“Кичкина жарима билан қутулиб кетдик” — ЙПХга бўйсунмаган BMW'даги шахс қоидабузарлигидан фахрланишини айтди
|13:26 / 27.02.202636 0786 мин
“Кимдир бу нарсанинг орқасидан 15 суткага кириб кетади, лекин биз кичкина жарима билан қутулиб қолдик”, деди у. Асадбек Жумаев таниш-билишлари кўплигига ишора қилиб, такрор-такрор қилмишидан фахрланишига урғу берди. Бу интервю жазо муқаррарлиги ҳақида кескин саволларни уйғотмоқда. Катта резонансдан кейин, ЙҲХБ 1,5 ой аввалги воқеа учун BMW'ни жарима майдонига эндигина жойлашнинг уддасидан чиқди.
Воқеа видеоси ва Асадбек Жумаевнинг интервюсидан кадрларВоқеа видеоси ва Асадбек Жумаевнинг интервюсидан кадрлар
Тошкент шаҳрида ЙПХ ходимларининг тўхташ ишорасига бўйсунмаган иккита BMW воқеаси иштирокчиларидан бири бу қилмишидан фахрланишини айтди.
Бу шахс – автомобилларни тюнинг қилиш билан шуғулланадиган Uzbelas Performance автосервиси ходими Асадбек Жумаев бўлиб, у бошқалар “15 суткага кириб кетиши” мумкин бўлган ҳаракати учун “кичкина жарима” билан қутулиб қолганини айтиб мақтанди ва таниш-билишлари кўплигига ишора қилди.
Январдаги воқеа
2026 йил январ ойи бошида Тошкент шаҳри Шаҳрисабз кўчасида иккита BMW автомобили ЙПХ ходимларининг тўхташ ишорасига бўйсунмасдан кетиб қолгани акс этган видео тарқалган эди. Иккала машинага ҳам қўшимча жиҳозлар ўрнатилган, машиналардан бирида давлат рақам белгиси бўлмаган.
Ўшанда Йўл ҳаракати хавфсизлиги хизмати Kun.uz'га берган изоҳида BMW'лардан бири топилиб, жаримага майдончасига жойлаштирилгани, иккинчи автомобил эса қидирувда эканини маълум қилганди.
Маълум бўлишича, ўша воқеа иштирокчиларидан бири – Uzbelas Performance автосервиси ходими Асадбек Жумаев бўлган. У блогер Малик Муҳамедовга берган интервюсида ўша қоидабузарлигига изоҳ берган.
Жумаевнинг сўзларига кўра, бундай қилмиш учун бошқа одамни 15 суткага қамашлари мумкин эди, у эса “кичкина жарима” – 10 БҲМ (4 млн 120 минг сўм) билан қутулиб кетган:
“Ўша ҳодиса бўлгандан кейин қидирувдан “резко” буёққа келишган, камераларни очиб бер дейишган. “К сожалению”, ман камерани очиб бермаганман. Шунинг эвазига мани “ГУВД”га олиб кетишган, “показание” бердиртиришган. Бу нарсани бутун Ўзбекистон гапирди. Кимдир бу нарсанинг орқасидан 15 суткага кириб кетолади, но биза кичкина “штраф” билан “отделаться” қилдик. В размере десяти минимал”.
У интервю олувчининг: “Бунақа ишни қилиш учун одамда таниш-билишлари, танкаси бўлиши керак”, деган фикрига қўшилишини билдирган:
“Да. Битта фразани айтаман, Uzbelas Performance ҳам шунинг эвазига кўтарилган: Не имей сто рублей, а имей сто друзей”.
“2-3 йилдан кейин шу видеони кўрсангиз, сизда қанақа реакция бўлади?” деган саволга жавобан Асадбек қилмишидан фахрланишини айтган:
“Барибир фахрланаман. Барибир фахрланаман... Да, может быть, биза яхши иш қилмадик, но барибир фахрланаман. Чунки, как минимум, мы живём свою жизнью, которую запомним”.
Жумаевга кўра, унинг мақсади – ҳолатни видеога тасвирга олиб тарқатиш бўлган: “Тўғрисини айтиб кетаман: уни қанақадир “нарочно” қилмаганмиз, у нарса YouTube видео учун қилинган”.
26 феврал куни Асадбек Жумаев бу воқеага алоқаси йўқлигини айтиб чиқди. “Ман кеча бутун кун ишхонада бўлганман, бу нарсага “вообще” мани алоқам йўқ”, деган у Instagram'га жойлаган видеосида.
Жумаев постнинг изоҳлар қисмида ЙТҲда гумонланаётган ўсмир унинг таниши эканини тасдиқлаган. “Бир ярим ой олдин гаплашмай қўйганмиз, текширсангиз бўлади, мандан “отписка” қилган олдиндан”, дея ёзган у.
Гувоҳномасиз автомобил бошқариш ҳолатлари жуда кўп
Гувоҳномасиз рулга ўтирган бошқа бир ҳайдовчи эса (видеода автомобил русуми кўринмаган) худди шундай қилмиш билан камида учинчи марта қўлга тушган: у 2024 ва 2025 йилларда ҳам ҳайдовчилик гувоҳномасисиз автомобил бошқаргани учун жавобгарликка тортилган бўлган.
Эслатиб ўтамиз, 25 феврал куни Тошкентда юқорида айтилганидан бошқа BMW иштирокида ҳам ЙТҲ содир бўлди: BMW ва Onix тўқнашуви оқибатида Onix'даги 3 киши жароҳатланган. Ҳодиса сабабларига аниқлик киритилмоқда.
