Қозоғистон Белгияни, Беларус Данияни тўхтатди. Кун ўйинлари

J гуруҳи

Қозоқлар эшикни қаттиқ ёпиб кетишди

Қозоғистон – Белгия 1:1
Голлар: Сатпаев, 9 (1:0). Ванакен, 48 (1:1)
Қозоғистон: Анарбеков, Алип, Қосим, Вороговский, Каиров, Тапалов (Касабулат, 90+1), Оразов (Жуков, 90+1), Самородов (Караман, 80), Кенжебек (Аширбек, 56), Чесноков, Сатпаев (Свиридов, 56)
Белгия: Селс, Теат, де Винтер, Сейс (Де Кейпер, 80), Кастань, Онана (Тилеманс, 71), Раскин (Верман, 89), Ванакен, Де Кетеларе (Опенда, 71), Доку, Троссар (Салемакерс, 70)
Огоҳлантиришлар: Тапалов, 30. Сатпаев, 47. Каиров, 70. Анарбеков, 84 – Онана, 40
Четлатиш: Чесноков, 77

Белгия ва Қозоғистон ўртасидаги биринчи ўйин мезбонларнинг йирик ҳисобдаги ғалабаси билан якунланганди (6:0). Айнан шу натижадан кейин Али Алиев қозоғистонликлар бош мураббийи лавозимидан бўшатилди, унинг ўрнига иш бошлаган Талгат Байсуфинов бошчилигидаги жамоа эса Лихтенштейнни йирик ҳисобда мағлуб этди (4:0), гуруҳ пешқадамларидан бири Шимолий Македонияга ютқазмади (1:1), энди эса гуруҳнинг асосий фаворитига ҳам жанг таклиф этди.

Белгия Остонага Куртуа, Де Брюйне (жароҳатланган) ва Менесиз (сариқ карточкалари кўпайиб кетган) ташриф буюришди, бош мураббий Руди Гарсия эса дисквалификация туфайли ўйинни трибунадан кузатишга мажбур эди. «Қизил иблислар» нима бўлганда ҳам ЖЧ йўлланмасини расмийлаштиришни сўнгги турга қолдиришни истамасди, лекин уларга икки футболчи тўсқинлик қилди. Биринчиси, «Челси»нинг бўлажак футболчиси, 17 ёшли Достон Сатпаев. У ўйин стартидаёқ майдон марказида тўп эгаллаб олингач, рейд амалга оширди ва Селс қўриқлаётган дарвозанинг яқин бурчагини аниқ нишонга олди. «Қайрат»ни ЕЧЛга олиб чиққанидан кейин машҳур бўлиб кетган дарвозабон Анарбеков эса биринчи бўлимнинг ўзида Ванакен, Троссар, Де Кетеларе ва Кастаннинг хавфли зарбаларини қайтарди.

Иккинчи бўлимда Ванакен барибир уни доғда қолдира олди ва ҳисобни тенглаштирди, аммо дарвозабон шундан кейин ҳам

ҳам қаҳрамонлик кўрсатишда давом этиб, жами 8 бор сейв амалга оширди. Мезбонлар Чесноков майдондан четлатилиб, бир киши кам бўлиб қолганидан кейин ҳам мардонавор ўйнаб, ҳисобни сақлаб қолишди. Натижада Белгиянинг ЖЧ йўлланмасини расмийлаштириши сешанба куни Брюсселда Лихтенштейнга қарши кечадиган ўйинга қолди.

Лихтенштейн – Уэлс 0:1
Гол: Ж. Жеймс, 61 (0:1)
Лихтенштейн: Бюхел, Малин, Геппел, Майер, Зеле (Шлегел, 81), А. Хаслер (Волфингер, 81), Люхингер, Цюнд (Вайссенҳофер, 66), Н. Хаслер, Люк-Нотаро (Пицци, 74), Саланович (Саглам, 46)
Уэлс: Дарлоу, Лоулор, Родон, Дасилва, Уилямс, Ампаду, Ж. Жеймс (Каллен, 77), Д. Жеймс (Колуилл, 65), Томас (Жонсон, 83), Харрис (Брукс, 65), Бродҳед (Кумас, 65)
Огоҳлантиришлар: Н. Хаслер, 45. Люк-Нотаро, 68 – Ж. Жеймс, 63. Кумас, 79. Ампаду, 86

