Россия ҳукумати К2–К4 («Евро-2», «Евро-3» ва «Евро-4») экологик тоифаларига мансуб бензинни ишлаб чиқариш ҳамда сотишга 2027 йил 1 июлгача рухсат берди. Бу ҳақда Россия Энергетика вазирлиги маълум қилди.
Шу билан бирга, ҳукумат аввал қабул қилинган ва 2026 йил охиригача таркибида олтингугурт миқдори юқорироқ бўлган К5 тоифали бензиндан фойдаланишга рухсат берувчи қарорни бекор қилди.
Энергетика вазирлиги маълумотига кўра, автоёнилғи қуйиш шохобчаларида бензиннинг экологик тоифаси харидорлар учун кўринарли тарзда кўрсатилади. Вазирлик ушбу қарор вақтинчалик хусусиятга эга эканини ва ёнилғи сифати талаблари билан истеъмолчиларни узлуксиз таъминлаш ўртасидаги мувозанатни сақлаш мақсадида қабул қилинганини таъкидлади.
Нашр маълумотларига кўра, Россиядаги ёқилғи инқирози Украина қуролли кучларининг нефтни қайта ишлаш заводлари ҳамда ёнилғи-энергетика инфратузилмаси объектларига берган мунтазам зарбалари ортидан кучайган. Айниқса, май ойи охирида Москва ёнилғисининг қарийб 40 фоизини таъминлайдиган «Капотня» нефтни қайта ишлаш заводи қисқа вақт ичида икки марта ҳужумга учраб, 2026 йил охири ёки 2027 йил бошигача ишдан чиққан.
Reuters агентлиги маълумотига кўра, Россияда бензин ишлаб чиқариш ҳажми 2026 йил июн ойида ўтган йилнинг шу даврига нисбатан 25 фоизга қисқариб, кунига 85 минг тоннани ташкил этган. Ёзги мавсумда эса мамлакатда кунлик талаб тахминан 110 минг тоннани ташкил этмоқда. Шу боис Россиянинг 40 дан ортиқ ҳудудида ёнилғи савдосига расмий чекловлар жорий этилган.
Мутахассислар фикрича, паст экологик стандартли бензин ишлаб чиқаришга рухсат бериш нефт маҳсулотларини чуқур қайта ишламасдан ишлаб чиқариш имконини кенгайтиради ва ишлаб чиқариш ҳажмини ойига юз минглаб тоннага ошириши мумкин. Бироқ, бундай ёнилғи замонавий автомобилларнинг катта қисми учун хавф туғдириши мумкинлиги ҳам қайд этилмоқда.
