Дилафруз Собирова Фарғона шаҳридаги Президент мактабининг 11-синф ўқувчиси. IELTS’дан 8, SAT имтиҳонидан 1540 баллни қўлга киритган, немис тилидан Multilevel имтиҳонида ҳам B2 даражани эгаллаган. У Ҳарвард университетига 100 фоизлик грантни қўлга киритиб интеграциялашган биология йўналишига қабул қилинди. Қаҳрамонимиз Kun.uz’да эълон қилинган Гўзалхон Ҳайдарова ҳақидаги видеоматериални кўриб илҳомланиб орзусига эришгани ҳақида сўзлаб берди.

Дилафруз Собирова президент мактабида эко-қўмита сардори, Янги Ўзбекистон университети томонидан ташкилланган Hogwarts ёзги оромгоҳи қатнашчиси, Breakthrough Junior Challenge Top 30%даги видео соҳибаси, Hippo халқаро инглиз тили олимпиадаси 2022-2023 ярим-финалисти ва инглиз тили олимпиадасининг вилоят босқичи ғолибаси бўлган экан.

Гўзалхон Ҳайдарованинг интервюси ҳаётимни ўзгартирди...

Мен Ҳарвард университетининг интеграциялашган биология йўналишига 100 фоиз грант билан қабул қилиндим. Фарғона шаҳридаги президент мактабида ўқиётган пайтимда наманганлик Гўзалхон Ҳайдарова Ҳарвардга ўқишга кирибди, деган хушхабарни айтишганди бизга. У бу муваффақиятга қандай эришгани ҳақида Kun.uz сайтига интервю берган экан. Ўшанда 168 нафар ўқувчини йиғиб, ана шу интервюни қўйиб беришганди. Айнан шу видеони кўриб (ўша пайтда 8-синф ўқувчиси эдим) мен ҳам Ҳарвардга кираман, деб ичимда орзу пайдо бўлганди. Шундан сўнг Telegram’даги профилимга Ҳарвард университетининг расмини қўйганман. Ўшандан бери ҳали ўзгартирганим йўқ. Аллоҳ насиб қилган экан икки йил ўтиб, ўша университетга қабул қилиндим. Бугун эрталаб соат 5:00 да чиқди натижалар.

Дилафруз Собирова

Натижалар чиққач устозим Jons Hopkins университети талабаси Бобур Бахтиёров табриклагани келди. Натижалар чиқишини ҳаммасиз интиқ бўлиб кутаётган эдик. Натижани кўриб ўзимни назорат қила олмадим, кўзимга ёш келиб кетди-да. Шунча йил кутган нарсам худди ишониб бўлмайдиган тушга ўхшар эди-да. Тушда ҳам шунақа бўлиши мумкин-ку, балки туш кўряпман деб ўйладим. Кейин йўқ, ҳаммаси ҳақиқат экан...