Қурилиш соҳасида назорат инспекцияси Тошкент шаҳри Яккасарой туманидаги Newport турар-жой мажмуаси билан боғлиқ ҳолат юзасидан изоҳ берди.
Кеча, 4 август куни Тошкент шаҳар прокуратураси бу мажмуа қурилиши муносабати билан уйи бузилган ватандошларга компенсация тўланмаётгани масаласини ўрганиб, уларнинг уйи ўзбошимчалик билан бузиб ташлангани, қолаверса бу ерда битта 20 қаватли, иккита 19 қаватли, битта 12 қаватли ва битта 2 қаватли турар жойлар ноқонуний қурилганини маълум қилган ва ҳолат бўйича жиноят иши қўзғатилган эди.
Ижтимоий тармоқларда бу каби ҳолатга тегишли идоралар томонидан етарли эътибор қаратилмагани ҳақида фикрлар билдирилмоқда. 5 август куни Қурилиш ва уй-жой соҳасида назорат инспекцияси бу фикрларга расмий муносабат билдирди.
Инспекциянинг маълум қилишича, “Mega Logistics Service” МЧЖга тегишли ҳудудда жами 9 та блокда қурилиш-монтаж ишлари амалга оширилмоқда. Шундан 3 та блок бўйича Архитектура ва шаҳарсозлик кенгаши ишчи органининг ижобий хулосаси ҳамда тегишли ижобий экспертиза хулосалари мавжуд бўлиб, ушбу ҳужжатлар асосида мазкур блокларда қурилиш-монтаж ишларини бошлаш учун Тошкент шаҳар ҳудудий назорат қилиш инспекциясидан белгиланган тартибда рўйхатдан ўтказилган.
Қолган 6 та блокда эса қурилиш-монтаж ишлари Инспекциядан белгиланган тартибда рўйхатдан ўтказилмасдан олиб борилаётгани назорат тадбирлари давомида аниқланган.
Аниқланган ҳолатлар юзасидан буюртмачи – Mega Logistics Service'га бир неча марта бажарилиши мажбурий бўлган ёзма кўрсатмалар берилган. Уларда қурилиш-монтаж ишларини белгиланган шаҳарсозлик ҳужжатлари асосида ҳамда объектни Инспекциядан тегишли тартибда рўйхатдан ўтказган ҳолда амалга ошириш талаб этилган.
Бироқ ёзма кўрсатмаларда белгиланган талаблар бажарилмагани сабабли буюртмачининг масъул мансабдор шахслари белгиланган тартибда маъмурий жавобгарликка тортилган. Шунингдек, буюртмачининг техник назоратчисига нисбатан тегишли тақдимнома киритилиб, таъсир чоралари қўлланилган.
Бундан ташқари, мазкур ҳолатлар бўйича Инспекция томонидан тўпланган ҳужжатлар тегишли ҳуқуқий баҳо бериш учун ҳуқуқни муҳофаза қилувчи органларга юборилган.
“Таъкидлаш лозимки, мазкур объектда аниқланган қонунбузилиш ҳолатлари Инспекция томонидан эътиборсиз қолдирилмаган. Аксинча, улар юзасидан белгиланган тартибда назорат тадбирлари ўтказилиб, ваколат доирасида тегишли таъсир чоралари қўлланилган ҳамда қонунбузилишларга ҳуқуқий баҳо берилишини таъминлаш бўйича зарур чоралар кўрилган”, – дейилади инспекцияси баёнотида.
