«Брюгге» ва «Барселона» мухлислар учун ҳақиқий шоу намойиш этиб беришди – 3:3. Белгияликлар қўшимча дақиқаларда ғалабани илиб кетиши ҳам мумкин эди.
Бу вазиятда Войчех Шченсни негадир рақибни алдаб ўтишга ҳаракат қилди ва тўпни олдириб қўйди – каталонияликлар бахтига Энтони Тэйлорни монитор қаршисига чақиришди, у эса дарвозабонга нисбатан фол қайд этиб, голни бекор қилди.
Бу VAR ўйинга иккинчи бор аралашиши эди: 71-дақиқада Тэйлорни «Барса» дарвозасига белгиланган пеналтини бекор қилиши учун монитор қаршисига чақиришганди. Бу вазиятда Алекс Балде чиндан ҳам фол ишлатмаганди.
Жамоалар ўйиннинг саккизинчи дақиқасидаёқ биттадан гол уришганди: ўшандаёқ ўйин қувноқ ўтиши кўриниб турганди. Якунда белгияликлар уч марта ҳисобда олдинда боришди – ва ҳар сафар каталонияликларни ҳимоя чизиғини жуда юқори жойлаштиргани учун жазолашди.
«Барса» сафида Фернан Торрес ва Ламин Ямал биттадан гол уришди, яна бир вазиятда Ямалнинг жонбозлиги рақиб футболчисининг автоголига сабаб бўлди.
Ханси Флик жамоаси учун ўйин фақат ҳисобда ортда қувиш билан кечди, жамоа фақат омад туфайли сафардан очко билан қайтадиган бўлди.
«Барселона» бунгача ЕЧЛда 17-дақиқагача гол ўтказмаганди, Брюггеда эса тарихий воқеа содир бўлди.
«Манчестер Сити» «Боруссия» Дортмундни йирик ҳисобда мағлуб этди – 4:1. Ортиқча куч ишлатилмади, интригага ўрин қолдирилмади.
Ажабланарлиси, ўйинда ҳисобни очган футболчи Эрлинг Ҳоланд эмасди. Бу сафар Фил Фоден катта саҳнага чиқди – 22-дақиқада жарима майдони марказидан туриб бурчакни аниқ нишонга олди. Аммо етти дақиқа ўтиб Ҳоланд барибир собиқ жамоасини ранжитди: норвегиялик ҳужумчи жарима майдони ичида ёлғиз қолдирилди, у эса буни кечирмайди.
Иккинчи бўлим бошида Фоден дублни расмийлаштирди – ва шу билан ўйин тақдири ҳал бўлди. «Боруссия»да Валдемар Антон урган гол ҳеч нарсага таъсир кўрсатмади, Райан Шерки эса қўшимча дақиқаларда ҳисобдаги йирик фарқни тиклади.
Ҳоланд «Сити»нинг ЕЧЛдаги барча ўйинларида гол урмоқда. Бунгача «Наполи» (2:0), «Вилярреал» (2:0) ва «Монако» (2:2) дарвозаларини ишғол этганди. У голлари сонини бештага етказиб, турнир тўпурарлари рўйхатида Килиан Мбаппе ва Ҳарри Кейнга етиб олди. (Аммо кейинроқ Виктор Осимҳен ҳет-трикка эришиб, рўйхатда биринчи ўринга кўтарилди).
Бу Ҳоланднинг ЕЧЛда 52 ўйинда урган 54-голи бўлди. Ушбу гол машинаси турнир тарихидаги энг яхши тўпурарлар рўйхатида тўққизинчи ўринда: Руд ван Нистелройга етиб олиш учун икки, Томас Мюллерга етиб олиш учун эса учта гол қолган, ўз замондоши Мбаппени олти гол фарқи билан таъқиб этмоқда (француз унга қараганда 40 та кўпроқ ўйинда майдонга тушган).
«Боруссия» ЕЧЛнинг бу мавсумида илк бор тўртта гол уролмади. Бунгача «Юве» билан 4:4, «Атлетик» билан 4:1, «Копенҳаген» билан 4:2 ҳисоблари қайд этилганди.
Олдинда «Сити»ни қийин тақвим кутмоқда: ЕЧЛда «Байер»га қарши ўйиндан олдин АПЛда «Ливерпул» ва «Нюкасл»га қарши кетма-кет ўйнаш керак бўлади. «Боруссия» ЕЧЛнинг кейинги турида «Вилярреал»ни қабул қилади.
