«МЮ», «Арсенал» ва «Бавария» очко йўқотди. Кун ўйинлари
|19:41 / 09.11.202510 12616 мин
Луис Диас йил голини урди, «Арсенал» сентябрдан буён илк бор гол ўтказиб юборди, «Барселона»нинг иккинчи ўрни хавф остида қолмоқда. Шанба оқшомида Европа футболида рўй берган асосий воқеалар, ўйинлардаги голлар ва турнир жадвалларидаги вазият.
«МЮ» мавсумни муваффақиятсиз бошлаган, «Тоттенҳэм» эса Томас Франк бошчилигида, аксинча, анча ишончли ўйнаётганди. Лекин кейин барчаси ўзгариб кетди. Охирги турларда «Юнайтед» яхши натижалар қайд эта бошлади, аввалига истеъфо ёқасига келиб қолган Аморим октябр ойининг энг яхши мураббийи сифатида тақдирланди. «Тоттенҳэм» эса ўз майдонидаги ўйинларда жуда ёмон натижалар қайд этиб, турнир жадвалида пастлаб кетди.
Лондонликлар бу сафар ҳам ўз уйида ишончсиз ҳаракат қилди ва биринчи бўлим ўрталаридан ўтганда ҳимоядан чиқишда тўп йўқотилиши қимматга тушди, сўнгги ўйинларда юқори спорт формасига чиққан Мбемо Амаднинг узатмасини голга айлантирди. У сўнгги беш ўйинда беш гол уриб, бир ассист муаллифи бўлган.
Лекин иккинчи бўлимда манчестерликлар ўйинни ташлаб юборди ва ўз дарвозаси олдида кетма-кет хавфли вазиятлар яратилишига йўл қўйиб беришди. Аморим дарҳол футболчиларни алмаштиришга киришди, аммо бу муқаррар голлардан қутқара олмади. Аввалига «Тоттенҳэм»нинг голи офсайд туфайли инобатга олинмади, аммо бир неча дақиқа ўтиб барибир Тел қарши ҳужумда ҳисобни тенглаштирди. Ўйинга қўшиб берилган дақиқаларда эса Одобернинг узатмасидан кейин Ришарлисон иккинчи голни урди. «Шпорлар» бу голни ғалаба голидек нишонлашди, бразилиялик ҳужумчи қувончдан футболкасини ечиб ташлади ва голни нишонлаш узоқ давом этди.
Аммо бу хурсандчилик узоққа чўзилмади, барча ҳиссиётларини голни нишонлашга сарфлаб юборган мезбонлар диққатни йўқотишди ва сўнгги дақиқада Де Лиҳт бурчакдан узатилган тўпни бошда дарвозага йўллаб, жамоасини мағлубиятдан қутқариб қолди. «МЮ» Аморим бошқарувида илк бор қаторасига беш ўйинда ютқазмаяпти.
«Арсенал» октябр ойи давомида ҳамда ноябрдаги биринчи ўйинда гол ўтказмади. Бу серия барча турнирлар доирасидаги саккиз ўйинда давом этди, аммо «канонирлар»нинг 812 дақиқалик қуруқ серияси мавсум кашфиёти бўлган жамоа майдонида тўхтади. «Сандерленд» классик британча ҳужумда ҳисобни очди: майдон марказида жарима зарбасидан кейин тўп жарима майдонига ошириб берилди, у ерда Мукиеле Баллардни қулай вазиятга чиқарди. Ёш футболчи тўп учун курашда Райсдан устун келди ва қайтариб бўлмас зарба йўллади. Эътиборли жиҳати, гол муаллифи бўлган ушбу ҳимоячи — «Арсенал» академияси тарбияланувчиси ҳисобланади.
Лондонликлар эса бўлим охирида ўта қулай вазиятдан фойдалана олмади, Салибанинг 11 метрлик нуқта атрофидан йўллаган зарбаси тўсин юқорисидан ўтиб кетди. Аммо Микел Артета танаффусда ўйинга ўзгартиришлар киритди ва жамоа иккинчи бўлимда ўйинга тезлик қўшиб, мезбонларни жарима майдонига қамаб ташлади. Меринонинг пасидан кейин Сака яқин бурчакни аниқ нишонга олиб, ҳисобни тенглаштирди. Шундан кейин ҳам меҳмонлар кетма-кет вазиятлар яратишда давом этишди ва бундай вазиятлардан бирида Троссар жарима майдони ташқарисидан туриб, турнинг энг чиройли голларидан бирини урди.
