Беҳзод Норматов ёқилғи-энергетика масалалари бўйича президент маслаҳатчиси этиб тайинланди

Энергетика вазирининг собиқ ўринбосари, “Ўзтрансгаз” собиқ раиси, февралдан буён Администрацияда шуъба мудири бўлиб ишлаб келаётган Беҳзод Норматов президент маслаҳатчиси этиб тайинланди. Бу лавозим ярим йил олдин Алишер Султоновнинг истеъфосидан кейин бўш турган эди.

Беҳзод Норматов (архив фото)

Ўзбекистон президентининг фармони билан, Беҳзод Раҳматуллаевич Норматов давлат раҳбарининг ёқилғи-энергетика масалалари бўйича маслаҳатчиси этиб тайинланди.

Ушбу лавозим 2025 йил декабр ойида Алишер Султонов ишдан олинганидан буён бўш қолаётган эди.

Муқаддам энергетика вазири ўринбосари, “Ўзтрансгаз” раиси лавозимларида ишлаган Беҳзод Норматов жорий йил февралидан буён Президент администрациясида шуъба мудири сифатида иш бошлаганди.

Беҳзод Норматов (чапда) президентнинг иқтисодий сиёсат бўйича ўринбосари Обид Ҳакимов билан давлат раҳбари ҳузуридаги йиғилишда. 2026 йил 10 март / Фото: Президент матбуот хизмати

Беҳзод Норматовнинг меҳнат фаолияти:

2019 йил декабр ойигача “Андижоннефт” АЖ бошқаруви раиси лавозимида ишлаган.
2019 йил декабрида Энергетика вазирлигида Геология, нефт ва газ қазиб чиқариш бошқармаси бошлиғи этиб тайинланган.
2020 йил апрелида энергетика вазири ўринбосари лавозимига кўтарилган.
2021 йил августида “Ўзтрансгаз” АЖ бошқаруви раиси этиб тайинланган.
2023 йил январида президент танқидига учраб, ўша йил феврал-март ойларида (истеъфо ҳақида маълум қилинмаган) “Ўзтрансгаз” раислигидан бўшатилган.
Шундан сўнг тоғ-кон ва геология вазири маслаҳатчиси бўлиб ишлаган.
2026 йил февралида Президент администрациясининг Нефт-газ соҳасидаги ислоҳотларни жадаллаштириш бўйича лойиҳа офиси шуъба мудири этиб тайинланган