Уэлс 18 бор зарба йўллади, Лихтенштейнда — учта. Шунга қарамай, гуруҳ аутсайдери анча вақтгача бардош берди (дарвозабон Бенямин Бюҳел олти сейв ижро этди) ва дуранг ҳисобни 63-дақиқагача ушлаб турди. Кейин эса уэлсликлар сафидаги Жеймслар кетма-кет хавфли ҳужум амалга оширишди: Дэниел аввалига яқин масофадан туриб йўллаган зарба устунга тегди, бир неча дақиқа ўтиб у қанотдан оширган узхатмани Жордан бир метр масофадан туриб дарвоза тўрига йўллади. Энди Уэлс Кардиффда бўладиган ўзаро ўйинда Шимолий Македонияни мағлуб этиши керак бўлади: очколар сони бўйича ушбу жамоаларда тенглик, аммо тўплар нисбати македонларда яхшироқ. Гуруҳда учинчи ўрин эгаси ҳам Миллатлар лигаси рейтинги эвазига ўтиш ўйинларида қатнашиш имконига эга бўлади, лекин қуръада бундай жамоалар тўртинчи саватчадан ўрин олади.

18 ноябр. Белгия – Лихтенштейн, Уэлс – Шимолий Македония.

E гуруҳи

Де ла Фуэнте дел Боскедан ўтиб кетди

Гуржистон – Испания 0:4
Голлар: Ойярсабал, 11 – пеналти (0:1). Субименди, 22 (0:2). Торрес, 35 (0:3). Ойярсабал, 63 (0:4)
Гуржистон: Мамардашвили, Гогличидзе (Кашия, 46), Лочошвили, Мамучашвили, Гочолеишвили, Меквабишвили (Цитаишвили, 72), Китеишвили, Табатадзе (Квернадзе, 57), Кварацхелия, Давиташвили (Абуашвили, 85), Зивзивадзе (Квилитая, 72)
Испания: Симон, Ляпорт, Кубарси, Кукуреля, Порро (Лиоренте, 46), Субименди, Руис (Барриос, 62), Мерино (Фермин Лопес, 62), Баэна, Торрес (Пино, 80), Ойярсабал (Иглесиас, 71)
Огоҳлантириш: Мерино, 57

Испания Ямал ва Нико Уилямс каби етакчи футболчиларсиз ҳам натижага эришмоқда, бу сафар Гуржистоннинг иккинчи ўрин учун назарий имкониятлари йўқ қилинди. Ойярсабал эса миллий жамоа сафидаги 50-ўйинида пеналтидан тезкор гол урди. 35-дақиқага бориб испанлар ҳисобни йирик кўринишга келтиришди, аввалига Субименди Руиснинг чизиқлар орасидан ўтказган пасига очилиб, ҳисобдаги фарқни оширди, кейин эса Ферран амалда ўйин тақдирини ҳал қилган голни урди. Дарвозабон устуни ва Мамардашвилининг сейвлари бўлмаганида Луис де ла Фуэнте биринчи бўлимни янада йирикроқ ҳисобда якунлаган бўларди. Иккинчи бўлимда ҳам гуржистонликларнинг омади келди ва фақат битта гол ўтказиш билан чекланди, 63-дақиқада тиниб-тинчимас Ойярсабал дублни расмийлаштирди. Ушбу форвард «Қизил фурия»нинг ҳозирги мураббийлар штаби давридаги энг сермаҳсул футболчиси бўлмоқда (15 гол ва 7 узатма). Унинг саъй-ҳаракатлари билан Висенте дел Боске бошқарувидаги жамоа рекорди янгиланди: ҳозирги жамоа 30 (+25=5) ўйиндан буён турнир ўйинларида ютқазмаяти. Энди испанлар Марокашга тегишли рекордни (38 ўйин) янгилашига бел боғлаган.

Испания ҳам худди Англия каби бу сафарги саралаш турнирида битта ҳам гол ўтказмаган (19:0), лекин инглизлардан фарқли ўлароқ, ҳали ҳам ЖЧ-2026 учун йўлланмани расмийлаштирмади. Бунинг сабаби эса Туркия.

