“АҚШга Гренландия зарур” - Трамп

АҚШ президенти Доналд Трамп АҚШга Гренландия ороли зарурлигини айтди.

"Гренландия бизга жудаям керак", - деди у Atlantic журналига берган интервюсида.

Унинг қўшимча қилишича, бу орол "Россия ва Хитой кемалари билан қуршаб олинган".

“У бизга мудофаа учун зарур”, - деди АҚШ президенти.

Трамп ўзини ўзи бошқарувчи Гренландия АҚШ таркибига кириши кераклигини кўп айтган. У бунга оролнинг стратегик аҳамияти ва минерал ресурсларини асос қилиб кўрсатади.

21 декабр куни Доналд Трамп Луизиана штати губернатори Жефф Лендрийни Гренландия бўйича махсус элчи этиб тайинлаганини эълон қилганди.

2,1 миллион километр квадратдан ортиқ майдонга эга Гренландиянинг қарийб 80 фоизини музликлар эгаллаган. Аҳолиси 56 минг кишидан кўпроқ. Даниянинг собиқ мустамлакаси бўлган Гренландия 2009 йилги келишувга кўра, мустақиллик эълон қилиш ҳуқуқига эга. Бироқ ҳозирча балиқчилик ва Дания субсидияларига катта даражада боғлиқ.