Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
Трамп Гренландиядан «воз кечдими?»
АҚШ президенти Доналд Трамп Гренландияни эгаллаб олиш учун босим воситаси сифатида божлар жорий этиш ҳақидаги таҳдидлардан кутилмаганда ортга чекинди. У куч ишлатишни рад этиб, Данияга қарашли ушбу ҳудуд борасидаги можарони якунлаш учун келишув яқин эканини билдирди.
Бу баёнот – 21 январ куни Швейцарияда НАТО бош котиби Марк Рютте билан учрашувдан сўнг янгради.
Трампнинг сўзларига кўра, бу келишув «Олтин гумбаз» ракетага қарши мудофаа тизимини яратиш истаги ва муҳим фойдали қазилмаларга кириш имконини қондиради, шу билан бирга Арктикадаги Россия ва Хитой амбицияларини тўсиб қўяди.
«Бу ҳаммани жуда хурсанд қиладиган, узоқ муддатли келишув. Бу энг охирги, энг узоқ муддатли келишув. У барча томонлар учун фойдали позицияни таъминлайди, айниқса хавфсизлик ва фойдали қазилмалар масаласида. Бу абадий келишув», деди Трамп журналистларга.
Трампнинг ҳудудга тўлиқ «эгалик» қилиш ҳақидаги талабларини қандай келишув қондириши мумкинлиги номаълум. Гренландия аҳолиси ва етакчилари бу ҳудуд сотилмаслигини бир неча бор таъкидлаган.
НАТО вакилининг айтишича, орол устидаги музокаралар — Россия ва Хитой ҳеч қачон Гренландияда мустаҳкам ўрин эгалламаслигини таъминлашга қаратилган ҳолда давом этади.
Трампнинг Гренландия ҳақидаги баёнотлари Давосда асосий мавзуга айланди. У ўзини Ғарб қадриятларининг ҳимоячиси сифатида кўрсатди. «Бизга жиддий заифлашган эмас, балки кучли иттифоқчилар керак», деди Трамп.
Гренландия бўйича куч ишлатиш таҳдидини четга сурганига қарамай, Трамп «Мадуро операцияси» мисолида АҚШ ҳарбий қудрати билан мақтанди. Данияни «ношукр» деб атади.
У ҳудудий можарони «муз бўлаги» учун билдирилган «кичик талаб» сифатида кўрсатди ва Гренландияни қўшиб олиш НАТОга ҳеч қандай таҳдид солмаслигини айтди.
Унинг Гренландияни — Исландия дея адаштиришлари ва бошқа ажабтовур талабларидан иборат нутқи Давосда ноқулай нигоҳлар ва енгил кулгига сабаб бўлди, бироқ аксарият сиёсатчилар сукут сақлади.
