Испанияда аёл ногиронлик нафақасини олиш учун 16 йил ўзини соқовликка солиб юргани аниқланди

2003 йилда аёл Андалусиядаги супермаркетда сотувчи бўлиб ишлаган вақтида унга харидорлардан бири ҳужум қилган. Шундан кейин аёлга жароҳатдан кейинги стресс бузилиши ва гапириш қобилиятини йўқотганлик ташхиси қўйилади.

Фото: AP

Ижтимоий таъминот хизмати эса аёлга доимий ногиронлик нафақасини тайинлайди. Ходимнинг жабрланишига сабаб бўлган ҳодиса иш жойида содир бўлганлиги учун тўловлар суғурта компанияси зиммасига юклатилган.

Oddity Central’нинг ёзишича, 2019 йилда суғурта компаниясидагилар аёлнинг тиббий картасини текшираётганда, у 2009 йилдан бери мурожаат қилган шифокорларнинг бирортаси унинг гапира олмаслигини қайд этмаганини сезиб қолади. Аёл 10 йил ичида офталмолог, дерматолог ва бошқа мутахассислар қабулида бўлган. Шифокорларнинг беморнинг ўзига хос хусусиятини қайд этмагани суғуртачиларга ғалати туюлган ва улар шифокорлардан аёлнинг кар-соқовлигини текширишни сўрашган. Руҳшунос ҳам аёлнинг соқовлиги амалда сохталигидан шубҳаланган.

Фирибгарлик бўйича жиноий иш қўзғатиш учун бир шифокорнинг кўрсатмаси етарли бўлмагани учун суғурта компанияси хусусий изқувар ёллаган, у аёлни доимий кузатувга олган. Изқувар эса аёлнинг мунтазам равишда телефонда гаплашишини, хусусан, мактаб дарвозаси олдида оналар билан суҳбатлашишини ҳам аниқлаган. Далилларни янада кўпроқ тўплаш учун изқувар оддий йўловчи қиёфасида “соқов” аёлдан керакли жойга қандай боришни сўраган. Аёл эса йўлни гапириб, батафсил тушунтириб берган.

Суд қарори суғурта компанияси аёлга нафақа тўлашга мажбур эмаслиги ҳақида қарор чиқарган. Аёлга нисбатан фирибгарлик бўйича янги иш очилган. Бундан ташқари, суғурта компанияси 16 йил давомида тўланган пулларни қайтариб олиш учун уни яна судга бермоқчи.

#Испания #ногиронлик