«Арсенал» яна бурчак зарбасидан гол урди – бу мавсум бошидан буён саккизинчи шундай гол урди, АПЛда бунгача ҳеч бир жамоа дастлабки ўн турда бундай натижага эришмаганди. «Ҳаво қироли» Габриэл Магалянс бу сафар ўзи гол урмади, аммо жарима майдони ичида яккакурашда устун келиб, тўпни дарвоза чизиғи олдида турган Йокерешга етказиб берди. Кўп ўтмай меҳмонлар қарши ҳужумда иккинчи голни уришди, Сака бошлаб берган ҳужумни Йокереш давом эттириб, нариги қанотда очилган Троссарни диагонал узатма билан таъминлади, белгиялик ҳужумчи эса тўпни жарима майдонига етиб келган Райсга етказди ва у ҳам бошда дарвоза тўрини ишғол этди. Шундан кейин Артета шогирдлари тежамкор режимга ўтишди ва ҳисобни сақлаб қолишди. «Канонирлар» бутун октябр давомида дарвозасидан гол ўтказмаганди ва кузнинг охирги ойи ҳам навбатдаги «қуруқ» ўйин билан бошланди. Бу барча турнирлар доирасидаги қаторасига етти ўйинда дарвоза дахлсизлиги сақлаб қолиниши бўлди (барча ўйинларда ғалаба қозонилган, тўплар нисбати 14:0). Қолаверса, Артета шогирдлари АПЛда учинчи марта рақибга ўз дарвозаси соҳаси томон бирорта ҳам зарба йўллашга қўймади.
«Манчестер Юнайтед» АПЛда ғалабали сериясини давом эттира олмади. Аморим шогирдлари бунгача «Сандерленд», «Ливерпул» ва «Брайтон» устидан ғалаба қозонганди, аммо Шон Дайч келганидан кейин яна ишончли ўйнай бошлаган «Ноттингҳэм Форест»га қарши ўйинда бунинг уддасидан чиқилмади.
Аввалига барчаси яхши кетаётганди ва биринчи бўлим Каземиронинг голи эвазига «МЮ» ғалабаси билан якунланди. Аммо Шон Дайч танаффусда ўз жамоасини ўзига келтира олди. Натижада иккинчи бўлим бошидаги бир неча дақиқа ичида мезбонлар 0:1 ҳисобини 2:1 кўринишига ўзгартиришди.
Бўйи у қадар баланд бўлмаган Гиббс-Уайт (171 см) «иккинчи қаватдан» гол уришига унга бу вазиятда ундан ҳам бўйи пастроқ Диалло қаршилик кўрсатгани сабаб бўлди. Кўп ўтмай «ўрмончилар» қанотдан узатма орқали иккинчи голни уришди. Лекин «қизил иблислар» бу билан пароканда бўлиб кетмади ва рақиб дарвозасини қамал қилишга киришди. Аввалига Бруну Фернандешнинг зарбаси устунга борганди, ўйин охирларига бориб Диалло ҳаводаги тўпга тўхтатмай зарба берди ҳамда Селсга ҳеч қандай имкон қолдирмади. 90+4-дақиқада «МЮ» ғалабани илиб кетиши мумкин эди, аммо «Форест» ҳимоячиси Мурилло тўпни дарвоза чизиғи устида тўхтатиб қолди. Шу тариқа, «МЮ»нинг ғалабали серияси тўхтади ва жамоанинг охирги вақтларда танилиб кетган бир мухлиси яна сочини олдира олмайдиган бўлди (у жамоаси қаторасига беш ўйинда ғалаба қозонмагунча, сартарошга бормасликка ваъда берган).
Шанба кунининг марказий баҳси Тоттенҳэм» учун нохуш бошланди. 7-дақиқадаёқ жароҳат туфайли Бергвални алмаштиришга тўғри келди, ўтказиб юборилган гол эса хатолар занжири натижаси бўлди. Кўклар икки марта рақиб жарима майдони атрофида тўпни олиб қўйишди, ван де Веннинг хатоси эса ўйин тақдирини ҳал қилди. Ундан тўпни олиб қўйган Кайседо Жоау Педруни голли пас билан таъминлади. Узоқ давом этган голсиз (7 ўйин) сериясини якунлаган бразилиялик ҳужумчи шу куни яна бир неча гол уриши мумкин эди, аммо унинг биринчи бўлимда яна икки зарбаси дарвозабон томонидан қайтарилди, учинчиси тўсинга борди. Умуман, шу куни Викарио ўйинда сўнгги дақиқага қадар интрига сақланиб туриши учун қўлидан келган барча ишни қилди.
