Ўзбекистон Эрон халқига навбатдаги инсонпарварлик ёрдамини юборди

Ўзбекистон ҳукумати, дастлабки инсонпарварлик ёрдами юборилганидан икки ой ўтиб, Эрон халқига навбатдаги ёрдам юкларини етказди. 15 та юк машинасидан иборат гуманитар юк таркибидан дори воситалари ва тиббий буюмлар ўрин олган.

Фото: Ўзбекистон Ташқи ишлар вазирлиги

Инсонпарварлик ёрдами Туркманистон–Эрон чегарасидаги “Артик–Лютфобод” назорат-ўтказиш пунктида Эрон томонига тантанали равишда топширилди. Бу ҳақда Ўзбекистон Ташқи ишлар вазирлиги хабар бермоқда.

Тадбирда Ўзбекистоннинг Туркманистондаги элчиси Равшан Алимов, Эроннинг Туркманистондаги элчиси Али Мужтабо Рўзбеҳоний, Дарғаз шаҳри ҳокими Мужтабо Базмара ва бошқалар иштирок этди.

Эрон томони ушбу синовли дамларда кўрсатилаётган амалий кўмак учун Ўзбекистон президенти ва халқига самимий миннатдорлик билдирди.

Таъкидланганидек, мазкур инсонпарварлик ташаббуси Ўзбекистон ва Эрон ўртасидаги анъанавий дўстлик, ўзаро ҳурмат, ҳамжиҳатлик ва қўллаб-қувватлаш руҳининг яна бир ёрқин ифодасидир.

Эслатиб ўтамиз, Ўзбекистон томони уруш домига тушиб қолган Эрон халқига инсонпарварлик ёрдамининг дастлабки партиясини шу йил март ойи ўрталарида йўллаган эди.

Тайёрлаган Комрон Чегабоев

#Эрон

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.