Reuters нашрининг ёзишича, Узоқ Россия ҳудудида бир неча киши жароҳат олди, Япония шарқий қирғоғидаги кенг ҳудудлар эса эвакуация қилинди. Бу ҳудудлар 2011 йилда кучли зилзила ва цунами оқибатида вайрон бўлган эди.
«Бугунги зилзила жиддий ва ўн йилликлардаги энг кучли тебранишлардан биридир,« деди Камчатка губернатори Владимир Солодов Telegramʼда эълон қилинган видеода.
Фавқулодда хизматларга кўра, Камчатканинг айрим жойларида 3–4 метр баландликдаги цунами қайд этилган. Аҳоли қирғоқдан узоқлашишга чақирилди.
АҚШ Геология хизмати зилзиланинг 19,3 км чуқурликда содир бўлганини ва маркази Петропавловск-Камчатский шаҳридан 119 км жануби-шарқда жойлашганини билдирди. Дастлабки магнитуда 8,0 сифатида қайд этилган, кейинчалик бу кўрсаткич янгиланди ва кучли 6,9 магнитудали такрорий тебраниш ҳам қайд этилди.
Япониянинг об-ҳаво агентлиги 3 метр баландликдаги цунами тўлқинлари кенг қирғоқ ҳудудларига етиб келиши мумкинлигини маълум қилди. Цунами сигнализацияси Япониянинг Тинч океани бўйи шаҳарларида янгради, ҳукумат аҳолини баландроқ жойларга чиқишга чақирди.
АҚШ цунами огоҳлантириш тизими Россия ва Эквадорнинг айрим қирғоқларида 3 метрдан баланд тўлқинлар, Японияда, Гавайида, Чилида ва Соломон оролларида 1–3 метрли тўлқинлар эҳтимоли борлиги айтилди. АҚШнинг Ғарбий қирғоғи ҳамда Тинч океанининг бошқа кўплаб ҳудудларида кичикроқ тўлқинлар кузатилиши мумкин.
Россиянинг соғлиқни сақлаш вазири Олег Мелников ТАСС давлат ахборот агентлигига маълум қилишича, бир нечта одам жароҳатланган.
Россия Фанлар академияси бу ҳудудда 1952 йилдан бери қайд этилган энг кучли зилзила бўлганини маълум қилди.
