«Иш охирига етай деб қолди». Путин Зеленский билан учрашувга қарши эмас

Учрашув «исталган жойда» ўтказилиши мумкин, аммо бу фақат якуний битимни имзолаш учун бўлиши керак, деди Путин.

Фото: Видеодан кадр

Россия президенти Владимир Путин Украина масаласини ҳал қилиш бўйича якуний келишувга эришилганидан кейин Володимир Зеленский билан учрашув ўтказишга қарши эмас. У 9 май куни ўтказилган Ғалаба паради якунланганидан бир неча соат ўтиб журналистлар қаршисига чиқди ва саволларга жавоб қайтарди.

Путин Зеленский ўзи билан шахсан учрашмоқчи бўлаётгани, Россия ҳеч қачон бундан бош тортмаслиги, «ким истаса, Москвага келиши мумкинлиги»ни айтган.

Шу билан бирга, у учинчи мамлакатда учрашишга ҳам қарши эмаслиги, аммо бу музокаралар ўтказиш учун эмас, балки битим имзолаш учун бўлиши кераклигини қайд этган.

«Бу учрашув якуний нуқта бўлиши лозим. Чунки биз музокаралар нималигини биламиз. Мен буни шахсан Минскдаги музокараларда билиб олганман. Соатлаб, кечаси-ю кундузи тинимсиз гаплашасан, лекин фойдаси бўлмайди», – деган Россия президенти.

Путин аввал мутахассислар ҳар икки томон учун тушунарли бўлган ҳужжатларни келишиш учун «ишлаши, ҳамма нарсани қилиши» кераклигини қайд этган. «Бу ҳолда исталган жойда учрашиб, имзо қўйиш ёки имзолашда иштирок этиш мумкин», – дея хулоса қилди у.

Брифинг чоғида Путин Украина можароси якунига қараб кетаётгани ҳақида ҳам гапирган.

Путин Россия украинлар билан 2022 йилда Истанбулда келишувга эришгани, бироқ шундан сўнг Франция президенти Эммануэл Макрон унга қўнғироқ қилиб, Украина бундай тарихий ҳужжатларни «чаккасига тўппонча тиралган ҳолда» имзолай олмаслигини айтганини эслаган.

У келишувга кўра Россия ўз қўшинларини Киевдан олиб чиқиб кетиши керак бўлгани ва Москва бунга рози бўлгани, кейин эса Буюк Британиянинг ўша вақтдаги бош вазири Борис Жонсон Россия билан бу келишув имзолаб бўлмаслиги, чунки бу адолатсиз келишув эканини айтганини таъкидлаган.

«Украина томони вакили бу ҳужжатларни маъқуллаган бўлса, унинг адолатли ёки адолатсиз эканини ким белгилайди? Бу ерда адолатсизлик нимада, буни ким ҳал қилади? Хўп, яхши, Украинага ёрдам ваъда қилишди ва Россия билан ҳануз давом этаётган қарама-қаршиликни авж олдиришди. Ўйлайманки, иш якунига етай деб қолди, аммо барибир бу жиддий нарса», – деган Путин Ғарбдаги сиёсатчиларнинг аралашуви ҳақида гапириб.