Қочоқ “куёв”, алданган “келин” ва блогер Sanjik воқеаси: иш судга оширилган

Тошкентда яшовчи Жамила Олимбоева йигити Шаҳзод Рисматовни фирибгарликда айбламоқда: унинг даъво қилишича, Рисматов алдов йўли билан унинг уйини Санжар Каримовга расмийлаштириб бериб, эвазига Каримовдан қарзга пул олган. Санжар Каримов эса уйни эгаларидан 240 минг доллар нақд тўлов эвазига сотиб олганини айтиб чиқди. “Куёв”га қўзғатилган жиноят иши судга чиққан.

{Yii::t(}

Ўтказиб юбориш 6s

Ўтказиб юбориш

Тошкент шаҳрида яшовчи Жамила Олимбоеванинг ижтимоий тармоқлардаги чиқишлари муҳокамаларга сабаб бўлди. Қиз ўз чиқишларида оиласи билан фирибгарлик қурбони бўлганини айтмоқда.

Жамила Олимбоевага кўра, у бўлажак турмуш ўртоғи Шаҳзод Рисматовга ишониб, 2024 йилда оиласи билан уйидан айрилиб қолган.

Олимбоеванинг даъво қилишча, Шаҳзод Рисматов унинг уйини алдов йўли билан Санжар Каримовга расмийлаштириб берган ҳамда эвазига ундан қарзга пул олган.

Санжар Каримов эса уйни нақд 240 минг долларга сотиб олиб, пулни Олимбоеванинг отасига нақд санаб бергани, аслида уларни уйдан чиқариб юбормай бағрикенглик қилганини айтиб чиқди.

Kun.uz'нинг аниқлашича, ҳолат юзасидан Шаҳзод Рисматовга нисбатан қўзғатилган жиноят иши судга оширилган.

“Келин” нима деди?

Жамила Олимбоева ўз чиқишларида Шаҳзод Рисматов билан оила қурмоқчи бўлганини, бироқ у алдаб, қочиб кетганини, оқибатда уйларидан айрилиб қолишганини билдирган.

“2023 йили бошларидан Шаҳзод Рисматов деган бола билан танишганман. Менга бир неча марта совчи жўнатди. Кейин гаплашиб юрганмиз. Ўзини яхши бола сифатида кўрсатарди. 2024 йил 15 сентябрга тўйимизни белгилашди.

Оилада кенжа фарзандман, ота-онам 70 ёшга бориб қолган. Шаҳзодни ўзларининг ўғилларидан ҳам кўпроқ яхши кўришарди. У ўзини “Малика” бозорида ишлайман, у ерда телефон, техникалар тарқатаман, деб кўрсатарди. Мен уйдагиларим билан бу шу ишдан пул топади деб ўйлардик.

Кейин Санжар Каримов исмли одам билан танишиб, ака-ука бўлиб қолишди. Чунки Шаҳзод ўзига ҳар хил қиммат машиналарни сотиб олишни бошлади. Ўша пайтда унда 5 та машина бор эди.

Шаҳзод тўйимизга 25 кун қолганда кайфиятсиз юрди. Сабабини сўрасам, “Менда пул билан муаммо бўляпти”, деб тушунтирди. Кейин дадам Шаҳзодни уйга чақирди”, – дея ҳикоя қилган Жамила Олимбоева.

Унинг сўзларига кўра, отаси бўлажак куёв билан ўтириб суҳбатлашган, йигит тўйни вақтинча тўхтатиб туришни, бошқа чораси йўқлигини айтган. Бунга жавобан келиннинг отаси тўй учун ҳамма ҳозирликлар кўриб қўйилганини, сарф-харажатлар бўлганини, тўхтатиб бўлмаслигини билдирган. Кейин Шаҳзод Рисматов пул билан муаммоси борлигини айтиб, уйларини 12 кун гаровга қўйиб туришга рухсат сўраган.

“Ўша Санжар Каримов менга қарз бермоқчи. Фақат унинг “правила”си бор, “проста так” қарз бермаскан. Унинг номига гаров сифатида мулкингизни қўйишингиз керак экан”, деб айтган. Кейин уйимизни 12 кунга гаровга қўйишни сўраган. Дадам: “Ўзингизнинг уйингиз-чи?” деса, “Менинг уйим жудаям қиммат, уни қўя олмайман. Кейин онам ҳам эшитсалар, нотўғри тушунадилар. Кейин болаларнинг ёнида обрўйимни тўкиб қўйишлари мумкин ҳаммага қўнғироқ қилиб”, деган. Кейин дадам: “Майли, биз сизни ўз ўғлимиздай кўрамиз”, деб розилик берган”, – дея ҳикоясини давом эттирган қиз.