Туркия – Болгария 2:0
Голлар: Ҳоқон Чалхонўғли, 18 – пеналти (1:0). Чернев, 83 – автогол (2:0)
Туркия: Угуржан Чақир, Мерих Демирал (Оқойдин, 46), Абдулкарим Бардакчи, Ферди Кадиўғли (Мерт Мўлдур, 61), Зеки Челик (Каан Ойхон, 61, Каразор, 81), Ҳоқон Чалхонўғли, Исмаил Юксек, Арда Гулер (Юсуф Сари, 88), Кенан Йилдиз, Ўғуз Ойдин, Карим Оқтуркўғли
Болгария: Митов, Чернев, К. Димитров, Петров, Георгиев, Груев, Краев (Чочев, 72), Крастев, Русев (Николов, 86), З. Димитров (Петков, 72), Десподов (Минчев, 63)
Огоҳлантиришлар: Абдулкарим Бардакчи, 20. Арда Гулер, 40. Исмаил Юксек, 89 – Георгиев, 64

Чунки бу турда ўз уйида Болгарияни мағлуб этган турклар уч очколик фарқ билан таъқиб этмоқда ва ҳали ҳам гуруҳ жадвалида испанларга етиб олиш назарий имкониятни сақлаб турибди. Ўйиннинг биринчи бўлими ўрталарида Ҳоқон Чалхонўғли ижро этган стандарт вазиятда жонли деворда турган ҳимоячи тўпни қўли билан ўйнади ва белгиланган пеналтини «Интер» яримҳимоячиси одатдаги каби совуққонлик билан аниқ ижро этди. Кейин эса Винченцо Монтелла шогирдлари кетма-кет вазиятларни кўкка совурди ва ўйинда интрига сўнгги дақиқаларгача сақланиб турди. Бу вақт оралиғида мезбонлар дарвозабони Угуржан Чақир ҳам сейв ижро этишига тўғри келди. Бурсада йиғилган мухлислар фақат 83-дақиқада Чалхонўғлининг навбатдаги жарима зарбасидан кейин енгил тин олишди, бу сафар Чернев ўз жамоаси дарвозасини ишғол этиб қўйди. Туркияни амалда ўтиш ўйинлари кутмоқда. «Яничарлар» сўнгги турда сафарда Испанияни мағлуб этса ҳам, тўплар нисбатига кўра иккинчи ўринда қолади. Чунки «Қизил фурия»да бу кўрсаткич «+19», туркларда атиги «+5».

18 ноябр. Болгария – Гуржистон, Испания – Туркия.

C гуруҳи

Барчаси Глазгода ҳал бўлади

Дания – Беларус 2:2
Голлар: Дамсгор, 11 (1:0). Громико, 62 (1:1). Демченко, 65 (1:2). Исаксен, 79 (2:2)
Дания: Шмейхел, Вестергор, А. Кристенсен, Доргу, Р. Кристенсен, Нергор (Фроҳолдт, 70), Ҳейберг, Дамсгор (Биллинг, 90+7), Исаксен (Дрейер, 88), Эриксен (Юлманн, 70), Винн (Биерет, 70)
Беларус: Лапоухов, Бегунов, Забелин, Пархоменко (Хвалко, 42), Эбонг, Яблонский, Печенин, Малашевич, Демченко (Корзун, 68), Громико (Концевой, 78), Лисакович (Барковский, 68)
Огоҳлантиришлар: Печенин, 36. Малашевич, 50. Хвалко, 54. Корзун, 75. Лапоухов, 90

Беларуслар сўнгги беш ўйинда ютқазганидан келиб чиқиб (3:19), Копенҳагендаги ўйин натижаси олдиндан маълумдек кўринаётганди. Қолаверса, беларуслар 12 соат давомида Полша билан чегарада ушланиб қолган ва ўйинга яхши тайёрлана олмаганди. Ўйин стартида Дамсгор узоқ масофадан дарвозани ишғол этгач, мезбонлар ғалабани нишонлашга киришди. Аммо данияликларнинг шундан кейинги уринишлари бесамар кетди, меҳмонлар дарвозабони Фёдор Лапоухов саккизта сейв ижро этди, иккинчи бўлимда, 62 ва 65-дақиқаларда эса барчаси ўзгариб кетди. Аввалига «Қайрат» футболчиси Громико бразилларга хос финт ишлатиб, икки рақибдан ўтиб кетди ва ҳисобни тенглаштирди. Кейин унинг қанотдан узатмасини Демченко голга айлантирди. Мезбонлар бутун куч билан олдинга ташланди, ўйин охиригача жами зарбалар сони 35 тага етди, аммо фақат ҳисобни тенглаштиришга улгуришди. Бу дурангдан кейин скандинавлар иккинчи ўриндан узоқлашиб кета олмади ва барчаси сўнгги турда Глазгода ҳал бўладиган бўлди.

