2025 йил 1 январдан бошлаб Ўзбекистонда мобил алоқа операторлари акциз солиғидан озод қилинган эди. Солиқ юки сезиларли камайганига қарамай, компаниялар нархни оширишдан тўхтамаяпти. Эътирозлар фонида Рақобат қўмитаси текширув бошлади. Мижозлар кераксиз хизматларга мажбурлашни тўхтатиш ва лимити кам бўлса-да арзонроқ тарифлар ҳам бўлиши кераклигини айтмоқда.
Ноябр ойи ўрталарида Ўзбекистондаги бир нечта йирик уяли алоқа компаниялари 1 декабрдан эътиборан тарифлар қимматлашишини маълум қилди, бу эса жамоатчилик орасида эътирозларга сабаб бўлди.
Операторлар баёнотига кўра, нархларни кўтариш – “хизмат сифатини яхшилаш” ва “тармоқни кенгайтириш” учун зарурати билан боғлиқ.
Фойдаланувчилар эса амалдаги тариф нархларининг ўзи ҳам кўрсатилаётган алоқа ва интернет сифати билан мос эмаслигини таъкидлаб, танқидий изоҳлар қолдирган.
Шундан сўнг Рақобат қўмитаси ўрганиш ишларини бошлади. Агар компаниялар ўзаро келишган ҳолда нарх ошираётганига ишора қилувчи аломатлар аниқланса, тегишли чоралар кўрилади.
Мазкур хабарлар фонида Kun.uz'га ҳам истеъмолчилар ўз талабларини акс эттирган ҳолда кўплаб мурожаатлар юборди. Уларда энг кўп кўтарилган масалалар ҳақида тўхталамиз.
Арзон таърифлар керак
Айни пайтда энг оммабоп компанияларда мавжуд тарифингизни ўзгартирмоқчи бўлсангиз, энг арзон таклифлар 35-60 минг сўмдан бошланади. Компанияларнинг айримларида арзонроқ вариантлар ҳам йўқ эмас, лекин бунинг учун сиз имтиёзли тоифадаги фуқаро бўлишингиз ёки янги сим-карта харид қилишингиз керак. Мурожаатчилар эса хоҳлаган пайтда уланиш имкони бўладиган 15-20 минг сўмлик базавий таъриф режалар бўлиши зарурлигини айтмоқда.
“Мен 6 йилдан бери UzMobile сим-карта ишлатаман. Айни пайтдаги таъриф режам – Mobile Mini. Ойига 45 минг сўм тўлайман. Шу билан бирга, Uztelecom'нинг Wi-Fi хизматини ҳам уйимга улаганман. Мажбурман, чунки мобил интернет сифати жуда ёмон. WiFi учун ойига 150 минг сўм тўлайман. Бир муддат олдин нархлар ошди, олдин 132 минг сўм эди. Ишхонада ҳам Wi-Fi бор, шу сабаб мобил интернет трафик деярли сарфланмайди. Тариф режа орқали менга тақдим этилган умумий лимитларнинг 10 фоизидан ҳам фойдаланмайман, имкон бўлганда 10-15 минг сўмлик арзонроқ тарифга ўтган бўлардим”
