«Ливерпул»да яна мағлубият, Винисиус «Реал»ни биринчи ўринга қайтарди. Кун ўйинлари
|17:38 / 05.10.202513 52221 мин
«Арсенал» халқаро танаффусга пешқадам сифатида йўл олди, «МЮ»да Аморим истеъфога чиқмайдиган бўлди, «Реал» яна биринчи ўринда. Шанба оқшомида Европа футболида рўй берган асосий воқеалар, ўйинлардаги голлар ва турнир жадвалларидаги вазият.
«Тоттенҳэм» қарши ҳужумга таяниб ўйнади ва биринчи бўлим ўрталарида Тел рикошет орқали мавсумдаги биринчи голини урди. Тўп Стрейкнинг оёғига теккан ҳолда йўналишини ўзгартириб, дарвозабонни доғда қолдирган ҳолда юқори бурчакка бориб тушди. Лекин «шпорлар» муваффақиятни кучайтириш ўрнига босимни сусайтиришди ва «Лидс»га танаффусгачаёқ ҳисобни тенглаштиришга имкон беришди. Викарио Аронсоннинг мураккаб зарбасини қайтарганди, аммо тўпга биринчи бўлиб рақиб ҳужумчиси Окафор етиб келди. «Залцбург»да танилган швейцариялик форварднинг Италияда ишлари юришмаганди, у «Милан»да ҳам, ижара асосида тўп сурган жамоаси «Наполи»да ҳам ўзини кўрсата олмади, аммо Англияга сафар уни очиши мумкин. Фақат Окафорнинг голи натижа учун етарли бўлмади. Иккинчи бўлимда Қуддуснинг зарбасидан кейин ҳам тўп рикошет бўлиб яқин бурчакка бориб тушди ва «Лидс» бир йилдан ошиқ вақтдан буён ўз уйида илк бор мағлубиятга учради. Ўйинга қўшиб берилган дақиқаларда Викарио сейв амалга оширди, бундан ташқари ҳакамлар «Тоттенҳэм» жарима майдони ичидаги қўполлик учун пеналти беришни хоҳлашмади. Натижада «шпорлар» ғалабали ҳисобни сақлаб қолишди ва пешқадамлар гуруҳида қолишди.
Мавсум стартидаёқ Грэм Поттерни истеъфога чиқарган «Вест Ҳэм» клуби Лондон дербиларидаги энг омадсиз жамоа мақомини давом эттирди. Пойтахтнинг бошқа ҳеч бир жамоаси дербиларда ҳамшаҳарларига «болғачилар» каби кўп мағлуб бўлмаган, шанба куни «Эмирейтс»даги муваффақиятсизлик улар учун ҳисоб бўйича 135-мағлубият бўлди. Ўйиннинг биринчи бўлими охирларида «Вест Ҳэм»нинг собиқ футболчиси Райс дарвозабондан қайтган тўпни тўрга жойлаб қўйиб ҳисобни очди. Иккинчи бўлимда эса жароҳатидан тузалиб, формасини тиклаб бораётган Сака АПЛдаги 200-ўйинини гол билан нишонлади. Букайога қадар шундай юбилей ўйинида фақат «Арсенал» афсонаси Тиерри Анри гол уролган. 24 ёшли футболчи энди Англия чемпионатидаги голли ҳаракатлари сонини 100 тага етказиб қўйди (55+45). «Канонирлар» сафида бундай кўрсаткичга ундан эртароқ ёшда фақат Сеск Фабрегас эришган.
