3D-принтер ёрдамида босилган темирйўл станцияси олти соат ичида қурилди

Янги конструкцияси 75 йилдан ортиқ вақт давомида хизмат қилган ёғоч станцияси ўрнини эгаллади.

Фото: The New York Times

Японияда олти соат ичида 3D-принтер ёрдамида босилган дунёдаги биринчи темирйўл станцияси қурилди, деб ёзади The Independent.

3D-принтер технологиясидан фойдаланилган ҳолда яратилган дунёдаги биринчи темирйўл станцияси Осака жанубида жойлашган Арида шаҳрида пайдо бўлди. Янги конструкция 75 йилдан ортиқ вақт давомида хизмат қилган ёғоч станцияси ўрнини эгаллади.

Қурилиш ишлари атига олти соат давом этган — ишлар кечаси, охирги поезд жўнаб кетиши ва биринчи поезд келиши оралиғида олиб борилган. Баландлиги 2,6 метр, майдони 9,3 метр квадратга етадиган станция темир-бетондан қурилган. Унинг дизайнида маҳаллий маҳсулотлар рамзи бўлган мандарин ва балиқ тасвирланган.

Лойиҳа Ғарбий Япония темирйўл компанияси (JR West) ва Serendix қурилиш фирмаси ҳамкорлигида амалга оширилди. JR West вакилининг сўзларига кўра, анъанавий қурилиш ишлари икки ойдан ортиқ давом этиши ва икки баробар қимматга тушиши мумкин эди.

Кумамото префектурасидаги заводда 3D-принтер ёрдамида конструкция элементларини босиб чиқаришга етти кун вақт сарфланган. Шундан сўнг улар станция қуриладиган жойга етказилиб, бир кечада йиғилган. Янги станция темир-бетон бинолар стандартларига жавоб берадиган сейсмик бардошлиликка эга.

Асосий бино тайёр бўлсада, чипта автоматлари ва турникетларни ўрнатиш ишлари давом этмоқда. Станция йўловчилар учун 2025 йил июлда очилиши кутиляпти.