Ҳисоб очилганидан кейин майдонда ҳақиқий жанг бошланди: футболчилар ўзини ҳам, рақибни ҳам аямай фол ишлата бошлади. Аввалига Бентанкур бутсасининг остки қисми билан Жеймснинг оёғига зарба берди ва футболчилар ўртасида жанжал бошланди. Якунда ҳакам «Тоттенҳэм» яримҳимоячисига фақат сариқ карточка кўрсатиш билан чекланди, бунга эътироз билдиргани учун Чалоба ҳам огоҳлантиритлди.
60-дақиқада «Тоттенҳэм» бош мураббийи ўйинни ўзгартиришга (бу вақтга келиб мезбонлар зарбалар сони бўйича 2:10 ҳисобида ортда, сариқ карточкалар сони бўйича 3:1) ҳаракат қилиб, икки футболчини алмаштирди: сариқ карточка олиб улгурган Дансо ва Бентанкур ўрнига Ромеро ва Ришарлисон туширилди.
Ўйинда голли вазиятлардан кўра қўполликлар кўпроқ бўлди. 68-дақиқада Энцо Фернандес ҳам бутсасининг остки қисми билан Палинянинг тиззасига зарба берди. Арбитр бу ерда ҳам сариқ карточка билан кифояланди. VAR бу вазиятга ҳам аралашмади.
Кўп ўтмай Фернандеснинг ўзи жабрланувчига айланди, Спенс унга қарши ўта қўпол ҳаракат қилди. Футболчилар жамоадошлари учун ўч олишга киришиб кетганди. «Тоттенҳэм» ҳисобда ортда бораётганига қарамай, ҳужумда вазиятларга эга бўлмади. Сўнгги 40 дақиқаликда мезбонларда биргина зарба бўлди ва у ҳам дарвоза соҳасига тўғри бормади. Биринчи бўлимда Бергвал ўрнига туширилган Симонс эса ўйин тугамасдан захирага олинди.
Қўшимча дақиқаларда Гиттенс ва Жоао Педро яккама-якка вазиятлардан фойдалана олмади, лекин «Челси» минимал ғалабани сақлаб қолди. Энди Лондоннинг бу икки клуби 17 тадан очкога эга бўлган ҳолда 3 ва 4-ўринларни бўлишиб турибди.
Қайд этиш керакки, Унаи Эмери шу куни ўйин учун нотўғри тактика танлади ва ҳимоядан қисқа паслар билан чиқишга ҳаракат қилди. Ҳолбуки, бунгача АПЛнинг қатор жамоалари мерсисайдликларга қарши узун паслар билан ўйнаб, муваффақиятга эришган, Арне Слотнинг ўзи ҳам бундай услуб жамоа учун муаммоли бўлаётганини тан олганди. Натижада, прессингда кучли бўлган мезбонлар рақиб жарима майдони атрофида тўп олиб қўйиб, бирин-кетин хавфли вазиятлар яратди.
Аввалига бундай совғадан Собослаи фойдалана олмади, биринчи бўлимга қўшиб берилган дақиқаларда эса Эмилиано Мартинес тўпни Салоҳнинг оёқларига ташлаб берди, мисрлик ҳужумчи эса «Ливерпул» сафидаги 250-голни урди. Шунингдек, у АПЛда бир жамоа сафидаги голли ҳаракатлар сони бўйича Уэйн Рунига тегишли рекордни такрорлади. 188 гол ва 88 узатма – энди унда ҳам «МЮ»нинг собиқ юлдузиники каби 276 балл.
Иккинчи бўлимда эса яна рақиб футболчиси қайтариб берган тўпни эгаллаб олган мерсисайдликлар вазиятдан фойдаланишди, Гравенберҳнинг зарбасидан кейин тўп Пау Торресга теккан ҳолда дарвозабонни доғда қолдириб, тўрга бориб тушди. Арне Слот учун ёқимсиз хотиралар қолдирган октябр тугаши билан чемпионатдаги мағлубиятлар серияси ҳам ортда қолди. Аммо жамоа чиндан ҳам инқироздан чиқиб олган олмаганини кейинги ҳафтадаги ўйинлар кўрсатади. ЕЧЛда «Реал» ва миллий биринчиликда «Манчестер Сити»га қарши ўйинлар – жамоа учун чинакамига синов вазифасини ўтайди.
