Кафедаги жанжал ўлим билан тугади. Айбдор биттами ё бир нечта?

23 ёшли Абдурасул Аҳмаджонов асосий ишидан қайтгач, кечки пайт Фарғона шаҳридаги кафелардан бирида официантлик қилаётган эди. 12 апрел куни 21:10 лар чамаси у ва хўранда(лар) ўртасида жанжал чиқади, оқибатда официант реанимацияга ётқизилиб, кейинроқ вафот этади.

Марҳумнинг онаси фақат бир киши жавобгарликка тортилаётганидан шикоят қилиб, Kun.uz'га мурожаат қилди. У бақувват фарзандини бир неча киши тепкилаган деб ҳисоблаяпти. Аммо гувоҳлар буни рад этди.

Шуниси маълумки, оғзаки жанжал асносида Темур исмли йигит Абдурасулнинг жағига мушт туширган, у эса зарбдан йиқилган (кафелга боши билан тушгани айтиляпти) ва шифохонага олиб борилиб, уч марта жарроҳлик амалиётини бошдан кечирган. Аммо жароҳат жиддийлиги сабаб, 10 кун ҳушсиз ётган бемор вафот этган.

Онаси Гулноза Исомиддинованинг айтишича, фарзанди ҳушига келган пайтда имо-ишора билан уни 5-6 киши калтаклаганини айтган. Она видеокамера ёзувларидан келиб чиқиб, фарзанди йиқилганидан кейин бир неча киши унинг бошига, қорнига тепган деб ҳисоблаяпти ва нафақат асосий айбланувчи (у ҳозирда эҳтиёт чораси сифатида қамоққа олинган), балки унинг шериклари ҳам жавобгарликка тортилиши кераклигини айтмоқда.

“Ўғлим унга мушт туширишганида бетонга орқа мияси билан тушган. Шунда ҳам ётган жойида бориб калтаклашган. Ҳақиқат қарор топишини хоҳлайман.

Ўғлимни “группавой” бўлиб ваҳшийларча ўлдиришди. Энг алам қилгани, фақат биттасини айбдор қилишяпти. Қолганлар ҳам жавоб бериши керак”, – дейди Гулноза Исомиддинова.

Воқеа гувоҳларидан бири, кафеда официант бўлиб ишовчи Самир Саидов биз билан суҳбатда марҳум Абдурасул Аҳмаджонов юзига тушган мушт зарбидан ерга йиқилгани, шундан кейин уни ҳеч ким қайтиб калтакламаганини билдирди.

“Абдурасул ака кафеда официант бўлиб ишларди. Ўша куни у кафега мижоз бўлиб келган синфдошим билан уришиб кетди. Кейин бир-бирларини четга тортишаётганига кўзим тушди.

Темур деган бола Абдурасулнинг жағига мушт туширди. Абурасул ака бошининг орқаси билан кафелга йиқилди. У йиқилганидан кейин бошқа ҳеч ким қайтиб урмади. Кейин уни тез ёрдам машинаси олиб кетди”, – дейди у.

Ҳолат бўйича Фарғона шаҳар ИИБ томонидан Жиноят кодексининг 104-моддаси (қасддан баданга оғир шикаст етказиш) 1-қисми билан жиноят иши қўғзатилган.

Бемор вафот этгандан кейин жиноят иши 104-модданинг 3-қисми “д” банди билан қайта малакаланиб, Фарғона вилояти ИИБ тергов бўлимига ўтказилган.