"МК" газетаси Озарбойжонни нацистлар Германиясига қиёслади

Россиянинг «Московский комсомолец» газетаси Озарбойжонда рассом Иван Айвазовский ҳайкали бузиб ташланганидан кейин мамлакатни нацистлар Германиясига қиёслади. Нашр «Боку Украинага эргашиб, ёдгорликларга уруш эълон қилди» сарлавҳали мақолани чоп этган бўлиб, унда Қорабоғдаги Айвазовский ҳайкалининг бузилиши ва немис физиги Гейнрих Герцнинг Германияда нацистлар ҳокимиятга келганидан сўнг бюстининг бузилиши ўртасида ўхшашлик келтирилган.

Нашр муаллифи Марина Перевозкинанинг ёзишича, Озарбойжон ТИВ баёнотига қараганда, ёдгорликнинг бузилишига асосий сабаб Айвазовскийнинг арман миллатига мансублиги бўлган. Шу муносабат билан у Карлсруэ университетида Герц ёдгорлиги бузилганини эслади, «у ерда олим ўзининг асосий кашфиётини қилганди — электромагнит тўлқинларнинг мавжудлигини исботлаган».

«Герцнинг келиб чиқиши, нацистлар нуқтайи назаридан, ирқий поклик мезонларига жавоб бермаган: унинг отаси яҳудий бўлган», деб тушунтирди Перевозкина. Унинг эслатишича, «учинчи рейх» ҳокимияти частота бирлигини қайта номлашга ва унга Герц ўрнига Ҳелмголц номини беришга ҳаракат қилган. «Учинчи рейх» йўқ бўлиб кетди, аммо розеткадаги ўзгарувчан токнинг частотаси ҳали ҳам герц билан ўлчанади», дея таъкидлаган материал муаллифи.

Перевозкинанинг қайд этишича, Айвазовскийнинг отаси «XVIII асрда Ғарбий Арманистондан Галицияга кўчиб келган арманлар» авлодидан бўлган ва ёзувларда рассом «Ованес Айвазян номи билан рўйхатга олинган». «Уни Арманистон билан фақат келиб чиқиши, яъни «қони» боғлаган. Лекин баъзилар учун, ҳатто 21 асрда ҳам «қон» ҳамма нарсани ҳал қилади», — дейилади мақолада. Шундан сўнг Перевозкина Германияда нацистлар даврида Ҳейнрих Ҳейннинг китоблари яҳудий бўлгани учун ёқиб юборилганини, «Киевда эса 2013 йил декабр ойидаги Евромайдан пайтида Ленин ҳайкали бузиб ташланганини» эслатиб ўтди.