Радарлар қайд этган тезликдан 5 эмас, 10 км/соат чегириб ташланиши кутилмоқда

Вазирлар Маҳкамаси тегишли қонун лойиҳасини парламентга киритди. Парламент матбуот хизмати эса ҳали муҳокама ҳам қилинмаган лойиҳани гўёки қабул қилиб бўлингандек хабар тарқатди: “Энди қайд этилган тезликдан 10 км/соат чегириб ташланади”. Ўзбекистонда ҳар йили 2200 дан ортиқ одам автоҳалокатларда ҳалок бўлмоқда, яна минглаб одамлар ногирон бўлиб қоляпти.

Фото: Kun.uz

Ўзбекистон ҳукумати радарлар қайд этган кўрсаткичдан чегириб ташланадиган 5 км/соат тезликни 10 км/соатгача оширишга қарор қилди. Вазирлар Маҳкамаси бу ҳақдаги қонун лойиҳасини парламентга киритган.

Қонунчилик палатаси, бу қонун лойиҳаси эндигина келиб тушгани ва ҳали кўриб чиқилмаганига қарамай, “энди қайд этилган тезликдан 10 км/соат чегириб ташланади”, дея хабар тарқатди.

“Қонун лойиҳаси билан тезлик билан боғлиқ қоидабузарликлар бўйича радар ва спидометрлар кўрсаткичлари хатоларидан келиб чиқиб, қайд этилган тезликдан 10 км/соат чегириб ташланган ҳолда маъмурий жазо қўлланилиши назарда тутилмоқда”, – дейилади палата ахборотида.

Қонунчилик палатаси Telegram-каналидан скриншот

Бу қонун қабул қилиниб, кучга кирса, тезлик 60 км/соат билан чекланган жойда ҳайдовчиларга ҳозиргидек 65 км/соат тезликдан бошлаб эмас, 70 км/соат тезликдан бошлаб жарима қўлланади.

Аввалроқ бундай янгиликни жорий этиш ҳақида ўтган йили июлда бош вазир ўринбосари Очилбой Раматов кўрсатма бергани маълум бўлганди.

Эслатиб ўтамиз, Ўзбекистонда 2023 йилда бошлаб шаҳарлар ҳудудида енгил машиналарнинг максимал тезлиги 70 км/соатдан 60 км/соатга туширилганди. Бу янгиликдан кейин камера ўрнатилган жойларда ЙТҲлар сезиларли камайган.

Ўзбекистонда ҳар йили 2200 дан ортиқ одам ЙТҲлар қурбони бўлади. Яна минглаб одамлар автоҳалокат туфайли майиб-мажруҳ бўлиб қолмоқда.

Аввалроқ камера ва радарга тушганда ёзиладиган жарима баллари 12 баллик ҳисобга қўшилмаслиги маълум бўлганди.

#ЙТҲ #тезлик #ҳайдовчи