Кремлга яқин иқтисодчилар Россияда йил охиригача рецессия бўлишини кутмоқда

Россия президенти маъмуриятига яқин бўлган МТҚПМ таҳлилчилари ҳисоботидан келиб чиқишича, 2026 йил охиригача мамлакат иқтисодиёти узоқ давом этадиган рецессияга кириб қолиши мумкин. Мутахассислар, шунингдек, ўсиш манбалари давлат буюртмаси ва ҳарбий-саноат мажмуаси эканини кўрсатмоқда.

Фото: ИЗВЕСТИЯ/Константин Кокошкин

Кремлга яқин иқтисодчиларнинг фикрича, жорий йил охиригача Россия иқтисодиёти рецессияга тушиб қолиши мумкин. Бу ҳақда 20 март, жума куни “Известия” газетаси Россия президенти маъмуриятига яқин бўлган Макроиқтисодий таҳлил ва қисқа муддатли прогнозлаш маркази (МТҚПМ) ҳисоботига таяниб ёзди.

МТҚПМ иқтисодиётнинг рецессияга кираётганини кўрсатувчи йиғма етакловчи индикаторни (ЙЕИ) ишлаб чиққан. Марказ баҳосига кўра, ўтган йил декабрида унинг қиймати 0,49 га етган ва шу билан критик чегара — 0,18 дан қарийб уч баравар ошиб кетган. “Известия” ёзишича, ҳужжатдан яна шу нарса келиб чиқадики, Россиядаги рецессия узоқ давом этадиган тус олиши ва бир йилдан ортиққа чўзилиши мумкин.

Нашр суҳбатлашган мутахассислар фикрича, Россия иқтисодиёти ўсишини юқори асосий ставка, янада эҳтиёткор бюджет сиёсати, кадрлар танқислиги, шунингдек инвестициялардаги танаффус секинлаштирмоқда. Молиячи Алексей Родин “Известия”га тушунтиришича, нефт нархлари кескин тушиб кетса ёки Украинадаги уруш сабаб Россияга қарши янги кенг кўламли санкциялар жорий этилса, рецессия эҳтимоли янада ортади.

Молия бозорлари бўйича яна бир мутахассис — “АМаркетс”дан Игор Расторгуев АҚШ ва Исроилнинг Эронга қарши уруши сабаб нефт нархлари ўсиб турган шароитда ҳам рецессия эҳтимолий сценарий бўлиб қолишини қайд этди. Хусусан, инфляциянинг янги тўлқини Россия Марказий банкини асосий ставкани пасайтиришни тўхтатиб туришга мажбур қилиши мумкин, ҳолбуки айнан шу пасайтириш салбий сценарийнинг олдини олиши мумкин.

Мутахассислар таъкидлашича, ҳозирги пайтда Россия иқтисодиёти фақат давлат буюртмалари ва ҳарбий-саноат мажмуаси компаниялари ҳисобигагина ўсиши мумкин.