Замонавий қирувчи самолётлар нафақат юқори тезлиги, балки манёврлиги, замонавий радар тизимлари ва аниқ қуроллари билан ҳам баҳоланади. Шунга қарамай, қисқа вақт ичида нишонни тутиб олиш, хавфли ҳудуддан чиқиб кетиш ёки катта масофани босиб ўтиш учун юқори тезлик муҳим устунлик бўлиб қолмоқда.
Энг тезкор ҳарбий самолётларнинг аксарияти Совуқ уруш йилларида АҚШ ва СССР ўртасидаги рақобат шароитида яратилган. Уларнинг баъзилари ҳали ҳам максимал тезлик бўйича жаҳонда етакчилар сафида қолмоқда.
1. МиГ-25
Максимал тезлиги — соатига 3 100 километр.
Совет Иттифоқида ишлаб чиқилган МиГ-25 баландликда учувчи разведка самолётлари ва стратегик бомбардимончиларни тутиб қолиш учун мўлжалланган. Унинг юқори тезлиги икки кучли турбореактив двигател ҳамда юқори ҳароратга чидамли корпус ҳисобига таъминланган.
МиГ-25 Совуқ уруш даврининг энг хавфли қирувчиларидан бири сифатида баҳоланади ва кейинчалик АҚШнинг F-15 Eagle самолётини яратишга туртки бўлган.
2. МиГ-31
Максимал тезлиги — соатига 3 060 километр.
МиГ-25 асосида ишлаб чиқилган мазкур самолёт юқори тезликни сақлаб қолиш билан бирга, янада кучли радиолокация тизими ва замонавий қуролланишга эга бўлди. У бир вақтнинг ўзида бир нечта нишонни кузатиш ва уларга зарба бериш имкониятига эга.
МиГ-31 ҳозир ҳам Россия Ҳаво-космик кучлари таркибида хизмат қилмоқда.
3. F-15 Eagle
Максимал тезлиги — соатига 2 655 километр.
АҚШнинг F-15 Eagle самолёти МиГ-25га жавоб сифатида яратилган. У юқори тезликни манёврчанлик билан уйғунлаштирган бўлиб, ҳавода устунликни қўлга киритиш учун ишлаб чиқилган.
Самолёт бир неча бор модернизация қилинган ва F-15EX каби янги версиялари туфайли ҳозиргача долзарблигини сақлаб келмоқда.
4. Су-27
Максимал тезлиги — соатига 2 500 километр.
Совет Иттифоқида яратилган Су-27 ҳавода устунликни таъминлаш учун мўлжалланган. Икки двигатели юқори тезланишни таъминласа, аэродинамик ечимлар уни ўз даврининг энг манёврчан қирувчиларидан бирига айлантирган.
Кейинчалик айнан шу самолёт асосида Су-30, Су-34 ва Су-35 каби машҳур моделлар ишлаб чиқилган.
5. МиГ-23
Максимал тезлиги — соатига 2 500 километр.
МиГ-23нинг асосий хусусияти ўзгарувчан қанот бурчаги ҳисобланади. Бу ечим юқори тезликда ҳаво қаршилигини камайтириш, паст тезликда эса бошқарувчанликни ошириш имконини берган.
Манёврчанлик жиҳатидан кейинги авлод самолётларидан ортда қолган бўлса-да, кучли радиолокация тизими ва узоқ масофали ракеталардан фойдаланиш имконияти уни ўз даврида самарали қирувчига айлантирган.
6. F-14 Tomcat
Максимал тезлиги — соатига 2 485 километр.
АҚШ Ҳарбий-денгиз кучлари учун яратилган ушбу самолёт авианосецларни ҳимоя қилиш вазифасини бажарган. У ҳам МиГ-23 каби ўзгарувчан геометрияли қанотларга эга бўлиб, турли учиш режимларида юқори самарадорликни таъминлайди.
7. МиГ-29
Максимал тезлиги — соатига 2 445 километр.
МиГ-29 енгил фронт қирувчиси сифатида Су-27ни тўлдириш учун ишлаб чиқилган. Икки двигателли конструкцияси ва муваффақиятли аэродинамикаси унга тез тезланиш, юқори тезлик ва яқин ҳаво жангида юқори манёврчанликни таъминлаган.
Кўплаб модернизациялардан сўнг МиГ-29 бугунги кунда ҳам бир қатор давлатлар ҳарбий-ҳаво кучлари таркибида хизмат қилишда давом этмоқда.
