Toyota етакчи, BYD шиддат билан яқинлашмоқда: дунё автобозори рейтинги

2025 йилнинг биринчи ярим йиллигида Toyota яна катта фарқ билан ишончли етакчиликни қайтариб олди, бир қатор Осиёдаги ишлаб чиқарувчилар эса топ-15 таликдаги мустаҳкам ўрнини сақлаб қолди. Янги инфографика ҳар бир бренд натижаларини кўрсатиб, сотув ҳажмларини ва йиллик ўсиш суръатларини таққослайди.

Кузатилган муҳим тенденциялардан бири сифатида, аввало BYD ва Geely каби Хитой ишлаб чиқарувчиларининг мустаҳкамланиши қайд этилмоқда. Улар ички бозорда ҳам, халқаро бозорларда ҳам фаол кенгаяётгани боис, жадал ўсиши Европанинг ва Японияннинг бир қатор анъанавий брендлари кўрсаткичларида кузатилаётган пасайиш билан кескин қарама-қарши позицияни ташкил қилади. Инфографика учун маълумотлар автосаноат таҳлилчиси Фелипе Мунос томонидан тақдим этилган бўлиб, у автоконцернларнинг расмий ҳисоботлари ва дунё миқёсида енгил автомобиллар бозори бўйича баҳоларга таянади. Статистикага ҳам ички ёниш двигателига эга, ҳам электромобиллар киритилган.

BYD дунё бўйича тўртинчи ўринни эгаллаб, икки миллиондан бироз ортиқ автомобил сотди ва шу билан бирга 31 фоизлик катта йиллик ўсишга эришди — бу кўрсаткич бошқа йирик брендлардан анча устундир. Жорий динамика сақланиб қолса, экспертлар BYD 2025 йил охирига бориб Ford’ни ортда қолдиришини кутмоқда.

Бундай ўсиш Хитой электромобил бозорининг портлаш даражасидаги ривожланишини, шунингдек, BYD’нинг айниқса Европа ва Лотин Америкасидаги фаол халқаро экспансиясини акс эттиради.

Қатор танилган маркалар сотув ҳажмларининг пасайишини кўрсатди — улар орасида Honda, Nissan, Mercedes ва Audi бўлиб, ҳар бири 2 фоиздан 7 фоизгача йўқотиш қайд этган. Европа премиал брендлари ҳам асосий ҳудудларда талабнинг сусайиши шароитида бозор улушининг бир қисмини бой берди. Шу орада Hyundai, Kia ва Chevrolet мўътадил ўсиш намойиш этди.

Toyota эса 2025 йилнинг биринчи ярим йиллигида 4,73 миллиондан ортиқ автомобил сотиб, рақобатчиларининг кўпчилигига нисбатан икки баробар кўп натижа қайд этди. Бу йиллик ҳисобда 6 фоизлик ўсишга тўғри келади ва Toyota’нинг Шимолий Америкадан тортиб Осиёгача бўлган бозорлардаги мустаҳкам позициясини яна бир бор тасдиқлайди. Тармоқда электрификация жараёни давом этаётганига қарамасдан, кенг моделлар қатори ва глобал миқёсдаги йирик ишлаб чиқариш ҳажмлари Toyota’га ўз етакчилигини ишонч билан сақлаб қолиш имконини бермоқда.