«Интер» кутилганидек «Қайрат» билан ўйинда уч очкони қўлга киритди, аммо кутилганидан кўра анча қийинчилик билан.
Қозоғистонликлар жамоа сардори Александр Мартиновичсиз ўйнади – у жароҳатланган. Унинг ўрнига клубнинг яна бир тарбияланувчиси – Александр Широбоков асосий еврокубок баҳсида майдонга тушди.
Меҳмонлар танаффусга голсиз дурангни сақлаб қолган ҳолда йўл олишга яқин эди, аммо 45-дақиқада Лаутаро Мартинес узоқ давом этган ҳужумни гол билан якунлади. Миланликлар олдинроқ ҳисобни очиши мумкин эди, аммо 19-дақиқада белгиланган пеналти VAR томонидан бекор қилинди. Видеоасситентлар бу вазиятда Ян-Аурел Биссек ўзи Офри Араднинг оёғига қоқилганини пайқаб қолишди.
Айнан Арад иккинчи бўлим бошида бурчак зарбасидан ҳисобни тенглаштирди. Бу вақтга келиб Мартинес ўйинни захира ўриндиғидан томоша қилаётганди – мезбонлар сардори танаффусда захирага олинди.
Мураббийнинг бу қарори қимматга тушиши мумкин эди, аммо миланликлар барибир ғалабани илиб кетишди: ҳимоячи Карлос Аугусто ЕЧЛдаги илк голини урди ва бу гол ғалаба келтирди.
«Интер» тўрт турда тўрт ғалабага эришди, аммо илк бор гол ўтказди ва энди турнирда дарвозаси дахлсизлигини сақлаб қолаётган биргина «Арсенал» қолди. Қолаверса, миланликларда тақвим осон эди: инқироз ҳолатидаги «Аякс» билан 2:0, «Славия» билан 3:0, «Юнион»га қарши 4:0 ҳисоблари қайд этилган. Кейинги рақиблар эса даҳшатли: «Атлетико», «Ливерпул», «Арсенал» ва «Боруссия».
Бу «Интер»нинг барча турнирлар доирасидаги олти ўйинда бешинчи ғалабаси бўлди. Жамоа бу оралиқда фақат «Наполи»га ютқазган (1:3).
Кейинги турда «Интер» «Атлетико» майдонига сафар қилади, ундан олдин А Серияда «Милан»га қарши дерби бўлиб ўтади. «Қайрат» эса ички чемпионатни аллақачон якунлаган (титулни ҳимоя қилган), шунинг учун буёғига бор эътиборни ЕЧЛ ўйинларига қаратиш мумкин. Кейинги рақиб – сафарда «Копенҳаген» бўлади.
«Қорабоғ» плей-оффга чиқишни ва ЕЧЛнинг бу мавсумдаги асосий сенсациясига айланишни кўзламоқда. Озарбойжон клуби «Челси»га қарши ўйиннинг 39-дақиқасига келиб аввал ҳисобни тенглаштирди, кейин олдинга ҳам чиқиб олди, ўйиннинг қолган вақтида ҳам лондонликларнинг ҳужумларини муваффақият билан қайтариб турди. Шу куни Мареска қатор муаммоларга дуч келди. Ўтказилган биринчи голда Хато очиқчасига хато қилди, ўйин стартида эса Лавиа навбатдаги марта жароҳат олиб, сафдан чиқди. Белгиялик ушбу футболчи сўнгги икки йил ичида «Челси»да бирорта тўлиқ ўйин ўтказмаган ва тўққиз марта жароҳат олган. Шу билан бирга, мураббий захирадан футболчи туширишда тўғри танлов қилди ва танаффусдан кейин Жоржнинг ўрнига тушган Гарначо жамоани мағлубиятдан қутқариб қолди.
«Қорабоғ» ва «Челси» тўрт турдан кейин еттитадан очко тўплаган. Озарбойжонликлар бунгача «Бенфика» (3:2) ва «Копенҳаген» (2:0) устидан ғалабага эришган. «Атлетик» билан ўйинда ҳам биринчи бўлиб гол уришган, аммо сафар ўйини барибир мағлубият билан тугаган (1:3). Жамоа плей-оффга чиқиш учун яхши имконият ҳосил қилган.
