Ироқда ўғирлаб кетилган Россия-Исроил фуқароси озод қилинди

2023 йилда Ироқда жангчилар томонидан ўғирлаб кетилган Россия-Исроил фуқароси Элизабет Цурков асирликдан озод этилди ва ҳозир АҚШ ҳимоясида, деди 9 сентябр, сешанба куни АҚШ президенти Доналд Трамп. «Хабар беришдан мамнунман, Элизабет Цурков, Принстон талабаси, унинг синглиси АҚШ фуқароси ҳисобланади. У озод этилди ва бир неча ойлик қийноқлардан сўнг ҳозир АҚШнинг Ироқдаги элчихонасида хавфсиз ҳолатда», деб ёзди у Truth Social'да.

Трамп «доим адолат учун курашишини» қўшимча қилди ва Фаластиннинг ҲАМАС ҳаракатидан ҳам Ғазо секторида гаровга олинганларни зудлик билан озод этишни талаб қилди.

Ироқ бош вазири Муҳаммад ал-Суданий Элизабет Цурков озод этилганини тасдиқлади. «Биз яна бир бор тасдиқлаймизки, қонунлар ижроси ва давлат ҳокимиятини қўллаб-қувватлашда юмшоқлик кўрсатмаймиз ҳамда ҳеч кимга Ироқ ва ироқликларнинг обрўсига путур етказишига имкон бермаймиз», — деди у Facebookʼдаги баёнотида.