Шундан кейин мезбонлар ҳам тўлиқ куч билан ҳужумга ўтди, лондонликлар ҳисобни сақлаш учун ҳимояланди. Райя икки бор яқин масофадан йўлланган зарбани қайтарди. Агар ғалабали ҳисоб сақлаб қолинганида, у оқшом қаҳрамонига айланган бўларди. Аммо ҳакам томонидан қўшиб берилган дақиқаларда «Сандерленд» Броббининг чалқанча ҳолатда берган зарбаси билан мағлубиятдан қутулиб қолди. Бу эпизодда «Арсенал»нинг ишонган футболчилари уялтирди: аввалига Салиба Баллард билан тўп учун курашни бой берди, кейин Габриэл Магаляйнс позиция танлашда хатога йўл қўйди, Райя эса ўринсиз вазиятда тўпга чиқиб келди ва улгурмади.
Қолган дақиқаларда меҳмонлар барибир ғалабани илиб кетиши мумкин эди, аммо Калафиорининг яқин масофадан йўллаган зарбасини «Сандерленд» посбони қайтариб қолди, қайтган тўпга Мерино томонидан йўлланган зарбадан кейин эса яна ўша Баллард тўпни тўсиб чиқди.
Очко йўқотганига қарамай, «Арсенал» халқаро танаффусга турнир жадвалида яққол пешқадамлик қилаётган ҳолда йўл олди, аммо танаффусдан кейин жамоа учун тақвим қийин кўринишда: «Тоттенҳэм», «Челси» ва «Брентфорд»га қарши дербилар кутмоқда, шунингдек, ЕЧЛ доирасида «Бавария»га қарши ўйин бор.
«Челси» аутсайдерга қарши ўйинда кутилмаганда муаммоларга дуч келди, аммо барибир иккинчи бўлимда лондонликлар «бўрилар»ни таслим эта олишди. Гарначонинг ажойиб узатмаси Гюстонинг дарвозабон ҳудудидан аниқ зарба йўллаши билан якунланди. Бу француз ҳимоячиси учун профессионал фаолиятидаги илк гол эди. Шундан кейин барчаси силлиқ кечди ва ўйин кутилганидек йирик ҳисоб билан якунланди. Кўклар жамоаси энди камида «Манчестер Сити» ва «Ливерпул» ўйини якунигача иккинчи ўринга чиқиб олди.
«Атлетико» учун барчаси осон ва оддий бошланди. Барриос қанотдан тўп оширди, «Леванте» дарвозабони қайтарган тўп эса ҳимоячига теккан ҳолда дарвоза тўридан жой олди. Аммо «матрасчилар» меҳмонлар бурчак зарбаси ижро этганида ўзига ўхшамади ва Ману Санчесга ҳисобни тенглаштиришга йўл қўйиб беришди. Шунинг учун, мезбонлар ғалаба учун қаттиқ меҳнат қилишига тўғри келди. Иккинчи бўлимда барчасини Гризманн ўйинга қўшилиши ҳал қилди. Ушбу тажрибали ҳужумчи майдонга тушганига 28 сония бўлганида Лиорентенинг узатмасини тўпга бир тегинишда голга айлантирди. Энди у ла лигада бир мураббий қўли остида урилган голлар сони бўйича рекорд бор (140). Кейинроқ у Алвареснинг ёрдами билан дублни расмийлаштирди ва ҳисобни ишончли кўринишга келтирди. Меҳмонлар ўйин охирида урган иккинчи гол эса VAR аралашуви билан бекор қилинди.
«Атлетико» очколар сони бўйича «Барселона»га етиб олган бўлса, «Вилярреал» каталонияликлардан иккинчи ўринни олиб қўйди. «Сариқ субмариналар» учун клуб тарихидаги энг яхши тўпурар Жерар Морено жароҳатидан тузалиб сафдан қайтиши муҳим аҳамиятга эга бўлмоқда. Ушбу тажрибали ҳужумчи қаторасига уч турда ўз номини таблога ёздириб қўйди. Шунингдек Молейро ҳам жуда яхши формада. Ушбу яримҳимоячининг навбатдаги голи билан ўйин масаласи ҳал бўлди ва энди жамоа камида «Барселона»нинг 10 ноябр куни «Селта»га қарши ўйини якунига қадар иккинчи ўринда қолади.
«Милан» камида якшанба кунги ўйинлар якунигача А Серияда яққол пешқадам бўлиб олиш имкониятини қўлдан чиқарди (очколар сони бўйича «Наполи» билан бир хил натижа). Ўтган мавсумда россонериларга «Парма» майдонидаги ўйинда битта гол етишмаганди (1:2), бу сафар эса биринчи бўлимда икки гол фарқи билан олдинга чиқиб олиш ҳам ғалабани кафолатлай олмади. Ўйин бошида Салемакерс узоқ масофадан йўллаган зарбаси билан ҳисобни очганди, бўлим ўрталарида Рафаэл Леау пеналтини аниқ ижро этиб, устунликни мустаҳкамлаганди.
