«Реал» очко йўқотди, «Барса» яқинлашиб олди. Кун ўйинлари
|17:20 / 10.11.202518 36517 мин
«Ливерпул» «Сити»га йирик ҳисобда ютқазиб, амалда чемпионлик пойгасидан чиқди. АПЛда кураш асосан «Арсенал» ва «Сити» ўртасида кечадиган бўлди. Якшанба оқшомида Европа футболида рўй берган асосий воқеалар, ўйинлардаги голлар ва турнир жадвалларидаги вазият.
Фото: Europa Press via Getty ImagesФото: Europa Press via Getty Images
«Сити» ва «Ливерпул» – сўнгги ўн йилликда АПЛнинг янги классикасига айланган. Сўнгги саккиз мавсумдаги чемпионлик титуллари фақат шу икки жамоа ўртасида тақсимланган. Лекин бу мавсумда улар бир-бирини эмас, «Арсенал»ни қувмоқда. Шанба оқшомида лондонликлар дуранг ўйнаб қўйгани «Этиҳад»даги учрашувга қизиқишни янада оширди.
«Ливерпул» ҳафта ўртасида «Реал»га қарши ўйнаган ва номдор рақибга ҳеч қандай имкон қолдирмаган таркибни туширди. «Сити»да эса Чемпионлар лигасидаги бошланғич таркиб билан солиштирганда учта ўзгариш бўлди – Стоунз, Савио ҳамда Рейндерс ўрнини Диаш, Силва ва Шерки эгаллади.
«Сити» ўйинни мезбонларга хос тарзда бошлади. Олдинги чизиқда одатдаги каби Ҳоланд фаоллик кўрсатди, Доку, Силва, Фоден ва Шерки эса унга вазиятлар яратиб беришга ҳаракат қилишди. Шундай вазиятлардан бирини Доку юзага келтирди, у ҳимоячилар хатосидан фойдаланиб, жарима майдонига кириб борди ва пеналти ишлади. Кавана видеотакрордан кейин 11 метрлик нуқтани кўрсатди, аммо бу қарор баҳсли эди. Бу вазиятда белгиялик вингер дарвозабонга урилиб йиқилганидан кейин ҳам тўп мезбонларда қолди, ҳакам ўйинни давом эттиришга қўйиб берди, Бернардунинг кетма-кет зарбалари ҳимоячилар тўсиғидан ўтмади. Шундан кейин эса VAR хонасидагилар Каванани монитор қаршисига чақиришди ва пеналти белгиланди.
Нуқтага яқинлашган Ҳоланд эса 11 метрдан зарба беришда адашди. Лекин у кейинроқ нисбатан мураккаб вазиятдан гол урди. Иккала ҳолатда ҳам барча саволларни Конатега қаратиш мумкин. Биринчи ҳолатда фолни расман дарвозабон Мамардашвили ишлатганди, аммо ундан олдин айнан Конате тўпни рақибга бериб қўйганди. Иккинчи ҳолатда эса франциялик ҳимоячи ҳавода тўп учун курашни Ҳоландга бой берди.
Мавзуга оид
Бўлимнинг қолган қисмида яна бир баҳсли эпизод кузатилди. «Ливерпул» бурчак зарбаси ижро этди, ван Дейк бош билан дарвозани ишғол этди. Аммо ҳакамлар бу голни бекор қилишди. Бунга офсайд ҳолатида турган Эндрю Робертсон тўп йўлида тургани сабаб қилиб кўрсатилди, у тўпга тегинмади, аммо Доннаруммага халақит берган деб топилди.
Ҳолбуки ҳимоячи бу вақтда тўп йўлидан қочишга уринганди, шу билан бирга, дарвозабоннинг йўлини тўсмаганди.
Кўп ўтмай «Ливерпул» иккинчи голни ўтказиб юборди. Таянч яримҳимоячиси Нико Гонсалес Родри услубида гол уриб, ҳисобни мустаҳкамлади. Шундан кейин мезбонлар ҳисобга қараб ўйнаши мумкин эди.
Иккинчи бўлимни «Ливерпул» кескин ҳаракатлар билан бошлади. Қайсидир дақиқаларда мезбонларни жарима майдонига қамаб ҳам қўйди, Ҳоланд ҳам ҳимояда ишлашига тўғри келди, аммо гол урилмади. Шу куни ўйиннинг энг яхши футболчиси бўлган Доку эса қарши ҳужумда учинчи голни уриб, ўйинга амалда нуқта қўйди. Уни шу куни икки киши бўлиб ҳам тўхтата олишмади, у 11 марта дуэлда устун келди, етти марта рақибларни алдаб ўтди, уч марта яққол вазият яратиб берди ва уч марта дарвоза соҳасига тўғри борган зарба йўллади, бу зарбалардан бири голга айланди. Бу гол урилган вазиятда ҳам Конате рақибни ёпа олмади.
