Ўзбекистон–Малайзия: автомобилсозликда ҳамкорлик имкониятлари кўриб чиқилди

10 ноябр куни инвестициялар, саноат ва савдо вазири Лазиз Қудратов Малайзиянинг миллий автомобилсозлик компанияси Proton Holdings вице-президенти Айнол Азмил бин Абу Бакар билан учрашиб, саноат салоҳиятини мустаҳкамлаш ва янги иш ўринлари яратишга қаратилган қўшма лойиҳалар ҳамда шерикликни кенгайтириш масалаларини муҳокама қилди.

Фото: Инвестициялар, саноат ва савдо вазирлиги

Учрашув давомида томонлар Ўзбекистонда автомобилсозлик йўналишида ҳамкорликнинг амалий йўналишларини кўриб чиқди. Хусусан:

локаллаштириш даражасини ошириш ва маҳаллий қиймат улушини кенгайтириш;
тармоқ учун зарур компонентлар ишлаб чиқаришни йўлга қўйиш;
кадрлар тайёрлаш, сервис ва дистрибуция тармоқларини ривожлантириш;
ҳудудий кооперация орқали янги иш ўринлари яратиш бўйича таклифлар муҳокама этилди.

Маълумот учун, Proton Holdings — Малайзиянинг миллий автомобил бренди бўлиб, 1983 йилда ташкил этилган. Компаниянинг бош офиси Селангор штатида жойлашган.

Томонлар ўзаро манфаатли шерикликни босқичма-босқич кенгайтириш, потенциал инвестиция лойиҳаларини техник-иқтисодий жиҳатдан ўрганиш ва мувофиқлаштириш бўйича келишиб олди.

Тайёрлаган: Отабек Матназаров

#Малайзия #автомобилсозлик #инвестиция #Лазиз Қудратов