Греция – Шотландия 3:2
Голлар: Бакасетас, 7 (1:0). Карецас, 57 (2:0). Тзолис, 63 (3:0). Доук, 65 (3:1). Кристи, 70 (3:2)
Греция: Влаходимос, Кулиеракис, Рецос, Цимикас, Ваяннидис, Курбелис, Музакитис (Хатзидиакос, 89), Бакасетас, Тзолис (Костулас, 90), Карецас (Масурас, 75), Павлидис (Тетте, 43)
Шотландия: Гордон, Хэнли (Маккенна, 75), Суттар, Робертсон, Хики (Ралстон, 75), Макгинн, Фергюсон, Мактоминай, Доук (Херст, 88), Кристи (Дайкс, 82), Адамс (Шенкленд, 82)
Огоҳлантиришлар: Бакасетас, 66 – Макгинн, 10. Фергюсон, 31. Суттар, 85
Четлатиш: Бакасетас, 84 (иккинчи сариқ)

Грециядаги ўйинда эса ҳеч қандай мотивацияга эга бўлмаган мезбонлар гуруҳ пешқадамлиги учун курашаётган Шотландиянинг оёғидан чалиб қолди. Мезбонлар бутун биринчи бўлим давомида босим уюштиришди ва 42 ёшли дарвозабон, бу мавсумда ҳали бирорта ўйинда майдонга тушмаган Крейг Гордон бир неча ўйинга етгулик юкламага дуч келди. У Вангелис Павлидиснинг кучли зарбасини қайтарди, аммо тўпга биринчи бўлиб етиб келган Бакасетас барибир дарвозани ишғол этди. Ушбу фахрий дарвозабон биринчи бўлим ўрталаригача олти бор сейв амалга оширишига тўғри келди ва эллинлар биринчи бўлимда биргина гол билан чекланишди.

Бўлим охирида мезбонларнинг асосий ҳужумчиси Павлидис жароҳат олганидан кейин ташаббус меҳмонлар томонга ўта бошлади. Бўлимнинг қолган дақиқаларида жавоб голини уриш учун учта имконият бўлди, Мактоминайнинг зарбаси тўсинга борди, Доак эса Влаходимос билан яккама-якка вазиятдан фойдалана олмади. Иккинчи бўлим бошида эса Че Адамснинг зарбасини ҳимоячи Карецас блоклади. Ушбу 18 ёшли футболчи бир неча дақиқа ўтиб жамоасининг иккинчи голини урди ва ўйин қаҳрамони унвонини ўзиники қилди. Яна бир неча дақиқа ўтиб Тсолис ҳисобни йирик кўринишга келтирди ва ўйин тақдири амалда ҳал бўлгандек эди.

Аммо Шотландия таслим бўлмади ва беш дақиқа ичида икки гол уриб, ҳисобни минимумгача қисқартирди. Шотландларда камбэк қилиш учун етарлича имкониятлар бўлди, 84-дақиқада эса Бакасетас иккинчи бор огоҳлантирилгач, греклар бир киши кам бўлиб қолишди. Аммо ҳисоб ўзгармади. Энди биринчи ўринни эгаллаш учун шотландлар уйда Данияни мағлуб этиши керак бўлади.

18 ноябр. Беларус – Греция, Шотландия – Дания.