«Қорабоғ» «Челси»га қарши ўйинларда илк бор очко қўлга киритди. 2017 йилда лондонликлар жуда осон ғалабаларга эришганди – 6:0 ва 4:0. Афсонавий Гурбан Гурбанов ўшанда ҳам озарбойжонликлар жамоасини бошқарарди, ўшанда «Челси» дарвозасини қўриқлаган Вилли Кабалеро эса ҳозирда Энцо Марескага ассистентлик қилмоқда.
«Челси» кейинги турда «Барселона»ни қабул қилади, «Қорабоғ» «Наполи» майдонида очко ишлашга уриниб кўради.
АПЛдаги «Нюкасл» ва ЕЧЛдагиси – турли икки жамоа бўлиб кўринмоқда. «Қарғалар»нинг биринчи версияси ички чемпионат турнир жадвалининг иккинчи қисмидан кўтарила олмаяпти, иккинчиси эса асосий еврокубокда топ-8 учун ҳаракат қилмоқда. «Сент-Жеймс Парк»даги ўйинда «Атлетик» ҳам узоқ дош бера олмади – Триппиер жарима зарбасидан тўпни Берннинг бошига етказиб берди ва ҳисоб очилди.
Басклар жавоб қайтариш учун қаттиқ ҳаракат қилишди, вазиятлардан бирида дарвоза устуни мезбонлар жонига ора кирди, аммо умуман олганда, ўйин Эдди Ҳау шогирдлари назоратида эди. Биринчи бўлимда бўш дарвозани ишғол эта олмаган Жоэлинтон танаффусдан кейин барибир ўз мақсадига эришди. «Нюкасл» қаторасига учинчи ғалабага эришди ва олтинчи ўринга кўтарилди.
Мудофаа – «Марсел»нинг кучли томони эмас. Лукманнинг чизиқлар орасидан ўтказган паси ҳам буни яна бир бор эслатди, шу узатмага очилган Крстович эса дарвозабон Рули томонидан йиқитилди. Аммо 11 метрлик нуқтага яқинлашган Де Кетеларе пеналтичилар кушандаси ҳисобланган аргентиналик посбонни алдай олмади. Ушбу дарвозабон Франция чемпионатида бу мавсум уч марта пеналти қайтарган.
Аммо асосий драма ўйин охирида рўй берди. Аввалига «Аталанта» ҳимоячиси Эдерсон жарима майдонида тўпни қўли билан ўйнади – бош ҳакам Хосе Санчес Мартинес эса бу вазиятни инкор қилди. Дарҳол уюштирилган қарши ҳужумда эса Лазар Самаржич узоқ масофадан қайтариб бўлмас зарба йўллаб, бергамоликларга ғалаба келтирди.
«Марсел» футболчилари эътироз билдиришди ва эпизод кўриб чиқилишини талаб этишди. Аммо ҳакам бу фол эмас деб ҳисоблади. Гол инобатга олинди, Де Дзерби эса ҳиссиётларига эрк бергани учун сариқ карточка олди.
Шу тариқа, «Аталанта» навбатдаги дурангдан қутулиб қолди. А Серияда ушбу жамоа 10 турда етти бор рақиблар билан муроса кўчасини танлаган. ЕЧЛда эса ўтган турда «Славия» билан ўйинда ҳам ҳисоб очилмай қолганди, бу сафар сўнгги дақиқларда ғалаба илиб кетилди.
«Марсел»да эса сўнгги беш ўйинда атиги бир ғалаба бор. Ҳолбуки жамоа унга қадар қаторасига беш ғалабага эришганди.
Кейинги турда «Марсел» уйда «Нюкасл» билан ўйнайди, «Аталанта» «Айнтрахт» меҳмони бўлади.
«Бенфика» «Байер»га ҳам ютқазди – Жозе Моуринио олиб келиниши натижаларни яхшиламаяпти.
Ўйиндаги ягона гол 65-дақиқада Патрик Шик томонидан урилди: унинг дастлабки зарбасини Анатолий Трубин қайтарганди, аммо чехиялик ҳужумчи қайтган тўпни барибир бош билан дарвоза тўрига йўллади.
Португаллар жуда кўп вазиятлардан фойдалана олмади: зарбалар бўйича 19:6, дарвоза соҳасига тўғри борган зарбалар бўйича 6:2.
