва фирибгарлик ҳолатларининг олдини олишга тайёр”, – дейди у.

Ҳозирда барча сув таъминоти бўлимлари истеъмолчилар учун махсус ишонч рақамларини ишга туширган. Хусусан, республика бўйича ягона ишонч рақами – 1255, коррупцияга қарши курашиш бўйича ишонч рақами +998 (55) 503 10 55.

Мутасаддининг маълум қилишича, электрон тўлов тизими босқичма-босқич жорий этилган. Охирги икки йил давомида айрим ҳудудларда синов тариқасида жорий этилиб, аҳолига янги тизимга мослашиш учун вақт берилган.

Айни вақтда Telegramʼда @uzsuvbot боти ишга туширилган бўлиб, у орқали истеъмолчилар ўз шахсий ҳисобрақамларини текшириб боришлари мумкин.