26 июль куни Эроннинг юқори мартабали расмийси Reuters агентлигига берган изоҳида «агар АҚШ худди шундай йўл тутса», Эрон ҳам ўз ҳужумларни тўхтатишини маълум қилди.
Исми ошкор этилмаслиги шарти билан гапирган эронлик расмийга кўра, Теҳроннинг позицияси «'ҳужумга жавобан ҳужумʼ бўлиб қолмоқда: агар ҳужумлар тўхтаса, Эрон ҳам ўз операцияларини тўхтатади. Бу хабар АҚШга етказиб бўлинган», дея расмийнинг сўзларини келтирмоқда нашр.
Эроннинг ушбу баёнотлари – президент Доналд Трампга унинг маслаҳатчилари нишонлар тугаб бораётгани ва АҚШ арсенали камайиб бораётганидан хавотир билдиришган вақтда юз берди.
АҚШнинг Эронга қарши 13 кеча давом этган шиддатли ҳаво зарбаларидан сўнг, жума куни кечқурун ўзининг бомбардимон кампаниясини тўхтатди. Шанба ва якшанба кунлари АҚШ томонидан ҳеч қандай ҳужум қайд этилмади. АҚШнинг ҳар бир тунги ҳужумига жавоб қайтариб келаётган Эрон ҳам ҳозирча икки кундан бери ўт очишни тўхтатиб турибди.
Аммо, Эрон расмийсига кўра, Теҳрон Трампнинг зарбаларни тўхтатиши – уларнинг позициясидаги ўзгариш эканлигига унчалик умид қилмаяпти.
«Ҳужумларнинг тўхтатилишига нисбатан оптимизмдан кўра шубҳа-гумон кучлироқ. Устувор қараш шундан иборатки, бу танаффус самимий эмас, балки тактик характерга эга. Эрон АҚШнинг ҳийла-найранглари борасида етарлича аччиқ тажриба тўплаган», деди манба.
АҚШда арсенал камайиб бормоқда
АҚШнинг БМТдаги элчиси Майк Волтс президент Трамп дипломатияга кўпроқ вақт бериш учун ҳужумларни вақтинча тўхтатишга қарор қилганини айтди. «У музокараларга бироз имконият беряпти, бироз жой ажратмоқда», деди Волтс қўшимча тафсилотларни келтирмасдан.
NBC телеканалига берган интервьюсида Волтс АҚШ ҳарбийларида «керакли ҳамма нарса бор»лигини, аммо мудофаа вазири Пет Ҳегсет – лавозимига киришганида «захиралари камайган вазиятни мерос қилиб олгани»ни айтди.
Трампнинг зарбаларни тўхтатиш қарори 24 июль куни бўлиб ўтган, юқори мартабали ҳарбий ҳамда сиёсий маслаҳатчилар иштирокидаги «учрашув»дан сўнг қабул қилинган.
Axios хабарига кўра, унда қатнашган АҚШ вице-президент Ж.Д. Вэнс иккиланаётганини маълум қилган. АҚШнинг Яқин Шарқдаги кучлари бош қўмондони адмирал Бред Купер эса бомбардимон кампаниясини тўхтатишни маслаҳат берган. «Чунки у ўз самарадорлигининг чегарасига етганди».
Исми ошкор этилмаган АҚШ расмийсининг сўзларига кўра, сўнгги кунларда АҚШ ҳарбий амалдорлари Ҳўрмуз бўғозида икки ҳафталик бомбардимонлар учун олдиндан танланган нишонлар рўйхатини деярли тугагани ҳақида огоҳлантирган.
Йирик ҳарбий операцияларни қайта бошлаш вариант сифатида сақланиб қолмоқда. Бироқ Штаб бошлиқлари биргаликдаги қўмитаси раиси генерал Ден Кейн Трампга шахсий мулоқотда бу ўқ-дорилар захирасига салбий таъсир кўрсатиши хавфи ҳақида гапирган, деди расмий. Бу айниқса, АҚШнинг Яқин Шарқдаги ҳаво мудофааси тизимлари – тутиб қолувчи ракеталарни ҳам ўз ичига олади.
АҚШ Марказий қўмондонлиги ҳозирча ушбу хабарларга изоҳ бермади. Reutersʼнинг ёзишича, АҚШ ҳарбий амалдорлари анъанавий равишда, ҳатто Конгрессдаги кўрсатмаларда ҳам президентга берган шахсий маслаҳатларини муҳокама қилишдан бош тортиб келишади.
«Аросатда қолган уруш»
Ўтган икки ҳафта давомида АҚШ кучлари – Ҳўрмуздаги кемаларга уюштирилган ҳужумларга жавоб сифатида Эронга ҳар кеча зарба бериб келаётган эди. Эрон кучлари эса АҚШ ҳужумларига жавобан араб давлатларидаги АҚШ ҳарбий объектларини нишонга олмоқда. Эрон дунё нефть оқимининг бештадан бир қисми ўтган Ҳўрмуз бўғоз устидан назоратни сақлаб қолишини айтмоқда.
АҚШ қайта бошланган ҳарбий кампанияси ўтган ойда урушни тугатишга қаратилган муваққат келишувни амалда йўққа чиқарди.
