Тошкентда ўзганинг сумкасини аэропортдан ўтказиб бермоқчи бўлган йўловчи синтетик наркотик билан ушланди, деб хабар берди Божхона қўмитаси матбуот котиби.
Қайд қилинишича, Истанбул – Тошкент рейси билан учиб келган йўловчининг юклари орасида ерёнғоқ солинган ўрам ичида 598 дона таблетка кўринишидаги синтетик гиёҳвандлик воситаси борлиги аниқланган.
Маълум бўлишича, йўловчи Туркияда нотаниш шахснинг сумкасини 35 доллар эвазига Тошкентга олиб келишга рози бўлган.
Божхона қўмитаси фуқароларни бегоналарнинг нарсаларини чегара-божхона постларидан олиб ўтмасликка чақирди.
