Эрон икки французни "Моссад" фойдасига жосусликда айблади

Теҳрон Франциянинг икки фуқароси Сесил Колер ва Жак Парини Исроил миллий разведка хизмати учун ишлаганликда айблади, деб хабар бермоқда AFP дипломатик манбага таяниб.

Фото: Hasan Mrad / Keystone Press Agency / Global Look Press

Теҳрон жосусликда гумонланиб Эронда уч йилдан ортиқ қамоқда сақланаётган икки француз фуқароси, 40 ёшли Сесил Колер ва унинг шериги 72 ёшли Жак Парини Исроил миллий разведка хизмати - "Моссад" учун ишлаганликда айблади. Бу ҳақда 2 июл, чоршанба куни французларга яқин доиралар ва дипломатик доиралардаги манбага таяниб, AFP агентлиги хабар берди.

Улар жосусликдан ташқари «режимни ағдаришга фитна уюштириш» ва «коррупция»да ҳам айбланмоқда. Ислом Республикасида учта жиноятнинг ҳар бири ўлим билан жазоланади.

«Бу айбловлар, - агар улар ҳали тасдиқланса, - мутлақо асоссиздир», - деди дипломатик манба.

Сесил Колернинг синглиси айтишича, судя ҳар учала айбловни эълон қилган. 1 июл, сешанба куни французларнинг олдига Франциянинг Теҳрондаги элчихонаси муваққат ишлар вакили ташриф буюрди.

Колер ва Пари 2022 йилнинг май ойида Эронда қўлга олинган. Улар Теҳрондаги Эвин қамоқхонасида бир кишилик камерада сақланган. 23 июн куни Исроил қамоқхонага зарба берганидан бери уларнинг жойлашуви ошкор этилмаган.