«Бенфика» ЕЧЛнинг тўрт ўйинида тўрт бор мағлуб бўлди. Ҳолбуки жамоа «Нюкасл»дан учралган 0:3 ҳисобидаги мағлубиятдан кейин ўзига келгандек кўринганди: ички чемпионатда икки ўйинда жами 8:0 ҳисобида ғалабага эришилди, кубок ўйинида ҳам 3:0 ҳисобида йирик ғалаба қайд этилди. Аммо Жозе Моуринионинг сеҳри еврокубокда ишламаяпти. «Бенфика» «Аякс» билан бирга бирорта очко тўпламаган икки жамоадан бири бўлиб турибди.
«Байер» эса чемпионатда «Бавария»дан учралган 0:3 ҳисобидаги мағлубиятдан кейин айбини ювди. Бу ЕЧЛдаги илк ғалаба бўлди, бунгача «Копенҳаген» ва ПСВ билан дуранг ўйналган, «ПСЖ»дан 2:7 ҳисобидаги оғриқли зарба қабул қилиб олинганди.
Кейинги турда «Бенфика» ва «Аякс» илк очколар учун баҳс олиб боради, «Байер» – «Манчестер Сити» меҳмони бўлади.
«Аякс» уйда «Галатасарой»га ютқазди – 0:3. Бу кун Виктор Осимҳенга аталди.
Турклар бутун ўйин давомида ҳужумкор ўйин намойиш этиб, голли вазиятлар яратишди, иккинчи бўлимда устунликни голларга айлантиришди.
59-дақиқада Осимҳен Лерой Саненинг узатмасини голга айлантирди. Етти дақиқа ўтиб рақиб қўлига тўп теккани учун белгиланган пеналтини аниқ ижро этди. Кўп ўтмай иккинчи бор 11 метрлик зарбани голга айлантирди, қўшимча дақиқаларда покерга эришиши ҳам мумкин эди, аммо дарвоза устуни бунга халақит қилди.
Осимҳен голлари сонини олтитага етказиб (ярми пеналтидан) ЕЧЛ тўпурарлар пойгаси пешқадамига айланиб олди. У Ҳоланд, Мбаппе ва Кейн каби ҳужумчиларни ортда қолдирмоқда.
«Галатасарой»нинг ишлари яхши кетмоқда: чемпионатнинг ортда қолган 11 турини мағлубиятсиз ўтказди, мавсум бошидан буён фақат ЕЧЛ биринчи турида «Айнтрахт»га ютқазган (1:5). Энди эса турнирда уч ғалабадан иборат серия қайд этмоқда: бунгача «Ливерпул» ва «Буде Глимт» ҳам таслим этилганди.
«Аякс» эса чуқур инқироз ҳолатида. Амстердамликлар сўнгги 10 ўйинда фақат икки ғалабага эришган. ЕЧЛ турнир жадвалида энг охирги ўринда жойлашган: тўрт мағлубият ва 1:13 кўринишидаги тўплар нисбати. Жон Ҳейтинганинг истеъфоси яқин.
Кейинги турни жамоалар ўз уйида ўтказади – «Аякс» ўзи каби бирорта очко тўпламаган «Бенфика»ни, «Галатасарой» – «Юнион»ни меҳмон қилади.
Кипрдаги ўйиннинг биринчи бўлимиад маҳаллий «Пафос» клуби «Вилярреал»нинг ҳужумларига матонат билан бардош берди, иккинчи бўлим эса Люкассеннинг бурчакдан оширилган тўпни дарвозага йўллаши билан бошланди.
Испанлар эса дарвоза соҳаси томон тўғри борган беш зарбадан битта ҳам гол ура олмади, мезбонлар дарвозабони, юзида махсус ниқоб билан тушган Неофитос Михаил Гейенинг яқин масофадан йўллаган зарбасини ҳам қайтарди, қолган вазиятларда 38 ёшли Давид Луис бошчилигидаги мудофаа ишончли ҳаракат қилди.
Шу тариқа, бу мавсум ЕЧЛда дебют қилаётган «Пафос» тарихий ғалабадан кейин очколари сонини бештага етказиб олди. «Вилярреал» эса тўрт ўйинда атиги бир очко билан кифояланган.
Кейинги турда «Вилярреал» «Боруссия» меҳмони бўлади, «Пафос» «Монако»ни қабул қилади.
