Трамп: Эронда аллақачон «режим ўзгарди»

АҚШ президенти Доналд Трамп уруш бошида ва кейинги зарбалар натижасида Эрон олий раҳбари оятуллоҳ Али Хоминаий ва бошқа кўплаб юқори мартабали шахслар ўлдирилганидан кейин Эронда аллақачон «режим ўзгариши рўй берди» деб ҳисобламоқда.

«Биз ишлаётган одамлар – бутунлай бошқа одамлар гуруҳи… Улар жуда профессионал», – деган Трамп Financial Times’га берган интервюсида.

Бундан ташқари, у Эроннинг янги олий раҳабри этиб сайланган Мужтаба Хоминаий ёки вафот этгани, ёки оғир яраланганини тахмин қилган.

«Ўғли ёки ўлган, ё жуда оғир аҳволда. Биз у ҳақда умуман ҳеч нарса эшитмадик. У ғойиб бўлди», – дейди Америка президенти.

У кейинроқ Вашингтонга учаётган самолёт бортида ҳам журналистларга ушбу сўзларини такрорлади: «Агар кўриб турган бўлсангиз, режим ўзгариши аллақачон рўй берган, чунки биринчи режим йўқ қилинган, вайрон бўлган, уларнинг барчаси ўлган. Кейинги режимдагиларнинг ҳам аксарияти ўлди, учинчи режимда эса биз аввал ҳеч қачон алоқа қилмаган одамларимиз билан ишлаяпмиз. Бу бутунлай бошқа одамлар гуруҳи. Шунинг учун мен режим ўзгарди деб ҳисоблайман ва тўғрисини айтганда, улар жуда ақлли одамлар».

АҚШ ва Исроилнинг 28 феврал куни йўллаган дастлабки зарбалари оқибатида Эронни 1989 йилдан буён бошқариб келган Али Хоминаий ҳалок бўлганди. Март ойи бошида унинг ўғли Мужтаба Хоминаий мамлакатнинг янги раҳбари этиб сайлангани эълон қилинди. Аммо у ҳозиргача жамоатчиликка кўриниш бермади, маҳаллий расмийлар у дастлабки кунда йўлланган зарбалар оқибатида яраланганини тасдиқлаган. Айрим манбаларга кўра, айни вақтда Москвага даволаниш учун олиб кетилган.

Трамп сўнгги ҳафталарда Эрон расмийлари билан ўт очишни тўхтатиш бўйича музокаралар ўтказилаётганини айтмоқда. ОАВда тарқалган хабарларга кўра, АҚШ билан музокараларни Эрон томондан мамлакат парламенти спикери Муҳаммад Боқир Ғолибоф олиб бормоқда. Аммо Эрон томони бу хабарларни рад этган.

30 март куни Покистон ташқи ишлар вазири Исҳоқ Дар Миср, Саудия Арабистони ва Туркиядан келган ҳамкасблари билан маслаҳатлашувдан кейин «яқин кунлар ичида» Исломободда АҚШ ва Эрон ўртасидаги музокаралар бўлиб ўтиши мумкинлиги ҳақида хабар берди.