Юрген Клопп футбол бўйича Германия миллий жамоаси бош мураббийи этиб тайинланди. 59 ёшли мутахассис Германия футбол иттифоқи билан тўрт йиллик шартнома имзолади.
У 15 августдан миллий жамоадаги фаолиятини бошлайди. Унинг мураббийлик штабидан Питер Кравиц, Пепейн Лейндерс ва Свен Бендер жой олади. Кравиц ва Лейндерс Клопп билан «Ливерпул»да бирга ишлаган.
Германия футбол иттифоқи Клопп глобал футбол бўлими раҳбари лавозимини эгаллаб келган Red Bull концернига бир миллион евро ўтказиб беради.
Юрген Клопп илк матбуот анжуманида оммавий ахборот воситаларига нисбатан талабларини эълон қилди.
«Сиз мени кўришни истамаган куниёқ ҳеч қандай компенсацияларсиз ишдан кетаман. Агар эртага менинг қўлимдан ҳеч нарса келмаслигини айтсангиз, кетаман.
Лекин бир киши бундай деб ҳисобламаслиги керак – бу жамоатчилик фикри бўлиши лозим. Агар Германия футбол иттифоқи ишни эплай олмаётганимни айтса, кетаман.
Агар ўзингизни номуносиб тутсангиз ва оиламни тинч қўймасангиз ҳам кетаман. Агар нимадир нотўғри бўлса, мени танқид қилинг. Хатолар устида ишлашга тайёрман. Ҳаммаси фақат футбол ва менинг ишим билан боғлиқ бўлиши керак», - деди Клопп.
У жамоатчиликка ҳам мурожаат қилди.
«Бу ишни ўзим учун қилмаяпман. Буни сиз учун қиляпман. Юлиан Нагелсманнга қандай муносабатда бўлганингизни кўрганимга қарамасдан бу ишга киришяпман. Томас Тухелга нисбатан қандай муносабатда бўлганингизга қарамасдан бу ишни зиммамга оляпман», – деди у.
Юрген Клопп шунингдек, Германия миллий жамоаси ҳақида ҳам фикр билдирди.
«Муваффақият бу – кутилганидек натижага эришишинг. «Биз Франция каби зўрмизми?» деб савол берадиган бўлсак, жавоб – йўқ, ундай эмас. «Бизда Дембеле, Мбаппе, Дуэ, Барколя каби ўйинчилар борми?» деб сўраш тўғрироқ бўлади. Жавоб – йўқ. Лекин барибир уларни юта оламиз.
Доим Франция, Испания ёки Аргентинага қарашнинг ҳожати йўқ. Муҳими – ўзимизга ва қандай футбол ўйнаётганимизга қараш керак. Биз ҳозир дунёнинг энг яхши жамоаси эмасмиз – бу ҳақиқат. Рейтингда биздан юқорида 11та жамоа бор. Бизнинг вазифамиз – ўйинимиз орқали улар устидан ғалаба қозониш», – деди Германия миллий жамоаси янги бош мураббийи.
Германия миллий жамоаси бош мураббийи Юлиан Нагелсманн жамоа жаҳон чемпионати 1/16 финалида Парагвайга мағлуб бўлганидан сўнг лавозимини тарк этганди.
