Путин Лавровдан норозими? Москвада кадрлар бўйича сигналлар

Россия ташқи ишлар вазири Сергей Лавров, афтидан, мамлакат президенти Владимир Путиннинг назаридан қолган. The Moscow Times шундай хулосага келди: Лавров РФ Хавфсизлик кенгашининг муҳим мажлисида қатнашмади ва G20 саммитида Россия делегациясини бошқармайди. Нашрнинг 6 ноябр куни ёзишича, Путиннинг норозилигига сабаб АҚШ президенти Доналд Трамп билан учрашувнинг ўтказилмай қолгани — бунга эса Россия ТИВ раҳбарининг АҚШ давлат котиби Марко Рубио билан муваффақиятсиз суҳбати туртки бўлган.

Бундан аввал Кремл матбуот котиби Дмитрий Песков Путин аввалгидек делегация раҳбари қилиб Сергей Лавровни эмас, президент маъмурияти раҳбарининг ўринбосари Максим Орешкинни тайинлашга қарор қилганини маълум қилган эди.

5 ноябр куни бўлиб ўтган ва Путин РФ Хавфсизлик кенгашининг доимий аъзолари билан ўтказган мажлисда — унда тўлақонли ядровий синовларга тайёргарликни бошлаш масаласи муҳокама қилинган — Лавров қатнашмади. “Коммерсантъ” манбасининг айтишича, вазир бу йиғилишда “келишилган ҳолда иштирок этмаган”.

Октябр ойи охирида хабар қилинганидек, Оқ уй 21 октябр куни Лавров билан кескин суҳбат ўтказганидан кейин АҚШ давлат котиби Рубио президентга Россия музокараларга тайёрлик кўрсатаётгани йўқлигини айтгани ортидан Трамп ва Путиннинг Будапештдаги саммитини бекор қилган.

Саммит юз бермай қолганидан кўп ўтмай, АҚШ Москва бошлаган Украинадаги урушни тинч йўл билан якунлаш жараёнига “Россиянинг жиддий қизиқиши йўқ”лиги билан изоҳлаб, Россиянинг нефт гигантлари — “Роснефть” ва “Лукойл”га қарши санкциялар жорий этди.