Умуман олганда, «Ливерпул» иккинчи бўлимда ёмон кўринмади ва вазиятларга эга бўлди (Салоҳ яккама-якка вазиятдан фойдалана олмади ва тўрт марта офсайдга тушиб қолди), иккинчи бўлимда захирадан тушган Гакпо ҳам ўйинга фаол қўшилди ва хавфли зарбалар йўллади, аммо уч гол фарқини йўққа чиқариш амалда имконсиз эди. Гвардиола бу мавсумда ўз анъаналаридан воз кечган ҳолда тўпни рақибга топшириб, ҳисобга қараб ўйнашни одат қилмоқда ва бу қарор яна ўзини оқлади. Якунда «Сити» ишончли ғалабани сақлаб қолди ва «Арсенал» билан орадаги фарқни тўрт очкогача қисқартирди. Арне Слот жамоаси эса бу мағлубиятдан кейин чемпионлик пойгасига қўшилиши амалда имконсиз ишга айланди – АПЛда мавсум бошидан буён 11 ўйиндан 5 тасида ютқазган мерсисайдликлар турнир жадвалининг 8-ўрнида ва пешқадамдан 8 очкога ортда қолмоқда.
АПЛда якшанба куни барчанинг эътибори «Манчестер Сити» ва «Ливерпул» тўқнашувига қаратилгани тайин, аммо шу куни тур доирасида яна бир кескин қарама-қаршилик бўлиб ўтди. Мавсум стартидаги муваффақиятсизликлардан кейин ўзига келиб олган «Астон Вилла» ўз майдонида бу мавсумни кўтаринки кайфиятда бошлаган «Борнмут»ни қабул қилди. Аммо Ираола шогирдлари «Вилла Парк»да кутилган қаршиликни кўрсата олмади ва ҳисоб биринчи бўлимнинг ўзида йирик кўриниш олиши мумкин эди. Мезбонларнинг кетма-кет ҳужумларида фақат Буэндия ва Онана биттадан гол уришди меҳмонларда ўйинга қайтиш учун имконият сақланиб қолди.
Иккинчи бўлимда қайтиш амалга оширилиши мумкин эди, аммо Эмилиано Мартинес «Борнмут» тўпурари Семенйонинг 11 метрдан берган зарбасини бартараф этди ва жамоадошларини янада руҳлантириб юборди. Баркли дарвозага орқа қилиб турган ҳолда бош билан учинчи голни урди, ўйин охирида Мален Тилеманснинг узоқ масофадан йўллаган зарбасига товони билан тегиниш орқали дарвозабонни доғда қолдирди. Унаи Эмери шогирдлари энди очколари сонини 18 тага етказиб, олтинчи ўринга чиқиб олди, шу билан бирга, тўртинчи ўриндаги «Сандерленд»ни бир, учинчи ўриндаги «Челси»ни икки очколик фарқ билан таъқиб этмоқда. Қаторасига иккинчи ўйинда ютқазган «Борнмут»да ҳам шунча очко бор, аммо қўшимча кўрсаткичлар туфайли жамоа тўққизинчи ўринда жойлашган.
«Реал» бу мавсумда ҳали дуранг ўйнамаганди, аммо якшанба куни «Райо Валекано» майдонида голсиз дурангга имзо чекди. Бир қарашда бу аномалия бўлиб кўринади. Мбаппе ўйиннинг биринчи бўлимида бирор марта зарба бермади, бунақаси жорий мавсум бошидан буён 17 ўйинда кузатилмаганди. Аммо «асаларилар» сўнгги вақтларда «Қироллик клуби» учун энг ноқулай рақиблардан бирига айланиб қолган, ушбу жамоани ўз уйида қаторасига тўртинчи ўйинда ютқазмади (+1=3). Бундан ташқари, улар жорий мавсумда ўз уйида «Реал»га ҳам, «Барселона»га ҳам ютқазмаган ягона жамоадир. Ўтган мавсумда бу ишни фақат «Осасуна» ҳамда «Бетис» уддалаганди.
«Реал» ҳафтани ёмон ўтказди. Мадридликлар аввалига ЕЧЛда «Ливерпул»га ютқазганди (0:1), энди Испания чемпионатида очко йўқотди, натижада «Барселона»ни ўзига яқинлаштириб олди.
Бироз кейин бўлиб ўтган Вигодаги ўйин эса голларга бой бўлди. «Барселона» ҳафта ўртасида ЕЧЛ доирасида «Брюгге»га қарши кечган ўйинда учта гол ўтказиб юборганди (3:3), бу сафар ҳам ҳимоя чизиғи панд берди. Шу билан бирга, бу ўйин арафасида каталонияликлар ҳужум чизиғи янада кучайган, жароҳатидан тузалиб қайтган Левандовски стартдан ўрин олганди. Ушбу полшалик ўйин стартидаёқ пеналтидан ҳисобни очди, аммо бир дақиқа ўтиб мезбонлар ҳисобни тенглаштирди – одатдагидек, меҳмонлар офсайд қопқони қўйишга уриниб, яна жазоланди – Балде офсайд ҳосил қилишда хато қилди. Бўлим охирида Левандовски Рэшфорднинг узатмаси билан дублни расмийлаштирди, аммо бир неча дақиқа ўтиб каталонияликлар ҳимоя чизиғи юқори жойлашгани яна гол ўтказилишига сабаб бўлди – бу сафар де Йонг орқароқда қолиб кетганди. Бўлимга қўшиб берилган дақиқаларда эса Ямал яқин бурчакни аниқ нишонга олиб, «Барса»ни танаффусга ғолиб ҳолда олиб чиқди.