Аммо биринчи бўлимга қўшиб берилган дақиқаларда Бернабе айланма зарбаси билан «тўққизлик»ни аниқ нишонга олиб, барчасини ўзгартириб юборди. Танаффусдан кейин эса Дел Прато мувозанатни тиклади. Қолган дақиқаларда меҳмонлар вазиятни ўз томонига оғдира олмади. Миланликлар ўйинни бой бериши ҳам мумкин эди, аммо Пеллегринонинг «иккинчи қават»дан йўллаган зарбасидан кейин тўп устунга тегди. Яна бир вазиятда Меняннинг ўзи қаҳрамонлик кўрсатди. Салемакерс эса рақиб дарвозабонини алдаб ўтиб ҳам бўш қолган дарвозани ишғол этолмади. Ўйин якунидаги энг ёрқин вазият Модричнинг олис масофадан йўллаган зарбаси бўлди, бу вазиятда дарвозабон Судзуки фақат иккинчи уринишда тўпни эгаллаб олди.
«Унион» «Бавария»нинг барча турнирлар доирасида 16 ўйинга чўзилган ғалабали сериясига барҳам берди. Германия чемпионати 10-тури доирасидаги ўйинда мюнхенликлар жорий мавсумда илк бор ҳисобда ортдан қувувчи жамоа ҳолатига тушиб қолди. Штеффен Баумгарт шогирдлари нидерландиялик ҳимоячи Данило Дукининг корнердан урган голи эвазига ҳисобни очди. «Бавария» биринчи бўлимнинг дастлабки 25 дақиқаси давомида бирор марта зарба бера олмади.
Ўйиннинг энг эътиборли вазияти эса биринчи бўлим охирларида, Луис Диаснинг жавоб голи урилганида кузатилди. Колумбиялик ҳужумчи жарима майдонида ташқарига чиқиб кетаётган тўпга етиб борди, шу лаҳзанинг ўзида ўрнидан кўтарилиб, деярли нол бурчакдан зарба йўллади ва дарвозани ишғол қилди.
Бу билан у мавсум голини урди, лекин бу шедевр ўйинда бурилиш ясай олмади. Мезбонлар яна стандарт вазиятдан кейин ҳисобда олдинга чиқиб олишди. Яна Дуки ўзини кўрсатди. Мюнхенликлар фақат қўшимча дақиқаларда мағлубиятдан қутулиб қолишди — Ҳарри Кейн 90+3-дақиқада ҳисобни тенглаштирди. Шу тариқа, Компани шогирдларининг ғалабали серияси тўхтатилди, аммо очко йўқотилганига қарамай, жамоа таъқибчилар билан орадаги фарқни ошириб олди.
Турнир жадвалида иккинчи ўринда бораётган «Лейпциг» сўнгги турларда ўз мухлисларини ғалабаларга ўргатиб қўйган, бу сафар ҳам Диоманде ҳисобни очганида (у қаторасига учинчи турда гол урди), мухлислар навбатдаги ғалабага шубҳа қилмаётганди. Аммо «Ҳоффенҳайм» тезда жавоб голини урди, кейин эса тезкор қарши ҳужум Цоуфал тўпни Лемперленинг бошига етказиб бериши ва меҳмонлар ўзи учун ноодатий ҳолатга тушиб қолиши билан якунланди. Ушбу жамоа мавсум стартидан буён ютқазмаётганди (биринчи турда «Бавария»дан учралган 0:6 ҳисобидан буён). Иккинчи бўлим давомида меҳмонларнинг ҳисобни тенглаштириш учун уринишлари бесамар кетди: Раумнинг зарбаси устунга тегди, қолган вазиятларда дарвозабон Бауманн ишончли ҳаракат қилди. Ўйин охирида эса Премел интригага барҳам берди. Натижада Оле Вернер жамоаси пешқадам «Бавария» билан орадаги фарқни 6 очкога йириклаштириб юборди.
«Боруссия» эса Ҳамбургдаги ўйинда минимал ҳисобдаги устунликни сақлаб қола олмади. Нико Ковач жамоаси сўнгги вақтларда бир гол уриб, ҳисобни ушлашни ғалаба формуласига айлантирганди. Бу олдинги икки турда — «Кёлн» ва «Аугсбург»га қарши иш берганди. Барчаси дортмундликлар қаторасига учинчи ўйинда 1:0 ҳисобида ғалаба қозонишига қараб кетаётганди. Аммо «асаларилар» шу куни гол урилган ҳужумдан бошқа яққол вазиятга эга бўла олишмади, ўйинга қўшиб берилган еттинчи дақиқада эса Кенигсдорффер ҳисобни тенглаштирди. «Боруссия» ҳозирча учинчи ўринни ўзида сақлаб қолаётган бўлса-да, якшанба куни «Штутгарт» очколар сони бўйича қувиб етиши мумкин.