«Олд Траффорд»даги ўйиндан олдин Рубен Аморимнинг эҳтимолий истеъфоси ҳақида хабарлар урчиганди, миш-мишларга кўра, шу куни «МЮ» бошқарувидаги 50-ўйинин ўтказган мутахассис ишини сақлаб қолиши учун мавсумни сенсациялар билан бошлаган «Сандерленд»ни мағлуб этиши талаб этиларди. Чемпионшипдан чиққан жамоалар анчадан буён бу қадар кучли старт қила олмаганди («Сандерленд» тур арафасида турнир жадвали пешқадамлари сафида турганди), фақат «қизил иблислар» доимо чемпионшипдан келган жамоаларга қарши муваффақиятли ўйнаган. Жамоа шу куни шундай жамоаларга қарши мағлубиятсиз сериясини 25 ўйинга етказиб олди (+22=3). Ўйинни амалда Маунтнинг тезкор голи ҳал қилди, у жарима майдони марказида туриб Мбемонинг ўнг қанотдан узатмасини қабул қилиб олди ва тўпга иккинчи тегинишда дарвозани ишғол этди. Бруну Фернандеш ҳам шедевр гол уриши мумкин эди, аммо унинг зарбасини дарвозабон тўсин томон йўналтириб юборди, лекин кўп ўтмай бурчак зарбасидан кейин Шешко АПЛда навбатдаги голини урди, меҳмонлар устози эса ҳисоб йириклашиб кетишининг олдини олиш учун яримҳимоячи ўрнига ҳимоячи туширди. «МЮ» иккинчи бўлимда хотиржамлик билан ҳисобни ушлаб қолди ва 2023 йил баҳоридан буён илк бор уй учрашувларида қаторасига учинчи ғалабасига эришди.
Англиянинг амалдаги чемпиони «Ливерпул» бу мавсумни ҳам қаторасига етти ғалаба билан бошлаганди. Аммо сўнгги вақтларда барчаси тескари кетди. Слот шогирдлари саккиз кун ичида АПЛ ва ЕЧЛ доирасида қаторасига уч ўйинда ютқазди.
«Стэмфорд Бриж»даги ўйин стартидаёқ Кайседо турнинг энг чиройли голини уриб, ҳисобни очди. Эдегорлик яримҳимоячиси аввалига бир неча метр масофани тўп билан юриб ўтди, ҳеч ким қаршилик кўрсатмаётганини кўргач эса жарима майдони ташқарисидан туриб тўққизлик томон идеал зарба берди. Жароҳат олиб сафдан чиққан Алисон ўрнига туширилган Мамардашвили тўпга ета олмади ва илк зарбадан гол ўтказиб юборди.
Ҳисобда олдинга чиқиб олганига қарамай, «Челси» ҳимояланмади, аксинча, ҳужумкорликни кучайтирди. Кўпчилик учун кутилмаганда Гарначо алоҳида ажралиб турди. Бошланғич таркибдан ўрин олган аргентиналик вингер бу имкониятдан фойдаланишга қарор қилди ва лондонликлар асосан унинг қанотидан ҳужум уюштирди. У гол ура олмаган бўлса-да, мезбонларнинг биринчи бўлимдаги барча хавфли вазиятлари унинг иштирокида кузатилди.
39-дақиқада Гарначонинг зарбасидан кейин тўп устунга тегди, бу вазиятда тўп дарвоза тўрига боришига бир бахя қолганди. Кейинроқ жарима майдони ичида Собослаи уни жарима майдони ичида ортдан туртиб йиқитди, аммо ҳакам бу ерда қоидабузарлик кўрмади.
Қолаверса, Брэдли Гарначога ишлатилган фол туфайли сариқ карточка олди, бироз ўтиб ушбу ҳимоячи яна унга нисбатан қўполлик ишлатишга мажбур бўлди, натижада Слот танаффусда уни захирага олди ва ўнг қанот ҳимоясига Собослаи ўтди.