H гуруҳи

Луческуга Миллатлар лигаси ёрдам беради

Кипр – Австрия 0:2
Голлар: Арнаутович, 18 – пеналти (0:1). Арнаутович, 55 (0:2)
Кипр: Фабиану, Панайоту, Сиелис, Корреа (Андреу, 65), Шиккис, Хараламбус (Куцакос, 82), Кусулос, Ционис (Фоти, 88), Лоизу (Кости, 65), Сотириу, Кастанос (Какуллис, 65)
Австрия: А. Шлагер, Дансо, Линхарт, К. Шлагер (Виммер, 60), Пош, Зайвалд, Лаймер, Баумгартнер (Фридл, 85), Забитцер (Вурмбранд, 90), Шмид (Грюлл, 90), Арнаутович (Грегорич, 60)
Огоҳлантиришлар: Кастанос, 45. Шиккис, 70

Марко Арнаутовични тўхтатиб бўлмаяпти. 36 ёшли фахрий футболчи бир ҳафта олдин Европа Лигасида «Црвена Звезда»га «Лилл» билан ўйинда ғалаба келтирганди (1:0). Биринчи бўлимда у Кристоф Баумгартнер ишлаган пеналтини аниқ ижро этиб, ҳисобни очди. Иккинчи бўлим бошида эса кипрликларнинг сунъий офсайд ҳосил қилишдаги хатосидан фойдаланиб, жамоасининг ҳисобдаги устунлигини мустаҳкамлади. Энди у миллий жамоа сафидаги голлари сонини 47 тага етказиб, миллий рекорд ўрнатди.

Унинг голлари Австрияни 1998 йилдан буён илк жаҳон чемпионатига яқинлаштирди. Бу гуруҳда барчаси икки кундан кейин Венада Боснияга қарши ўйинда ҳал қилинади ва бу ўйинда Ралф Рангник шогирдларини дуранг ҳисоб ҳам қониқтиради.

Босния ва Герцеговина – Руминия 3:1
Голлар: Бирлиджа, 17 (0:1). Жеко, 49 (1:1). Байрактаревич, 79 (2:1). Табакович, 90+3 (3:1)
Босния ва Герцеговина: Васил, Бурнич (Башич, 70), Катич, Мухаремович, Малич (Табакович, 46), Тахирович (Хаджиахметович, 83), Байрактаревич, Баждар (Алайбегович, 46), Мемич, Дедич, Жеко (Гигович, 90)
Руминия: Раду, Раковитан, Гицэ, Кипчу, Рацю, М. Марин, Драгомир (Р. Марин, 75), Ҳожи (Микулеску, 75), Михэйлэ, Ман (Тэнасе, 90+3), Бирлиджа (Дрэгуш, 65)
Огоҳлантиришлар: Катич, 7. Дедич, 36. Мухаремович, 44. Бурнич, 65. Жеко, 75 – Раковитан, 45. Ман, 90
Четлатиш: Дрэгуш, 68

Охирги тур олдидан интригани сақлаб қолиш учун боснияликлар ўз уйида Руминия устидан ғалаба қозониши талаб этиларди. Лекин 17-дақиқада меҳмонлар ҳужумчиси Даниэл Бирлиджа Валентин Михэйлэнинг узатмасини голга айлантириб, ҳисобни очди. Кейин эса Эдин Жеко катта саҳнага чиқиши талаб этилди. «Фиорентина»да ўйнаётган ушбу тажрибали футболчи иккинчи бўлим бошида қанотдан оширилган тўпни дарвоза тўрига йўллади. Иккинчи бўлим давомида меҳмонлар бир киши кам бўлиб қолишди: 65-дақиқада майдонга тушган Денис Дрэгуш 68-дақиқада Николе Катичнинг бошига бутсасининг остки қисми билан зарба бериб, тўғридан тўғри қизил карточка олди.

«11 га 10» форматида Босния ва Герцеговина Руминияни аяб ўтирмади: Эсмир Байрактаревич ўнг қанотдан ҳужум уюштирди ва кучли зарбаси билан дарвозанинг чап тўққизлигини аниқ нишонга олди. Ўйинга қўшиб берилган дақиқаларда эса Харис Табакович якуний ҳисобни ўрнатди. Энди боснияликлар тўғридан тўғри йўлланма учун сўнгги турда Австрияда ғалаба қозониши керак бўлади. Учинчи ўриндаги Мирчи Луческу шогирдлари эса Миллатлар лигасидаги рейтинги эвазига ўтиш ўйинларида қатнашади.

18 ноябр. Австрия – Босния, Руминия – Сан-Марино.