Жамила Олимбоевага кўра, бу воқеадан 1-2 кун ўтиб, ота-онаси, Шаҳзод ва унинг бир ўртоғи нотариусга боришган. У ерга кейин Санжар Каримов ҳам келган. Унинг муомаласи яхши, “қўлида кўксида” бўлган. “Хавотир олманглар, 12 кундан кейин яна нотариусда кўришамиз. Яна уйингизни ўзингларга “оформить” қилиб бераман. Бу фақат гаров сифатида, мени ҳам тўғри тушунинглар”, деган (бу – Олимбоеванинг сўзлари).

Жамила Олимбоева ва ота-онаси нотариусда имзо қўяётган ҳужжатлари гаров эмас, олди-сотди шартномаси эканини кўришган. Аммо Шаҳзод уларни ҳужжатга тезроқ имзо қўйишга ундагани айтиляпти. Шу тариқа, уй расмий равишда олди-сотди шартномаси билан Санжар Каримов номига ўтган. Жамила Олимбоевага кўра, улар нотариусда ҳам, ундан кейин ҳам қўлларига пул олишмаган.

Орадан кўп ўтмай Шаҳзод Рисматов йўқолиб қолган. Кейинчалик унинг қочиб кетгани маълум бўлган.

Қиз бу воқеалардан онасининг сочи бир кунда оқарганини, отаси эса инсулт бўлиб қолганини, кейинчалик Санжар Каримов билан учрашилганида у қўпол муносабатда бўлганини айтмоқда.

“Санжик” ким ва у нима деди?

Санжар Каримов ижтимой тармоқларда “Real Sanjik” номи билан танилган. Айрим манбаларда у таниқли автоблогер сифатида келтирилган. Блогер Жаҳонгир Латипов эса Санжар Каримовни Ўзбекистоннинг энг бой фермерларидан бири деб таништирган.

Жамила Олимбоеванинг чиқишидан сўнг Санжар Каримов ҳам ҳолатга ўз муносабатини билдирди. У ўз изоҳида воқеа иштирокчилари билан таниш эмаслигини ва уларни фақат нотариусда кўрганини айтган.

“Улар менга сотиб олишим мумкин бўлган уй борлигини айтишди. Уй эгасига нақд 240 минг доллар бердим. Оила аъзоларининг ҳаммаси нотариусга борган ва ўзлари рози бўлишган, шартномани синчиклаб кўриб чиқишган.

Бу можарога алоқам йўқ. Уйни ўз пулимга сотиб олдим. Агар уларнинг бизнеси муваффақиятсизликка учраган бўлса, бунинг менга нима алоқаси бор? Мен 240 минг доллар тўлаганман. Мен уйни уларга ёрдам бериш истагида сотиб олдим. Очиғини айтсам, уй унчалик қимматга тортмасди ҳам”, деган Санжар Каримов.

Ижтимоий тармоқларда ўзини Санжар Каримовнинг турмуш ўртоғи сифатида таништирган аёлнинг изоҳи ҳам тарқалди. У Шаҳзод Рисматовни Жамила Олимбоева билан бирга Санжар Каримовни ҳам алдаб кетганликда айблаган.

Иш судга чиққан

Kun.uz'нинг аниқлик киритишича, Мирзо Улуғбек тумани ИИБ 2024 йил 14 октябрда Шаҳзод Рисматовга нисбатан Жиноят кодексининг 168-моддаси 4-қисми “а” банди, яъни жуда кўп миқдорда фирибгарлик бўйича жиноят иши қўзғатган.

Унга сиртдан қамоққа олиш тарзидаги эҳтиёт чораси қўлланган ва қидирувга берилган.

Шаҳзод Рисматов 2025 йил 30 апрел куни чет давлатда (Олимбоеванинг даъвосича, БААда) қўлга олинган. 2025 йил 13 август куни айблов тўлдирилиб, қонуний кўриб чиқиш учун судга юборилган. Шаҳзод Рисматов жами 4 та эпизод бўйича фирибгарликда гумонланмоқда.

Kun.uz жараённинг кейинги тафсилотларини суриштирмоқда.