АҚШ Киевга Европада Patriot учун ракеталар ишлаб чиқаришга рухсат бермади

Украина президенти Володимир Зеленский ҳаво ҳужумидан мудофаа (ҲҲМ) учун зенит ракеталарининг Европада ишлаб чиқарилишини йўлга қўйиш тарафдори эканини билдирди. «Украина бу ҳақда АҚШ билан аввал ҳам гаплашган — Европада, айниқса Patriot учун етарли ҳажмда ракета ишлаб чиқаришни яратиш зарурлиги ҳақида. Ишлаб чиқаришга лицензиялар бўйича ваъдалар бўлган, аммо АҚШ ҳалигача тегишли қарорни қабул қилмади. Биз уни ҳам Украинада, ҳам НАТОдаги ҳамкорларимиз билан минтақада — Руминия, Полша ва ҳ.к. билан бирга ташкил этишни таклиф қилган эдик», — деди Зеленский сешанба, 17 феврал куни ўзининг видеомурожаатида.

Шу билан бирга, Володимир Зеленский Европа давлатлари зарур ишлаб чиқариш ҳажмларини таъминлай олишига ишонч билдирди, аммо бу ишни жадаллаштириш суръатлари етарли эмаслигини таъкидлади. «Бундай қарорлар, бундай ишлаб чиқаришлар, албатта, барчамизни, бутун Европани кучайтирган бўларди», — дея урғу берди Украина президенти.

Украина президенти бир неча бор Киевнинг ғарблик ҳамкорларини етказиб беришларни, аввало Patriot ҲҲМ тизимлари учун ракеталарни тезлаштиришга чақирган. Мюнхен хавфсизлик конференциясида Зеленский яна бир бор шу илтимосини такрорлади: у қишки совуқларда Россиянинг энергетика объектларига зарбаларига қарши Украина шаҳарларини ҳимоя қилишга чақирди.

Россия ва Украина вакиллари 17 феврал куни АҚШ воситачилигида Женевада музокараларни қайта бошлади. АҚШ воситачилигида Абу-Дабида ўтган аввалги икки раунд музокаралар жиддий ютуқ келтирмаган эди. AFP агентлиги Берлиндаги ҳукумат манбаларига таяниб хабар қилишича, Женевадаги Россия—Украина музокараларида Германия ва бошқа Европа мамлакатлари вакиллари ҳам қатнашади.

Италиянинг La Stampa нашри маълумотларига кўра, гап Италия, Германия, Франция ва Буюк Британия вакиллари ҳақида кетмоқда — улар маслаҳатлашувларда бевосита иштирок этмаяпти. Жумладан, у ерда Гюнтер Зауттер — Германия канцлерининг ташқи сиёсат ва хавфсизлик масалалари бўйича маслаҳатчиси ҳам бор.