Кейин эса майдонда изоҳлаш қийин бўлган воқеалар бўлиб кетди. Гап шундаки, «Челси»да марказий ҳимоячилар билан қандайдир даҳшатли ҳолат юзага келмоқда, асосий таркибдагилар жароҳат туфайли сафдан чиққан: Фофана, Адарабиойо ва Колуилл, дисквалификация туфайли Чалоба ҳам жамоага ёрдам бера олмаяпти. Мареска уларнинг ўрнига Бадяшил ва Ачимпонгни (у жароҳатдан энди тузалаётганди) ҳимоя марказига туширишга мажбур бўлди — уларнинг биринчиси бешинчи вариант, иккинчиси қанот ҳимоячиси ҳисобланади. Аммо иккинчи бўлим бошида улар ҳам бирин-кетин жароҳат олишди ва алмаштиришни сўрашди. Натижада «Челси» ўйинни қанот ҳимоячилари Жеймс ва Ҳатони марказда ўйнатган ҳолда давом эттиришга мажбур бўлди.
«Челси» ҳимоячилари жароҳат олиши оралғида «Ливерпул» ҳисобни тенглаштиришга улгурди. Собослаининг қанотдан узатмасидан кейин Исак техникасини ишга солиб тўпни қабул қилди ва уни қулай позициядаги Гакпога ташлаб берди, нидерландиялик ҳужумчи бир неча метр масофадан туриб дарвозани ўққа тутди. Шундан кейин икки жамоада ҳам ғалаба голини уриб кетиш учун имкониятлар бўлди. Кутилган голлар кўрсаткичи бўйича «Ливерпул» рақибдан анча яхшироқ натижа (0,88 га қарши 1,94) қайд этди. Аммо мезбонларнинг вазиятлари хавфлироқ чиқди, икки марта дарвоза устунлари меҳмонларни голдан қутқариб қолди.
Ва барибир ғалаба голи урилди. 90+5-дақиқада Эстевао Кукурелянинг олис устун томон узатмасини голга айлантирди ва «Челси» футболчилари ғалабани ҳиссиётга берилиб нишонлашди. Ёш бразилиялик футболчи жамоадошлари қучоғида бўғилиб қолай деди, Мареска эса майдонга тушиб кетгани учун иккинчи сариқ карточкани олди. Ўтган дам олиш кунларида «Ливерпул» АПЛ турнир жадвалида беш очколик фарқ билан пешқадамлик қилаётганди, энди эса «Арсенал» биринчи ўринга чиқиб олди.
Испания: Микаутадзе «Сантяго Бернабеу»да ҳам гол урди
ЕЧЛда «Қайрат»ни йирик ҳисобда мағлуб этиш – Мадрид дербисидаги мағлубиятдан кейин оқланиш учун етарли натижа эмасди. Ла лига турнир жадвалида учинчи ўринда келаётган «Вилярреал»ни мағлуб этиш эса бошқа иш. Агар «сариқ субмариналар» ғалаба қозонганида, турнир жадвалида «Реал»ни қувиб ўтиши ҳам мумкин эди.
Марселино Торал жамоаси кутилганидек иккинчи рақамда ўйнаш учун келганди, лекин бу мезбонларнинг агрессив прессингидан қутқара олмасди. Биринчи бўлимда яратилган вазиятлар бўйича мадридликлар яққол устунликка эга бўлишди (12 зарба, xG бўйича 1,13), аммо реализация оқсади. Масалан, Мбаппе Мастантуонони жуда қулай позицияга чиқарганди ва фақат Ренату Вейга вақтида тўп йўлига оёқ қўйиши меҳмонларни голдан қутқариб қолди. Кейин эса меҳмонлар қарши ҳужумда ўз имкониятидан фойдаланиши мумкин эди. Ҳаусен ва Эдер Милитао Олувасейини ўтказиб юборишди, аммо рақиб футболчиси Куртуани алдай олмади.
