«Урушнинг якунига яқинлашдик» – Зеленский Трамп билан учрашувдан кейин

Украина президенти Володимир Зеленский Вашингтонда АҚШ президенти Доналд Трамп билан ўтказилган навбатдаги учрашувда Украина ўз ҳудудларини ихтиёрий равишда топширмаслигини маълум қилган, шундан кейин Трамп урушни ҳозирги фронт чизиғида музлатиш таклифини берган. Шу билан учрашув якунланган, дейилади Reuters хабарида. Трамп музокаралардан кейин журналистлар қаршисида ўз таклифини такрорлаган, Зеленский ҳам бу позицияни маъқуллаган.

Reuters суҳбатдошлари фикрича, Трампнинг позициясига у Зеленский билан учрашув арафасида РФ президенти Владимир Путин билан ўтказган телефон мулоқоти таъсир кўрсатган.

The Washington Post газетаси шанба куни ўша мулоқот чоғида Путин Украинадан Запорижжя ва Херсон областларининг бир қисми эвазига Донецк областини тўлиқ топширишни талаб қилаётгани ҳақида хабар қилганди (хабардан гап Путин ушбу областларнинг босиб олинган қисмидан чекинишга розими ёки шунчаки ушбу областларнинг ҳали Украина назоратида қолаётган қисмига ортиқ даъво қилмаслигини назарда тутганми, буни билиб бўлмайди).

Reuters манбаларидан бири қайд этишича, америкаликлар Зеленскийга 17 октябр кунги учрашувда ҳам айнан шундай алмашувни таклиф этишган. Шу билан бирга, Трамп журналистларга Украина вакиллари билан Донбасснинг топширилиши эҳтимолини «ҳеч қачон муҳокама қилмагани»ни айтди.

Кремлдагилар эса можарони тўқнашув чизиғи бўйлаб музлатиш ғоясини яна бир бор рад этишга улгурди. «Бу мавзу бир неча бор кўтарилган, Россия-Америка алоқалари давомида турли нюанслар билан кўтарилган ва Россия томони ҳар сафар жавобини берган, бу жавоб қандайлиги эса яхши маълум: Россия Федерацияси позициясининг изчиллиги ўзгармайди», – деди Россия президенти матбуот котиби Дмитрий Песков.

Зеленский: уруш якунига қараб бормоқда

«Биз уруш тугаши эҳтимолига яқинлашдик. Мен буни аниқ қилиб айтяпман. Бу унинг аниқ тугашини англатмайди, аммо президент Трамп Яқин Шарқда кўп нарсага эришди ва бу тўлқинда у Россиянинг Украинага қарши урушини тугатмоқчи», – деди Зеленский 19 октябр куни журналистларнинг саволларига жавоб бераркан.

Украина президенти ўз фикрини батафсил тушунтириб бермаган. У фақат дунёда урушни тугатиш учун кучли сиёсий талаб шаклланаётганини таъкидлади. Зеленскийнинг сўзларига кўра, Украина бу кайфиятдан Россияга ҳам ҳарбий, ҳам дипломатик босимни кучайтириш учун фаол фойдаланмоқда.