Россия Украина бўйлаб ёпирилма зарба йўллади

Россиялик ҳарбийлар 30 июлга ўтар кечаси Украина регионлари бўйлаб ёпирилма ҳужум уюштирди, унда 70 дан ортиқ ракета ва 280 дан ортиқ дрон ишлатилган. Киев шаҳри ва Киев области, Днипропетровск, Лвив, Полтава, Харкив, Миколайив, Суми, Винница, Черкасс ва Ивано-Франковск областлари зарба остида қолди, деб хабар берди Украина президенти Володимир Зеленский. Ҳужумлар оқибатида бутун мамлакат бўйлаб саккиз киши ҳалок бўлган ва ўнлаб кишилар жабрланган.

• Киевда зарба оқибатида бир киши ҳалок бўлиб, икки киши жабрланган. Шаҳарнинг икки районида ёнғин рўй берган: Оболон районида бозор ҳудудидаги савдо павилёни ёниб кетган, Святошинск районида гаражлар кооперативи ҳудудида ёнғин чиққан. Ҳужум вақтида 56 мингдан ортиқ киевликлар метро бекатларига тушиб, жон сақлаган.
• Киев областида беш киши, жумладан, бир бола Россия ҳужумидан жабрланди. Бровари райони Скибин қишлоғида икки қаватли хусусий уй қисман вайрон бўлган, унга қўшни жойлашган яна икки уй ҳам шикастланган.
• Днипропетровск области Радушное қишлоғида олти киши, жумладан икки бола ҳалок бўлган, саккиз киши жароҳат олган. Маҳаллий расмийларга кўра, Россия ракетаси кўп фарзандли оила истиқомат қилган хусусий уйга келиб урилган. Қутқарувчиларга кўра, бу ерда иккита хусусий уй вайрон бўлиб, яна бештаси шикастланган. Харобалар остидан икки бола чиқариб олинган, яна беш киши ичкарида қолиб кетган бўлиши мумкин. Қидирув-қутқарув ишлари давом эттирилмоқда. Радушноега яқин жойлашган Кривий Риҳ шаҳрида 31 июл қурбонлар хотираси учун мотам куни деб эълон қилинди.
• Лвивда эса 34 киши жароҳат олган, бу ерда тунги ракета ҳужуми вақтида бир неча уй қисман вайрон бўлган. Беш қаватли бино харобалар остида одамлар қолиб кетган бўлиши мумкин. Шаҳар мэри Андрей Садовий хабар беришича, Россия ракетаси Виговский кўчасидаги уйлардан бирига келиб урилган, аммо портламаган. Ракетанинг жанговар қисми зарарсизлантирилган. Ливвда ҳужум оқибатида жами 20 дан ортиқ уй, болалар боғчаси ва мактаб биноси шикастланган.
• Полтава областида бир киши ҳалок бўлган. Россия зарбасидан кейин маҳаллий корхоналардан бирининг омборлари, шунингдек, «Новая почта» терминали вайрон бўлган.

РФ Мудофаа вазирлиги Россия ҳарбийлари Киев, Лвив, Днипропетровск области ва Украинанинг бошқа ҳудудларидаги ҳарбий аэродромлар, ҳарбий корхоналар ва логистика марказларига зарбалар берганини маълум қилди. Бундан ташқари, вазирлик Одессада ва Жанубий портда гўёки «ҳарбий мол-мулк» етказиб бераётган юк кемалари ҳужумлар нишони бўлганини таъкидлаган.

Янги ёпирилма зарба фонида Зеленский ғарблик ҳамкорларни Украинани ҳимоя қилиш учун етишмаётган ҳаво мудофаа тизимлари учун ракеталар етказиб беришни кечиктирмасликка чақирди. Унинг сўзларига кўра, ўтган тунда Украина авиацияси Россия ракеталарининг катта қисмини уриб туширди ва «ҳатто мобил ўт очиш гуруҳлари ҳам қанотли ракеталарга қарши самарали ишлай олди».

«Ҳамкорлардан ҳаво мудофаа тизимлари учун ракеталар танқис бўлган шароитда, ҳарбийларимиз деярли имконсиз ишларни амалга оширмоқда <...>. Бу ҳаво ҳужумидан мудофаа тизимлари учун ракеталар етказиб берилмаганда ёки кечикканда одамларнинг ҳаётини сақлаб қоладиган ноёб маҳоратдир. <...> Барча ҳамкорлар қандай ва нима билан ёрдам бера олишларини билишади. Ўз вақтида ёрдам бермаслик, баллистик ракеталарга қарши ракеталарни етказиб беришни кечиктириш айнан шундай вайронагарчиликларга, афсуски, бугунги кунда мавжуд бўлган қурбонларга олиб келади», – дея қўшимча қилди Зеленский.

Украинанинг Wildberries бўйлаб янги зарбалари: яна учта омбор ёнди

Украина дронлари 30 июл тонгида Wildberries маркетплейсининг яна учта логистик марказларига ҳужум уюштирди. Компаниядагилар Пенза яқинидаги ҳамда Удмуртиянинг Сарапул шаҳридаги омборлар зарба остида қолганини тасдиқлаган. Бу омборларда ёнғин чиққан. Пензадаги омборга ҳужум оқибатида бир киши жароҳат олган.

Бундан ташқари, украин дронлари Wildberries’нинг Перм ўлкасидаги омборига зарба берган. Бу ҳақда дастлаб Украинадаги телеграм-каналлар зарбадан кейин ёнғин бошлангани акс этган фото ва видеоларга таяниб хабар берди. Кейинроқ Россиядаги «Агентство» ва Astra нашрлари Перм районининг Замулянка қишлоғида жойлашган логистик маркази ҳужумга учраганини маълум қилди. Компания ва маҳаллий расмийлар ҳозирча ҳужум юзасидан изоҳ бермаган.

18 июлдан буён Украина зарба берган Wildberries омборлари сони 14 тани ташкил этмоқда. Киевдагилар бу ҳужумларни ушбу омборларда дронлар учун эҳтиёт қисмлар ҳамда икки мақсадли маҳсулотлар сақланиши билан изоҳлайди.