Бундай ўйинда захира ўриндиғида қолдирилган Микаутадзе ва Пепе «Вилярреал»нинг махфий қуроллари эди. Аммо бу қуроллар иш бергунича «Реал» ҳужумидаги даҳшатли тандем иккита гол уриб улгурганди: мавсум стартидаги ўйинлари учун танқид остида қолган Винисиус Жуниор ўзини кўрсатди ва ўнг қанотдан берилган узатмадан кейин рақиб ҳимоячиси Моуриниони ортда қолдириб, яқин бурчакни ишғол қилди, кўп ўтмай пеналтини ҳам аниқ ижро этди.
73-дақиқада эса Микаутадзе ўйинга интрига қайтарди, аммо 77-дақиқада «Вилярреал»нинг уругвайлик ҳимоячиси Моуринио яна бир бор Винисиус Жуниор билан дуэлни бой берди ва уни йиқитишга мажбур бўлди. Ҳакам унга иккинчи сариқ карточкани кўрсатиб, кийим алмаштириш хонасига жўнатди.
Ўн киши бўлиб қолган «Вилярреал»да имкон қолмаганди, Ҳаби Алонсо жамоаси вазият ортидан вазият яратишга киришди ва 81-дақиқада рақиб жарима майдони яқинида тўп олиб қўйилганидан кейин учинчи гол ҳам урилди. Мбаппе Диас билан девор услубида ўйнаб, майдонни голсиз тарк этмайдиган бўлди. Аммо у майдонни шерикларидан олдинроқ тарк этди, мураббий кичик жароҳат туфайли уни майдондан олишга қарор қилди. Француз ҳужумчисининг жароҳати жиддий эмасди, у майдонни ўзи юриб тарк этди, катта эҳтимол билан, мураббий уни терма жамоа йиғинига жўнатмаслигини шу йўл билан кўрсатиб қўйди.
«Реал» ўйин охиригача жами 26 зарба берди, «Вилярреал»да 9 та (дарвоза соҳасига тўғри борган зарбалар сони бўйича – 7:2). Винисиус Жуниорнинг бенефисига айланган ўйиндаги ғалабадан кейин мадридликлар вақтинча биринчи ўринга кўтарилди ва якшанба куни «Барса» очко йўқотишини кутади.
Мавсумни «Милан» устидан сафарда сенсацион ғалаба қозониш билан бошлаган ва шу вақтгача мағлубиятсиз серия қайд этаётган «Кремонезе»нинг «Сан-Сиро»га иккинчи сафари йирик мағлубият билан якунланди. «Интер» сардори Лаутаро Мартинес 6-дақиқадаёқ ҳисобни очиб, январ ойидан буён илк бор қаторасига иккинчи ўйинда гол урди ва жами голлари сонини 158 тага етказиб олди, энди у нерадзуррилар тарихидаги бешинчи тўпурарга айланиб олди. Аммо бу воқеа Кристиан Киву томонидан илк бор бошланғич таркибга киритилган Бонни кўрсатган ўйин соясида қолиб кетди. Ёзда «Парма»дан харид қилинган 21 ёшли француз майдон эгаларининг барча тўрт голида иштирок этди ва ўз ҳисобига бир гол ҳамда учта голли узатма ёзиб қўйди.
«Бавария»нинг таъқибчилари ўртасидаги кураш «Лейпциг»нинг тезкор голи билан бошланди, 7-дақиқада ижро этилган стандарт вазиятдан кейин Уэдраого тўпни боши билан қулай позицияда турган Баумгартнерга ташлаб берди. Аммо биринчи бўлим ўрталарида «Боруссия» ўзига келди, Гирасси эса жарима майдони ичида очилган Ян Коутуни голли пас билан таъминлади. У бундеслигадаги иккинчи голи билан «Жирона»даги формасини тиклаётганини кўрсатмоқда, ўшанда у Бразилия терма жамоасидан чақирув олганди. Аммо ўйинда бошқа ҳисоб ўзгармдаи ва «Сигнал Идуна Парк»да қайд этилган дуранг ҳисоб «Бавария» учун ҳақиқий совға бўлди.