В гуруҳи

Косово ва Швеция ўтиш ўйинларида қатнашади

Швейцария – Швеция 4:1
Голлар: Эмболо, 13 (1:0). Нюгрен, 33 (1:1). Жака, 60 – пеналти (2:1). Ндой, 75 (3:1). Манзамби, 90+4 (4:1)
Швейцария: Кобел, Элведи, Аканжи, Родригес (Мухайм, 70), Видмер, Ридер (Соу, 70), Жака, Эбишер, Варгас (Манзамби, 85), Ндой (Зекири, 90), Эмболо (Фасснаҳт, 85)
Швеция: Йоханссон, Лагербилке, Хин, Свенссон, Ҳолм (Гудмундссон, 50), Челстрем, Айяри (Зенели, 63), Эланга (Форсберг, 78), Бернҳардссон (Лидберг, 78), Нюгрен, Сванберг (Исак, 63)
Огоҳлантиришлар: Ндой, 36 – Айяри, 18. Челстрем, 51. Йоханссон, 58. Форсберг, 90

Шведлар дастлабки беш турда атиги бир очко қўлга киритди, бу эса Йон Дал Томассонинг истеъфосига олиб келди. Унинг ўрнини Грэм Поттер эгаллади, аммо у ўз дебютида асосий форвардлар хизматларидан фойдалана олмади – Йокереш жароҳатда, Исак эса формасини тиклашда давом этаётгани туфайли захира ўриндиғида қолдирилган. Гуруҳ пешқадами Швейцария йирик ҳисобда ғалабага эришди. Ҳолбуки 60-дақиқага қадар ҳисоб тенг эди: Брил Эмболонинг голига биринчи бўлимнинг ўзида Бенямин Нюгрен жавоб қайтарганди. Иккинчи бўлимда Александер Исак захирадан ўйинга қўшилди, аммо бу жамоани муқаррар мағлубиятдан қутқара олмади: аввалига Гранит Жака пеналтидан иккинчи голни урди, қолган дақиқаларда Дан Ндой ва Йохан Манзамби ҳисобни йириклаштиришди.

Швейцария беш ўйинда 13 очко тўплаган, аммо ҳозирча худди испанлар каби йўлланмани расмийлаштирмади: асосий таъқибчи Косово уч очколик фарқ билан таъқиб қилмоқда, аммо тўплар нисбатидаги фарқ жуда катта (+11). Швеция эса Миллатлар лигаси орқали ЖЧ-2026 учун йўлланма олишга ҳаракат қилади.

Словения – Косово 0:2
Голлар: Аслани, 6 (0:1). Карничник, 64 – автогол (0:2)
Словения: Облак, Бийол, Дркушич, Брекало, Янжа (Стоянович, 46), Карничник, Хорват (Вербич, 82), Элшник, Горенц-Станкович (Петрович, 46), Шпорар (Градишар, 66), Випотник (Штурм, 76)
Косово: А. Ррахмани, Галлапени, Хайдари, Саипи, Деллова, Реджбечай (Хўжа, 65), Авдуллаху, Муслия (Яшари, 89), Войвода (А. Ррахмани, 76), Асллани (Красничи, 76), Муричи (Рашица, 89)
Огоҳлантиришлар: Стоянович, 47. Штурм, 81 – Деллова, 74
Четлатиш: Стоянович, 53 (иккинчи сариқ)

Параллел ўйинда Словения ўз уйида Косовога ютқазди ва гуруҳда интрига сақланиб қолишига сабабчи бўлди. Аввалига «Ҳоффенҳайм» ҳужумчиси Фисник Аслани тезкор гол билан ҳисобни очди, иккинчи бўлим бошида ҳужумни кучайтириш учун захирадан ўйинга қўшилган Стоянович эса саккиз дақиқа ичида икки бор сариқ карточка олиб, мезбонларни қийин аҳволга солиб қўйди. Шундан кейин Облакнинг кетма-кет сейвларини Карничникнинг автоголи йўққа чиқарди. Косово иккинчи ўринда, аммо юқорида айтилганидек, биринчи ўринга чиқиб олиш амалда имконсиз иш. Косоволиклар сўнгги турда ўз уйида Швейцарияни мағлуб этиши мумкин, аммо тўплар нисбатига кўра етиб ололмайди.

18 ноябр. Косово – Швейцария, Швеция – Словения.