Иккинчи бўлимда Ҳанси Флик жамоаси бошқа гол ўтказмади. Лекин статистика «Барса» учун ёқимли кўринишда эмас, жамоа қатоасига ўнинчи ўйиндирки, дарвозасини дахлсиз сақлай олмаяпти, бу оралиқда 18 гол ўтказиб юборилган. Бу 2013 йил мартидан буён энг ёмон серия (13 ўйин, 21 гол). Ўйиндаги яна бир минус – Френки де Йонг майдондан четлатилиши бўлди, у ўйин охирида иккинчи сариқ карточкани олди. Унгача эса Левандовски ҳет-трик қайд этган ва ғолиб масаласини ҳал қилиб бўлганди. Бу ғалаба эвазига «Барса» турнир жадвалида «Реал» билан орадаги фарқни уч очкога қисқартириб олди.
Шанба куни «Милан» «Парма» билан ўйинда ғалабани қўлдан чиқаргач (2:2), «Наполи» биринчи ўринни ўзида сақлаб қолганди. Аммо Болонядаги мағлубиятдан кейин амалдаги чемпионлар пешқадамликни бой беришди ва россонерилар онлай режимда тўплар нисбати эвазига биринчи ўринга чиқиб олишди. Антонио Конте жамоаси иккинчи бўлим бошида Даллингдан гол ўтказиб юборди, кўп ўтмай Ҳолмнинг ўнг қанотдан узатмасини ҳимоячи Лукуми голга айлантирди ва амалда ўйин тақдирини ҳал қилди. «Болоня» бу ғалаба эвазига «Ювентус»ни қувиб ўтиб, бешинчи ўринга кўтарилди. Ушбу жамоа ғалаба учун уч очко бериш бошланган даврда ҳали бирор марта 11 турда 21 очко тўпламаганди.
Кўп ўтмай «Рома» ўз ўйинида ғалаба қозонди ва «Милан»ни қувиб ўтиб, биринчи ўринга кўтарилди. Жамоа ўз тарихида олтинчи бор 11 турдан кейин 24 очко тўплади. Олдинги ҳолатларнинг барчасида «бўрилар» якунда кучли учликда қолишган, бу сафар эса Жан Пиеро Гасперини жамоа билан скудеттони мақсавд қилмоқда. Бу мавсумда асосан минимал ҳисобда ғалаба қозониб келаётган римликлар «Удинезе» билан ўйинда анъанани бузишди ва икки гол фарқи билан ғалаба қозонишди.
Кун охирида эса «Рома» ҳам пешқадамликни бой берди, энди халқаро танаффус якунигача «Интер» биринчи ўринда қолади. Нерадзуррилар «Рома»ни қўшимча кўрсаткичлар ҳисобига қувиб ўтди. Фақат ЕЧЛда гол ураётган Лаутаро Мартинес эса ички чемпионатда уч ўйинлик қуруқ сериясини якунлаб, тезкор гол билан ҳисобни очди. Иккинчи бўлим бошида эса Димарко ёш ҳужумчи Боннини идеал узатма билан таъминлади ва ҳисобдаги фарқ оширилди.
«Штутгарт» ўйин охирида камбэк қилиб, «Байер»дан тўртинчи ўринни тортиб олди. «Аугсбург»га қарши ўйинда жамоа икки бор ҳисобда ортда қувишига тўғри келди. Биринчи ҳолатда ҳимоячи Миттелштадт пеналтидан гол уриб, ҳисобни тенглаштирди. Иккинчи ҳолатда голни автоматик аниқлаш тизими ёрдамга келди. Фақат техника орқали Ундавнинг бошда йўллаган зарбасидан кейин дарвозабон тўпни дарвоза чизиғини тўлиқ кесиб ўтгачгина қайтаргани аниқланди. Унгача мезбонлар яна бир бор Нюбелнинг хатоси туфайли иккинчи голни ўтказиб юборганди. Аввалига икки голли узатмаси учун мақтов олган кипер қаторасига иккинчи ўйинда ҳимоядан чиқишда ноаниқ узатма билан тўпни рақибга совға қилмоқда. Ўйин охирига келиб тарози палласи исталган томон оғиб кетиши мумкин эди. Аммо меҳмонлар футболчиси ўта қулай позицияда туриб хато зарба берган бўлса, Ундав Штиллернинг узатмасидан кейин олис юқори бурчакни аниқ нишонга олди. 2023/24 йиллар мавсуми бошидан ҳисобланса, ушбу германиялик форвард топ-5 лигалардаги энг сермаҳсул футболчи экани ойдинлашади. У ўтган вақт мобайнида ҳар 106 дақиқада битта голли ҳаракат амалга ошириб келмоқда.