«Байер» ҳамон Эрик тен Ҳагнинг муваффақиятсиз стартидан кейин қийналмоқда ва Каспер Юлманн вазиятни ўнглаш учун қаттиқ ишлашига тўғри келмоқда. Майдонда эса дарвозабон Флеккендан ҳам кўп иш қилиши талаб этилмоқда, шанба оқшомида ҳам у бир неча бор қутқарди. Аммо биринчи бўлим ўрталарида леверкузенликлар Ҳаби Алонсо давридаги каби намунали қарши ҳужум уюштиришди ва Лукас Васкес майдон чизиғидан Покуга голли пас берди. Иккинчи бўлим бошида эса «Унион» дарвозабони Реннов қўпол хатога йўл қўйди. Даниялик посбон тўпни Кофанега топширди ва у бўш дарвозани ишғол этди. «Аспиринчилар» энди кучли тўртликда, аммо жамоа етакчиларидан бири Грималдо биринчи бўлим охирида майдонни замбилда тарк этгани мухлисларни ранжитди. Испаниялик ҳимоячи бошидан қаттиқ зарба олди.
Чемпионат турнир жадвалининг биринчи ва тўртинчи ўрнида жойлашган жамоалар тўқнашувидан мухлислар шиддатли кураш кутишганди. Ҳисоб 0:1 ҳолатида «Айнтрахт»нинг голи бекор қилинмаганида воқеалар бошқача кечиши мумкин эди, аммо видеотакрорда ҳужум бошида тўп Доаннинг қўлига теккани маълум бўлди. 1-дақиқадаёқ Диасдан гол ўтказиб юборган мезбонлар ўзига келгандек эди, аммо ўша вазиятдан кейин ўйин давом эттирилганида Кейн жарима майдони ташқарисидан йўллаган зарбаси билан иккинчи голни уриб қўйди. Ҳарри бундеслигада рекордлар китобини қайтадан ёзишда давом этмоқда, унгача ҳеч бир футболчи етти турда 11 гол урмаганди. Венсан Компани эса ўзидан олдинги мураббийлар қайд эта олмаган стартга эришди — барча турнирлар доирасида 10 ғалаба. Энди «Бавария» турнир жадвалида энг яқин таъқибчиси бўлиб турган дортмундликларни тўрт очколик фарқ билан ортда қолдирмоқда.
Франция: «Марсел» биринчи ўринда, Де Дзербида – рекорд
«ПСЖ», «Лион» ва «Монако» якшанба куни ўз ўйинларини ўтказгунича Франция чемпионати турнир жадвали пешқадами «Марсел» бўлиб туради. Провансалликлар жамоаси «Метц» майдонидаги ўйиннинг биринчи бўлими голсиз якунлангач, иккинчи 45 дақиқаликда тўлақонли штурм уюштирди, аввалига Гринвуднинг зарбаси тўсинга тегди, кейин эса Игор Пайшао ҳисобни очди. Ҳафта ўртасида ЕЧЛ ўйинида ҳам гол урган бразилиялик футболчининг зарбасидан кейин тўп рикошет бўлиб бориб, дарвозабонни боши берк кўчага киритиб қўйди. Кейин О'Райлли узоқ масофадан йўллаган аниқ зарбаси билан муваффақиятни ривожлантирди, айнан у учинчи голни урган Гуирини қулай позицияга чиқарди. «Марсел» йил бошидан буён камида учта гол уриб ғалаба қозонган ўйинлари сонини 13 тага етказди. Бош мураббий Роберто Де Дзерби эса клуб рекордчисига айланди. У камида 30 ўйинда ишлаган мураббийлар орасида (61) энг кўп ғалаба кўрсаткичига эга. Шанба кунги муваффақиятдан кейин италиялик мутахассис 1993 йилда жамоа билан Чемпионлар лигасида ғолиб чиққан афсонавий Раймон Гуталсни ортда қолдирди.