Қаторасига тўрт ўйинда ғалаба қозонган «Райо Валекано» аввалига «сариқ субмариналар»га ҳам жиддий муаммолар туғдирди. Аммо «асаларилар» сафлари рақибнинг кучли прессинги туфайли сочилиб кетди ва бўлим ўрталарида Жерар Морено ҳисобни очди. «Вилярреал» сардори жароҳатдан кейин формасини тиклашда давом этмоқда ва қаторасига иккинчи турда ўз номини таблога ёздириб қўйди. Марселино Торал танаффусда ҳужум чизиғини янгилади ва иккинчи бўлим бошида ўйин масаласи ҳал бўлди. Аввалига Молейро тўпни рақиб жарима майдонига қадар олиб бориб, дарвоза бурчагини аниқ нишонга олди ва ҳисобдаги фарқни оширди, кейин эса Санти Комесаня собиқ жамоадошлари дарвозасига урган голга ассистентлик қилди. «Вилярреал»нинг ўтган мавсумдаги энг яхши тўпурари Айосе Перес якуний натижани ўрнатди, узоқ вақт жароҳатини даволаш билан машғул бўлган ҳужумчи учун бу мавсумдаги илк гол бўлди. Энди «сариқ сумбариналар» камида «Барселона»нинг якшанба куни ўтказиладиган ўйинига қадар турнир жадвалида иккинчи ўринга чиқиб олди ва улар тур якунларига кўра кучли учликни тарк этмаслиги аниқ.
Турнир жадвалининг тўртинчи ўрнида келаётган «Атлетико» ҳам ишончли ўйнашда давом этмоқда ва бу сафар «Севиля» устидан йирик ҳисобда ғалабага эришди. Ўйиндаги ҳал қилувчи вазият Нянзу жарима майдони ичида бутсасининг остки қисми билан Хименеснинг оёғига зарба бериши бўлди. Натижада белгиланган пеналтини Ҳулиан Алварес аниқ ижро этиб, ҳисобни очди. Иккинчи бўлимда эса Жулиано Симеоне прессингда намунали ишлади ва тўпни олиб қўйиб, Алмадени қулай вазиятга чиқарди. Ўйиннинг асосий вақти тугаётганида Гризманн ҳисобни йириклаштирди ва «Метрополитано»га йиғилганлар унинг Ла лигадаги 200-голини нишонлашди. Антуан турнир тарихида бундай нуқтага етган ўн биринчи футболчига айланди (олтинчи хорижлик).
Шу кунларда «Олтин бутса» мукофотини қабул қилиб олган Мбаппе ўйиндан олдин уни стадионга йиғилган мухлисларга намойиш этди. Килианга Ла лиганинг октябр ойидаги энг яхши футболчиси учун мукофот ҳам топширилди. Ва у ноябрни ҳам жуда яхши бошлаб, аввалига пеналтини аниқ ижро этди, кейин эса Арда Гулернинг узатган тўпга ҳаводалигида зарба бериб, ҳисобдаги фарқни оширди. Француз ҳужумчиси биринчи бўлимнинг ўзида ҳет-трикни расмийлаштириши мумкин эди, аммо Каррерас йиқитилгани учун белгиланган пеналтини ижро этиш ҳуқуқини Винисиус Жуниорга топширди. Класикода гол уришни қаттиқ хоҳлаган ва барвақт алмаштирилганидан норози бўлган бразилиялик ҳужумчи барибир мақсадига эриша олмади, меҳмонлар дарвозабони унинг зарбасини осонлик билан бартараф этди. Лекин ушбу дарвозабон бир дақиқа ўтиб Беллингҳэм жарима майдони ташқарисидан йўллаган зарба қаршисида ожиз қолди.
Шу тариқа, ўйин тақдири илк 45 дақиқаликдаёқ ҳал бўлди, Мбаппе эса афсонавий ватандоши Жюст Фонтенга тегишли бўлган рекордни такрорлади. Сўнгги 75 йилликда фақат икки француз клуб сафида бир календар йилида 48 гол уришга эришган. «Сантяго Бернабеу»дагилар дарҳол байрам қилишга киришди, Алонсо яна Винисиусни захирага олди, аммо у бу сафар буни тўғри қабул қилди ва ўз ўрнига туширилган Родригони қаттиқ қучиб қўйиб, мураббийга ҳам қўл берди. Ўйин охирида эса ҳимоячи Каррерас олис масофадан йўллаган ажойиб зарбаси билан Мадриддаги илк голини урди. Қаймоқранглилар ҳафта ўртасида «Энфилд»да кечадиган ўйинга Ла лига пешқадами сифатида йўл олишади.
